Job 9

Chinese TTVH 2021 (現代台語譯本漢字版)

← Chapter 8 Jump to: Chapter 10 →

1約伯應比勒達講：

2我知代誌確實是按呢；人佇上帝面前哪會當算做義？

3人若欲及伊爭論，千項嘛無法度應一項。

4上帝有智慧，伊的氣力真大；啥人對抗伊，𣍐受傷害？

5伊給山徙走，山嘛猶毋知；伊一下受氣，山就崩落去。

6伊互地振動離開原位；大地的柱嘛搖泏。

7伊命令日頭，日頭就無出來；伊封密星辰，星辰就無發光。

8伊家己搋開天，行佇海湧的頂面。

9伊創造北斗、參星、昴星，及南方的星座。

10伊做的代誌大甲𣍐測度得；伊行的奇事多甲算𣍐了。

11伊對我遮經過，我無看著；伊行過去，我嘛毋知。

12伊提去，啥人會當阻擋？啥人敢問伊：你啲做什麼？

13上帝𣍐收回伊的受氣；連扶助海怪拉哈伯的，嘛屈服佇伊下面。

14按呢，我哪敢應伊，抑是用什麼話及伊爭辯？

15我雖然無辜，嘛毋敢應伊，只有對審判我的求恩。

16我若求叫伊，就講伊有應我，我嘛毋信伊會聽我的聲。

17因為伊用大風拍碎我，無緣無故加添我的創傷。

18伊毋准我喘一個氣，互我受盡苦楚。

19欲講氣力，伊上強猛；欲講審判，啥人敢傳伊出庭？

20我雖然無辜，我家己的嘴嘛會定我的罪；我雖然無通指責，伊嘛會證明我錯誤。

21我雖然清白，有什麼路用？我活落去嘛無什麼意思。

22什麼攏像款；所以我講：正直的及作歹的，伊攏剿滅。

23人若因為災禍忽然死，無辜的人若抵著災難，伊給𪜶恥笑。

24上帝將世界交佇歹人的手；伊掩審判官的目睭；這若毋是伊做的，無是啥人？

25我的日子啲過真緊，真緊過去，無享受著什麼福氣；

26真緊過去親像快艇；親像鷹鳥真緊衝落去搙食物。

27我若講欲將我的哀怨放𣍐記得，將憂容變做笑容，

28我猶原為著我諸個苦難驚惶；因為我知你𣍐看我做無罪。

29我既然會受定罪，我哪著空空著磨？

30我若用雪文洗身軀，用鹼洗手，

31你一定會給我㧒落坑溝，連我的衫都會厭惡我。

32上帝及我無像款，伊毋是世間人；我𣍐當應伊，及伊去法庭對指。

33阮中間無裁判者，通互阮雙方攏會服。

34願上帝無閣用柺仔刑罰我，無用伊的威嚴互我驚；

35我就無驚，大膽發言；總是我知我毋是此款人。

← Chapter 8 Jump to: Chapter 10 →