Job 36

Chinese TTVH 2021 (現代台語譯本漢字版)

← Chapter 35 Jump to: Chapter 37 →

1以利戶閣續接講：

2你等一下，我欲指示你，因為我猶有話欲替上帝講。

3我欲對四方取智識，證明我的創造主是著。

4我的話實在，無白賊，有智識齊備的徛佇你面前。

5上帝有大權能，無看輕人；伊的智慧高，能力大。

6伊無互歹人活落去；伊公平對待困苦的人。

7伊的目睭不時看顧義人，互𪜶及君王做夥坐王位，得著尊榮到永遠。

8人若互鎖鍊鍊啲，互苦難的索纏著，

9按呢是上帝啲指示𪜶知家己的所做，以及𪜶所犯的重罪。

10伊閣開𪜶的耳孔受教示，指示𪜶著悔改，離開罪惡。

11𪜶若順趁來服事伊，就會日日亨通，年年安樂。

12𪜶若毋順趁，會互刀劍刣，因為無知來死。

13心內無上帝的人不時啲受氣；𪜶受責罰嘛毋求上帝幫贊。

14𪜶會佇少年的時就死，佇見笑中斷氣。

15上帝通過苦難解救受苦的人，用災難互𪜶醒悟。

16上帝愛欲救你脫出災難，導你到開闊自由的所在，閣排滿豐盛的食物佇你的桌頂。

17總是歹人應得的刑罰今臨到你；你𣍐當脫離公義的審判。

18毋通因為受氣致到你侮慢上帝，嘛毋通因為財富的引誘行偏去。

19你的財富對你豈有利益？你的權力對你豈有幫贊？

20毋通渴慕暗暝，因為彼時人佇𪜶住的所在受消滅。

21著謹慎，毋通轉向罪惡，因為你選擇罪惡才受著苦難。

22看咧，上帝的權能赫呢偉大；有叨一個導師親像伊？

23啥人會當指定伊著做的事？啥人會當給伊講「你做毋著」？

24人攏唱歌謳咾伊，你嘛著會記得稱讚伊的作為。

25所有的人攏有看著伊的所做，毋拘𪜶只有會當對遠遠看。

26上帝實在偉大，咱無法度了解；伊的歲壽無窮盡。

27伊吸一滴一滴的水，互𪜶變做雲霧，激雨，

28就對天落充足的雨水，互世間眾人。

29啥人會明白雲按怎搋開，雷的聲按怎對上帝徛起的所在發出？

30伊對伊的周圍發出熠爁，射到海底。

31伊用諸個治理世間人，閣賜𪜶豐盛的食物。

32伊手裡提熠爁，命令伊射欲射的目標。

33雷的聲表明伊欲來，連牲生都知伊啲欲來。

← Chapter 35 Jump to: Chapter 37 →