Job 34

Chinese TTVH 2021 (現代台語譯本漢字版)

← Chapter 33 Jump to: Chapter 35 →

1以利戶閣講：

2恁有智慧的人，著聽我的話；有智識的人著注意聽。

3咱用耳孔聽出意思，用舌試出滋味。

4咱著辨別什麼是著，明白什麼是好。

5因為約伯講：「我無毋著，上帝卻拒絕我的申訴。

6我無毋著，伊猶看我做白賊；我無過失，猶久受著𣍐醫得的傷。」

7啥人親像約伯滿嘴恥笑，假若啲飲水？

8伊及邪惡的人鬥陣，及歹人來往；

9因為伊曾講：「人因為親近上帝來歡喜，攏無利益。」

10所以，恁明理的人，著聽我的話。上帝絕對𣍐做歹；全能者一定𣍐行不義。

11伊會照人的行為給伊報應，照人的行做給伊對待。

12上帝一定𣍐做毋著；全能者𣍐顛倒是非。

13豈有人指派上帝掌管大地？豈有人將全世界交代伊？

14上帝若將伊的神及氣收回，

15所有的人攏會滅亡，人攏會歸土。

16你若明理，著聽我講，俯耳孔聽我欲講的話：

17上帝若厭惡公平，伊豈會當治理？伊是公義閣有權能，你豈會當給伊定罪？

18上帝會當對君王講「你是歹人」，對貴族講「恁真惡毒」。

19伊對待有權勢的人𣍐偏私，嘛𣍐重富輕貧，因為𪜶攏是伊的手所造的。

20𪜶佇半暝忽然死去；上帝佇混亂中給𪜶消滅。伊毋免用人的手就會剿滅有權力的人。

21上帝的目睭注意看逐個人的路，監察𪜶的腳步。

22烏暗抑是死蔭，攏𣍐當互做歹的人匿。

23上帝毋免定時間，隨時會當召人來受伊審判。

24伊毋免查問就會當徹底打倒有權力的人，設立別人來接𪜶的位。

25因為伊知𪜶的行為；一夜之間給𪜶捙倒，𪜶就滅亡。

26伊佇眾人的目睭前拍𪜶，因為𪜶的罪給𪜶刑罰。

27𪜶偏離無隨伊，無愛行伊的道路，

28致到散赤人喉叫的聲透到伊的面前；伊有聽著困苦的人的喉叫。

29上帝若恬恬，啥人敢給伊指責？伊若面越走毋插咱，啥人會得著伊眷顧？無論國家抑是個人，上帝攏有啲監察，

30才免無敬畏伊的人做統治者，陷害人民。

31你豈有對上帝講「我已經受刑罰，𣍐閣犯罪；

32我看𣍐著的，求你指示；我若有做毋著，我𣍐閣做」？

33豈是上帝所做的無照你的意思，你才毋悔改？著決定的是你，毋是我；你知的，做你講。

34明理的人對我講；智慧的人聽我的話就講：

35「約伯講的無智識，伊的話無智慧。

36約伯著徹底受試驗，因為伊的應答親像邪惡的人。

37伊罪上加罪，佇咱中間製造困擾，閣講真多話敵對上帝。」

← Chapter 33 Jump to: Chapter 35 →