Mark 14 — Chinese TTVH 2021 (現代台語譯本漢字版)

1閣兩日就是𨃟過節及除酵節。祭司長及經學教師啲尋看欲用什麼計謀通掠耶穌，給伊害死；

2不過𪜶講：「毋通佇節期中，驚了民眾起暴動。」

3耶穌佇伯大尼痲瘋病人西門的厝啲坐桌食飯的時，有一個婦仁人來，提一罐玉瓶，內面貯滿純閣貴的哪噠芳油。伊摃破玉瓶，將芳油倒佇耶穌的頭殼頂。

4有一寡人真受氣，互相議論講：「哪著按呢浪費芳油？

5此罐芳油會當賣三百外個銀來救濟散赤人！」𪜶就給伊責備。

6毋拘耶穌講：「毋通給伊擋！哪欲給伊刁難？伊有為著我做一項好事。

7不時有散赤人及恁做夥，恁若欲，不管時都會當幫贊𪜶；不過我𣍐不時及恁做夥。

8此個婦仁人已經盡力做啦；伊先用芳油抹我的身軀準備我的埋葬。

9我實在給恁講，此個福音無論傳到全世界什麼所在，人攏會講起此個婦仁人所做的代誌來記念伊。」

10十二使徒的一個，以斯加略的猶大，去見許個祭司長，欲將耶穌出賣互𪜶。

11𪜶聽著真歡喜，答應欲錢互伊。猶大就一直啲尋機會，看欲按怎通出賣耶穌。

12除酵節的頭一日，就是刣𨃟過節的羊羔彼日，門徒來問耶穌：「你愛阮去叨位給你準備食𨃟過節的晚餐？」

13耶穌差兩個門徒，吩咐𪜶講：「恁入去城內，會抵著一個提水瓶的查甫人，恁隨伊去。

14伊無論入去叨一間厝，恁著給彼家的主人講：『老師啲問，伊及伊的門徒欲食𨃟過節晚餐的客廳佇叨位？』

15伊會報恁看樓頂一間款好勢的大廳，恁就佇遐為著咱準備。」

16彼兩個門徒就出去，到城內，看著逐項及耶穌給𪜶講的攏像款；𪜶就佇遐準備𨃟過節的晚餐。

17黃昏的時，耶穌及十二使徒做夥來。

18𪜶啲食飯的時，耶穌講：「我實在給恁講，恁諸個及我做夥啲食的人中間，有一個欲給我出賣。」

19𪜶真傷心，一個一個給伊問：「毋是我乎？」

20耶穌給𪜶講：「是恁十二人中的一個，就是提餅及我佇盤裡啲搵彼個。

21照聖經所記載，人子會受害，不過出賣人子彼個人慘啊！彼個人寧可無出世較好！」

22𪜶啲食的時，耶穌提餅，感謝了後擘開，分互門徒，講：「提去；這是我的身軀。」

23後來伊捧杯，感謝了後提互門徒，𪜶就攏飲彼杯。

24耶穌給𪜶講：「這是我的血，是立約的血，為著真多人流出的。

25我實在給恁講，佇上帝國飲新的葡萄酒彼日以前，我絕對𣍐閣飲此個酒。」

26𪜶吟詩了後就出去，去橄欖山。

27耶穌給𪜶講：「恁攏會放拺我，因為聖經有記載：我欲拍牧者，羊就四散。

28不過我閣活以後會比恁先去加利利。」

29彼得給耶穌講：「眾人若攏放拺你，我一定𣍐！」

30耶穌給彼得講：「我實在給你講，今仔日，就是今暝，雞啼兩遍以前，你會三遍毋認我。」

31毋拘彼得堅持講：「若一定著及你做夥死，我嘛絕對𣍐毋認你！」其他的人嘛攏按呢講。

32耶穌及門徒來到一個所在，叫做客西馬尼。伊給門徒講：「我去祈禱，恁𫢶遮坐。」

33伊就導彼得、雅各、約翰做夥去。伊真驚惶，非常痛苦，

34對𪜶講：「我心憂傷到欲死，恁𫢶遮，著警醒！」

35耶穌行較進前，仆佇土腳祈求，看會當互伊免經過此個痛苦的時間𣍐。

36伊求講：「阿爸父啊，你逐項攏會。此個杯求你給我提開，毋拘毋是照我的意思，著照你的旨意實現。」

37後來耶穌轉來，看著門徒啲睏，就給彼得講：「西門，你啲睏噢？你𣍐當警醒一點鐘久是無？

38著警醒，著祈禱，才𣍐陷落誘惑。恁雖然心真意愛，毋拘肉體軟弱。」

39耶穌閣去祈禱，嘛是講像款的話。

40伊閣轉來，看著𪜶因為目睭真澀猶啲睏；𪜶毋知欲給耶穌應什麼。

41耶穌第三遍轉來，對𪜶講：「恁猶啲睏，猶啲歇睏噢？夠額啦！時間已經到；恁看，人子受出賣交佇罪人的手頭啦。

42起來，咱來去。恁看，出賣我的人來啦。」

43耶穌猶啲講的時，十二使徒的一個 — 猶大隨時來，祭司長、經學教師，及長老派來的一陣人攑刀攑棍及伊鬥陣來。

44出賣耶穌彼個人有互𪜶一個暗號，講：「我給伊唚彼個就是；恁給掠，嚴密看守，給伊押去。」

45猶大一下到，隨時行倚耶穌，叫「拉比」，就給伊唚，

46𪜶就下手掠耶穌。

47有一個徛佇邊仔的人拔刀對大祭司的僕人刜落去，給伊一旁的耳仔削起來。

48耶穌給𪜶講：「恁攑刀攑棍出來掠我，是欲掠強盜是無？

49我逐日佇聖殿啲教示人，恁嘛有佇遐，恁無給我掠。毋拘這是欲互聖經的話得著應驗。」

50彼時，所有的門徒攏放拺耶穌，逃走。

51有一個少年人啲隨耶穌，身軀只有幔一塊幼麻布。𪜶欲給伊掠，

52毋拘伊給幼麻布放咧，褪腹裼逃走。

53𪜶給耶穌導去大祭司遐；所有的祭司長、長老，及經學教師攏聚集佇遐。

54彼得離遠遠隨耶穌，隨入去大祭司公館的埕，及許個警衛做夥坐啲烘火。

55許個祭司長及全議會一直啲尋證據欲告耶穌，通給伊處死，毋拘尋攏無。

56因為有真多人給耶穌誣告，𪜶的證詞無一致。

57有幾若個人起來給伊誣告，講

58「阮曾聽見伊講：『我欲拆毀此間人的手所起的聖殿，三日內欲閣另外起一間毋是人的手起的。』」

59連此個，𪜶的證詞嘛無一致。

60大祭司佇眾人的面前徛起來，問耶穌：「諸個人啲給你告什麼？你哪攏無答辯？」

61毋拘耶穌恬恬，攏無應半句。大祭司閣問伊講：「你是基督，是應該得著稱讚彼位的子抑毋是？」

62耶穌應講：「我是。恁會看見人子坐佇全能者的正旁，坐天頂的雲來臨。」

63大祭司就拆裂家己的外衫，講：「咱猶需要什麼證人？

64恁已經有聽著伊褻瀆上帝。恁拍算按怎？」𪜶攏判伊有罪，應該處死。

65有一寡人給耶穌呸嘴涎，掩伊的面，用拳頭母給伊掙，閣對伊講：「先知啊，講看覓，啥人給你掙？」警衛給伊掠啲直直搧。

66彼得猶佇大祭司公館下面的埕，有一個大祭司的女婢來。

67伊看著彼得啲烘火，直直給伊相，講：「你嘛攏有啲及彼個拿撒勒人耶穌做夥。」

68彼得毋認，講：「我毋知，嘛聽無你啲講什麼。」伊就出去埕的外面。彼時雞就啼。

69彼個女婢看著伊，閣給徛佇邊仔的人講：「此個人是𪜶彼陣的人。」

70彼得閣再毋認。過無偌久，許個徛佇邊仔的人閣對彼得講：「你確實是𪜶彼陣的人，因為你嘛是加利利人。」

71彼得就咒誓講：「恁啲講彼個人，我毋識。我若講白賊，願上帝責罰我！」

72彼時，雞第二遍啼。彼得想起耶穌給伊講的話「雞啼兩遍以前，你會三遍毋認我」，就出聲哭。