Luke 10

Chinese TTVH 2021 (現代台語譯本漢字版)

← Chapter 9 Jump to: Chapter 11 →

1諸個代誌了後，主另外揀七十二人，差𪜶兩個兩個先去伊本身想欲去的逐個城逐個所在。

2耶穌給𪜶講：「通收成的真多，作工的人真少。所以，恁著祈求管收成的主派工人去收成。

3去！我差恁出去，親像送羊仔入去豺狼的內面。

4毋通帶錢袋，毋通帶旅行袋，嘛毋通帶鞋，佇路裡毋通給人請安。

5恁無論入去叨一間厝，著代先講『願恁此家平安！』

6佇遐若有愛平安的人，恁的平安會留佇𪜶遐；若無，彼個平安會倒轉來歸恁。

7恁著𫢶彼個家。𪜶準備什麼，恁就食什麼，飲什麼，因為作工的人應該得著工錢。恁毋通對此家徙過彼家。

8恁無論入去叨一個城，人若接待恁，捧什麼出來，恁就食什麼。

9城內有病的人著給𪜶醫，續給𪜶講：『上帝的主權啲欲實現啦。』

10「無論入去叨一個城，人若無歡迎恁，恁著出去大街路講：

11『連恁此個城牢佇阮腳的土粉，阮都欲拌掉給恁警告；不過恁著知上帝的主權啲欲實現啦。』

12我給恁講，佇審判的日，所多瑪所受的刑罰會比彼個城所受的閣較好忍受。」

13「哥拉汛，你慘啊！伯賽大，你慘啊！我佇恁中間行的神跡若佇泰爾及西頓行，𪜶早就穿麻衫，坐佇火灰頂悔改啦。

14佇審判的時，泰爾及西頓受的刑罰會比恁著受的較好忍受。

15你咧，迦百農，你愛人給你扶上天是無？𣍐，上帝會給你㧒落陰府！

16「聽趁恁的就是聽趁我，拒絕恁的就是拒絕我；拒絕我的就是拒絕差我來彼位。」

17彼七十二人歡歡喜喜倒來，報告講：「主啊，阮奉你的名命令，連鬼都服從阮！」

18耶穌給𪜶講：「我有看見撒旦親像熠爁對天頂摔落來。

19著知，我有賜恁權柄通踏蛇及蝎仔蟲，閣通制伏對敵一切的能力；無一項會給恁傷害。

20不過，毋通因為諸個邪神降服恁，恁就歡喜；著因為恁的名記載佇天頂來歡喜。」

21彼時，耶穌互聖神感動滿心歡喜，講：「父啊，天地的主，我感謝你，因為你有將諸個事對有智慧有學問的人蓋起來，毋拘對細漢囝仔啟示。父啊，是啦，因為這是你的好旨意。

22「我的父已經有將一切攏交託我。父以外無人識子是什麼人；子及子愛欲啟示的人以外嘛無人識父是什麼人。」

23耶穌越轉身私下對門徒講：「有目睭通看恁所看見的，彼個人真有福氣！

24我給恁講，以前有真多先知及君王愛欲看恁所看見的亦無看著，欲聽恁所聽見的亦無聽著。」

25有一個律法教師徛起來試探耶穌，講：「老師，我著做什麼才會得著永遠的活命？」

26耶穌應伊講：「律法有寫什麼？你按怎了解？」

27彼個人應講：「你著全心、全情、全力、全意疼主 — 你的上帝；閣著疼厝邊親像疼家己。」

28耶穌給伊講：「你應了真著。照按呢去做就會得著活命。」

29彼個律法教師為著欲表明家己是著，就閣問耶穌：「什麼人是我的厝邊？」

30耶穌應講：「有一個人對耶路撒冷落去耶利哥，抵著強盜；𪜶剝伊的衫，閣給伊拍到半死，然後給伊放下啲，做𪜶去。

31抵好有一個祭司對彼條路落來，看著彼個人就閃對路的彼旁過去。

32像款，有一個利未人來到彼個所在，看著彼個人嘛閃對路的彼旁過去。

33總是，有一個撒馬利亞人對遐經過，一下看著彼個人就心真毋甘，

34行倚去，用油及酒抹伊的孔嘴，閣用布給伊包紮，然後給伊扶去騎家己的驢仔，導伊去旅館，給伊照顧。

35隔日，伊提兩個銀仔交互旅館的頭家，交代講：『請你照顧此個人，所費若著較多，我倒來的時會補你。』」

36耶穌問彼個律法教師：「你想，此三個人叨一個是互強盜搶彼個人的厝邊？」

37伊應講：「給伊憐憫彼個。」耶穌給伊講：「你去，照按呢去做。」

38耶穌及門徒繼續行。耶穌入去一個庄頭，有一個婦仁人，叫做馬大，給伊接待。

39馬大有一個小妹，叫做馬利亞，坐佇主的腳前聽伊的教示。

40馬大為著接待，代誌多心齷齪，就來給耶穌講：「主啊，我的小妹放我家己一個啲摸，你哪無要無緊？叫伊來給我鬥腳手。」

41主應伊講：「馬大，馬大，你為著代誌多啲掛慮操煩；

42所需要的只有一項。馬利亞已經揀著上好彼份，無人會當給伊搶去。」

← Chapter 9 Jump to: Chapter 11 →