Mark 10

Chinese TTVH 2021 (現代台語譯本漢字版)

← Chapter 9 Jump to: Chapter 11 →

1耶穌離開彼所在入去猶太地區，過去約旦河的彼旁岸。群眾閣聚集去伊遐，伊閣照常教示𪜶。

2有一寡法利賽派的人欲試探耶穌，倚來問伊講：「丈夫離伊的某有合律法無？」

3耶穌應講：「摩西有互恁什麼命令？」

4𪜶講：「摩西允准人寫離婚書就通離伊的某。」

5耶穌給𪜶講：「摩西是因為恁的心硬才寫此條誡命互恁。

6毋拘起頭創造的時，上帝造人，有男有女。

7因為此個理由，人會離開伊的父母，及伊的某結合，

8兩人成做一體。按呢，𪜶已經毋是兩個，是一體。

9所以，上帝所配合的，人毋通拆開。」

10𪜶入去厝內的時，門徒閣問耶穌此個代誌。

11耶穌給𪜶講：「無論什麼人，離伊的某去娶別個婦仁人就是犯姦淫，辜負伊的某；

12某若離伊的丈夫去嫁別人嘛是犯姦淫。」

13有人導囝仔來耶穌遐，愛伊給𪜶按手祝福；門徒給𪜶責備。

14耶穌看著，真受氣，對門徒講：「互囝仔來我遮，毋通給𪜶阻擋，因為上帝國是此款人的。

15我實在給恁講，人若無親像囝仔按呢接受上帝國，絕對𣍐當入去。」

16耶穌就給𪜶抱，按手祝福。

17耶穌抵欲出外的時，有一個人走來，跪佇伊的面前，問伊講：「好的老師，我著做什麼才會當承受永遠的活命？」

18耶穌給伊講：「你哪會講我是好？上帝以外，無一個是好。

19諸個誡命你攏識：毋通害死人；毋通姦淫；毋通偷提；毋通作偽證；毋通詐欺；著孝敬父母。」

20彼個人應耶穌講：「老師，諸個誡命我對細漢就一直有啲遵守。」

21耶穌注目看伊，疼伊，給伊講：「你猶欠一項；你去，去賣所有的來分互散赤人，你佇天頂就有財寶，然後來隨我。」

22彼個人一下聽著此句話，面失色，憂憂愁愁離開；因為伊財產真多。

23耶穌四周圍看一輪，給門徒講：「有錢人入上帝國偌仔呢困難！」

24門徒聽著伊所講的話，非常著驚。耶穌閣給𪜶講：「細子啊，入上帝國真正困難！

25駱駝穿過針鼻嘛比好額人入上帝國閣較簡單。」

26門徒閣較著驚，大家講來講去：「若按呢，什麼人會當得著救？」

27耶穌注目給𪜶看，講：「此個事，人做𣍐到，上帝就毋是按呢，因為上帝逐項攏會。」

28彼得就給耶穌講：「阮已經放拺一切來隨你。」

29耶穌應講：「我實在給恁講，無論什麼人，若為著我及福音的緣故放拺厝宅、兄弟、姊妹、老母、老父、子兒，抑是田園，

30佇今世會得著百倍的厝宅、兄弟、姊妹、老母、子兒，及田園，閣有迫害；佇來世會得著永遠的活命。

31總是真多做頭前的會做上路尾；上路尾的會做上頭前。」

32耶穌及伊的門徒上耶路撒冷的路中，伊行佇頭前；門徒感覺真奇怪，隨的人真驚惶。耶穌閣一遍導十二使徒去邊仔，將伊啲欲抵著的事給𪜶講：

33「今咱欲上耶路撒冷；人子會受出賣互祭司長及經學教師。𪜶會給伊定死罪，後來將伊交互外邦人。

34𪜶會給伊戲弄，呸涎，鞭拍，害死；三日後，伊會閣活。」

35西庇太的子雅各及約翰行進前，給耶穌講：「老師，阮所求的，請你給阮成全。」

36耶穌問講：「恁愛我給恁做什麼？」

37𪜶講：「你得著榮光的時，請互阮一個坐你的正旁，一個坐你的倒旁。」

38耶穌給𪜶講：「恁毋知家己啲求什麼。我飲的杯，恁會當飲𣍐？我受的洗，恁會當受𣍐？」

39𪜶講：「阮會！」耶穌給𪜶講：「我所飲的杯，恁欲飲；我所受的洗，恁欲受，

40不過坐我的正旁倒旁毋是我會當互人的。上帝為著什麼人準備就互彼個人。」

41其他彼十個門徒聽著，就對雅各及約翰受氣。

42耶穌叫𪜶來，給𪜶講：「恁知，佇外邦人的中間，許個互人看做統治者的做主給𪜶管轄，𪜶的領袖給𪜶支配。

43不過恁中間就毋應該按呢。恁中間愛做大的著做恁的差用；

44愛做第一的著做眾人的僕人。

45因為人子來，毋是欲互人服事，反轉是欲給人服事，甚至犧牲家己的性命來贖回真多人。」

46耶穌及伊的門徒來到耶利哥。𪜶及一大陣人欲對耶利哥出去的時，有一個失明的乞食，底買的子巴底買，坐佇路邊。

47伊聽講拿撒勒人耶穌對遐過，就喝：「大闢的子耶穌，憐憫我！」

48真多人給伊責備，叫伊恬恬，毋拘伊愈大聲喝：「大闢的子，憐憫我！」

49耶穌停腳，講：「叫伊來！」𪜶就去叫彼個盲人，給伊講：「安心，起來！伊啲叫你。」

50盲人就將外衫㧒掉，跳起來，來到耶穌遐。

51耶穌給伊講：「你愛我給你做什麼？」盲人應講：「拉波尼，我愛閣看見！」

52耶穌給伊講：「你轉去。你的信心互你得著醫好！」盲人隨時閣會看見，就歸路隨耶穌。

← Chapter 9 Jump to: Chapter 11 →