Esther 1

Chinese TTVR (現代台語譯本羅馬字版)

Jump to: Chapter 2 →

1Chit-ê sū hoat-seng tī A-hap-sûi-ló͘ -ông ê sî-tāi. A-hap-sûi-ló͘ tī Su-san ông-kiong chē-ūi, thóng-tī chi̍t-pah jī-cha̍p-chhit séng, tùi Ìn-tō͘ kàu Kó͘-si̍t.

3I chē-ūi tē-saⁿ nî, pān-toh chhiáⁿ só͘-ū ê léng-siù kap jîn-sîn; Pho-su kap Bí-tí-a ê chiòng-léng, kùi-cho̍k, kap ta̍k-séng ê léng-siù lóng lâi chham-ka.

4I ēng chi̍t-pah poeh-cha̍p ji̍t hō͘ in khòaⁿ ông-kok ê hù-jū, kiông-sēng, kap i ke̍k-tōa ê chun-kùi.

5Āu-lâi, ông koh ūi-tio̍h tòa tī Su-san -siâⁿ ê chū-bîn, bô-lūn chun-kùi pi-chiān, tī ông-kiong ê hoe-hn̂g pān-toh chhit ji̍t.

6Hōe-tiûⁿ ū pe̍h-sek, nâ-sek ê pò͘-lî, ēng iù-môa kap chí-sek ê soh pa̍k tī tāi-lí-chio̍h-thiāu ê gûn-khoân; ū kim gûn chòe ê the-í, pâi tī ēng âng, pe̍h, n̂g, o͘ ê chio̍h-á pho͘ ê tōe-bīn.

7Ông kiong-èng chin chōe chiú, ēng ta̍k-chióng bô kâng-khoán ê kim-poe hō͘ lâng lim.

8Ông bēng-lēng kiong-lāi só͘-ū ê jîn-sîn, chiú chhut-chāi lâng lim, m̄-thang hān-chè.

9Ông-hō͘ Hoa-si̍t-tì tī A-hap-sûi-ló͘ -ông ê kiong-lāi mā pān-toh chhiáⁿ hū-lú.

10Kàu tē-chhit ji̍t, ông lim-chiú lim kah chin khoài-lo̍k, chiū bēng-lēng teh sū-hāu i hit chhit ê thài-kàm Bí-hō͘-bān, Pí-su-tha, Hap-pho-ná, Pí-kek-tha, A-poa̍t-tha, Se-ta̍t, kap Kah-ka,

11khì chhiáⁿ ông-hō͘ Hoa-si̍t-tì tì ông-hō͘ ê hoa-koan lâi ông ê bīn-chêng; in-ūi ông-hō͘ chin súi, ông ài-beh kā hiah-ê jîn-bîn kap jîn-sîn tián i ê bí-māu.

12M̄-kú ông-hō͘ Hoa-si̍t-tì m̄-khéng lâi, m̄ chiàu thài-kàm só͘ thoân ông ê bēng-lēng, só͘-í, ông hui-siông siū-khì, sim-lāi chhin-chhiūⁿ hé teh to̍h.

13Ông ū chi̍t ê koàn-lē, koan-hē hoat-lēng kap chhâi-koat ê sū, ōe tāi-seng kap hiah-ê bat sî-sū ū tì-hūi ê lâng chham-siông.

14Hit-sî tī ông ê chó-iū, siông-siông kap i kìⁿ-bīn--ê, ū Pho-su kap Bí-tí-a chhit ê tāi-sîn, Kah-sī-ná, Sī-ta̍t, Ap-má-tha, Tha-si, Bí-le̍k, Má-se-ná, Bí-bō͘-kan.

15Ông mn̄g in kóng, “Ông-hō͘ Hoa-si̍t-tì bô chun-thàn thài-kàm só͘ thoân góa A-hap-sûi-ló͘ -ông ê bēng-lēng, taⁿ chiàu lán ê hoat-lēng tio̍h án-chóaⁿ pān i?”

16Bí-bō͘-kan tī ông kap hiah-ê tāi-sîn ê bīn-chêng hôe-tap kóng, “Ông-hō͘ Hoa-si̍t-tì ê só͘-chòe m̄-nā tek-chōe ông, mā tek-chōe A-hap-sûi-ló͘ -ông ta̍k-séng ê koaⁿ-oân kap só͘-ū ê jîn-bîn;

17in-ūi ông-hō͘ só͘ chòe ê sū, ōe thoân kàu choân-kok ê hū-lú, in ōe kóng, ‘ A-hap-sûi-ló͘ -ông tiàu ông-hō͘ Hoa-si̍t-tì khì ông ê bīn-chêng, m̄-kú i kū-choa̍t.’ Án-ni, in ōe ū-iūⁿ-khòaⁿ-iūⁿ biáu-sī ka-kī ê tiōng-hu.

18Kin-á-ji̍t Pho-su kap Bí-tí-a chèng koaⁿ-oân ê hu-jîn thiaⁿ-tio̍h ông-hō͘ ê só͘-chòe, mā ōe siâng-khoán án-ni tùi-thāi in ê tiōng-hu, chiū ōe ín-khí chin chōe biáu-sī kap siū-khì.

19Ông nā khòaⁿ-chòe thò-tòng, chhiáⁿ hā-lēng siá-chòe Pho-su kap Bí-tí-a bōe-tàng kái-piàn ê hoat-lēng, put-chún Hoa-si̍t-tì koh kìⁿ A-hap-sûi-ló͘ -ông ê bīn; mā chhiáⁿ ông chiong ông-hō͘ ê ūi sù hō͘ pí i khah hó ê lâng.

20Ông ê hoat-lēng chi̍t-ē soan-pò͘, chiah-ni̍h tōa ê kok-ka ta̍k só͘-chāi ê hū-lú, bô-lūn in ê tiōng-hu chun-kùi á-sī pi-chiān, lóng ōe chun-kèng ka-kī ê tiōng-hu.”

21Ông kap hiah-ê tāi-sîn lóng khòaⁿ Bí-bō͘-kan ê ōe chòe thò-tòng; ông chiū chiap-siū i ê kiàn-gī.

22Ông ê chiàu-su ēng ta̍k-séng ê bûn-jī, ta̍k bîn-cho̍k ê gú-giân hoat-pò͘, hō͘ bô-lūn kóng sím-mi̍h gú-giân ê lâng, tiōng-hu tī ke-lāi chòe chú.

Jump to: Chapter 2 →