John 13

Chinese TTVH 2021 (現代台語譯本漢字版)

← Chapter 12 Jump to: Chapter 14 →

1𨃟過節前，耶穌知伊離開此世間轉去父遐的時間已經到。伊一直有疼此世間屬伊家己的人，就疼𪜶到底。

2耶穌及伊的門徒啲食暗頓的時，魔鬼已經將出賣耶穌的意思下佇以斯加略西門的子猶大的心。

3耶穌知父已經將一切交佇伊的手，嘛知家己對上帝遐來，欲閣轉去上帝遐，

4就離開桌，褪外衫，提一條巾仔縖佇腰裡，

5然後將水倒佇水盆，給門徒洗腳，閣用縖佇腰裡的巾仔給𪜶拭。

6伊洗到西門‧彼得遐，彼得給伊講：「主啊，你欲給我洗腳噢？」

7耶穌應講：「我啲做的，你現在毋知，後來就會明白。」

8彼得給伊講：「你絕對𣍐用得給我洗腳。」耶穌應講：「我若無給你洗腳，你就及我無關係。」

9西門‧彼得給伊講：「主啊，毋若腳，連手及頭殼嘛給我洗。」

10耶穌給伊講：「人身軀洗了，歸身軀攏清氣；干焦洗腳就好。恁已經清氣，毋拘毋是逐個攏按呢。」

11因為耶穌知什麼人啲欲給伊出賣，所以才講「恁毋是逐個攏清氣」。

12耶穌給𪜶洗腳了後，穿外衫，倒轉去伊的坐位。伊問𪜶講：「恁豈有明白我對恁所做的？

13恁稱呼我『老師』，嘛稱呼我『主』；恁按呢稱呼真著，因為我就是。

14我作主，作老師，都給恁洗腳，恁嘛著互相洗腳。

15我有留模樣互恁，是欲互恁通照我對恁所做的去做。

16我實實在在給恁講，僕人𣍐比主人較大；奉差派的嘛𣍐比差派伊的較大。

17既然恁明白此個事，若去實行就真有福氣。

18「我毋是指恁全體啲講；我認識我所揀選的。不過這是欲互聖經所講『及我做夥食飯的人竟然背逆我』此句話會應驗。

19今代誌猶未發生，我先給恁講，互恁佇代誌發生的時通信我就是彼位『自有永有』的。

20我實實在在給恁講，接納我所差的就是接納我；接納我的就是接納差我彼位。」

21耶穌講諸個話了後，心內非常激動，就明明講：「我實實在在給恁講，恁中間有一個人欲給我出賣。」

22門徒你看我我看你，毋知伊是啲講什麼人。

23門徒中間有一個是耶穌所疼的，伊坐佇耶穌的身邊。

24西門‧彼得就向彼個門徒點頭表示，叫伊問看耶穌是啲講什麼人。

25彼個門徒就撐倚耶穌，給伊問：「主啊，是什麼人？」

26耶穌應講：「我欲搵此塊餅提互一個人，彼個人就是。」伊就提彼塊餅搵醬，然後提互以斯加略西門的子猶大。

27伊一下接著彼塊餅，撒旦就入伊的心。耶穌給猶大講：「你想欲做的，趕緊去做！」

28同坐桌的人無一個知是按怎耶穌給伊講此句話。

29因為猶大是管錢的，有人想做耶穌是啲叫伊去買守節欲用的物，抑是叫伊去賑濟散赤人。

30猶大接彼塊餅了後隨時出去。彼時是暗時。

31猶大出去了後，耶穌講：「今人子已經得著榮光；上帝嘛通過人子得著榮光。

32既然上帝通過人子得著榮光，上帝家己嘛欲榮耀人子，閣欲隨時互伊得著榮光。

33細子，我及恁做夥賰無偌久啦。恁會尋我，照我曾給猶太人講，今我給恁講：『我欲去的所在，恁𣍐當去。』

34我互恁一條新的誡命：恁著相疼；照我疼恁按呢，恁嘛著相疼。

35恁若相疼，眾人會對這來知恁是我的門徒。」

36西門‧彼得問耶穌：「主啊，你欲去叨位？」耶穌應講：「我欲去的所在，你現在𣍐當隨我去，不過後來會隨我去。」

37彼得講：「主啊，是按怎我現在𣍐當隨你去？我甘願為著你放拺性命！」

38耶穌應講：「你欲為著我放拺性命噢？我實實在在給你講，雞啼以前，你會三遍毋認我。」

← Chapter 12 Jump to: Chapter 14 →