Esther 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Hit-ji̍t, A-hap-sûi-ló͘ -ông chiong Iû-thài -lâng ê tùi-te̍k Hap-bān ê ka-sán sù hō͘ ông-hō͘ Í-su-thiap. Boa̍t-tí-kái mā lâi tī ông ê bīn-chêng, in-ūi Í-su-thiap í-keng tùi ông kóng, Boa̍t-tí-kái sī i ê chhin-lâng.

2Ông kā tùi Hap-bān the̍h--tńg-lâi ê chhiú-chí, tùi ka-kī ê chhiú pak khí-lâi hō͘ Boa̍t-tí-kái; Í-su-thiap koh úi-jīm Boa̍t-tí-kái koán-lí Hap-bān ê ka-sán.

3Āu-lâi, Í-su-thiap koh khì kìⁿ ông, phak tī i ê kha-chêng, lâu ba̍k-sái kiû ông chó͘-chí A-kah -cho̍k ê Hap-bān bô͘-hāi Iû-thài -lâng ê kè-ōe.

4Ông ǹg Í-su-thiap chhun-chhut i ê kim-koáiⁿ, Í-su-thiap chiū khiā--khí-lâi,

5tùi ông kóng, “Ông nā khòaⁿ-chòe hó, góa nā tit-tio̍h ông ê un-hūi, ông nā khòaⁿ chit-ê sū chòe thò-tòng, góa nā tit-tio̍h ông ê hoaⁿ-hí, khún-kiû ông hā chiàu-su, thiat-siau chêng A-kah -cho̍k Hap-bí-tāi-tha ê kiáⁿ Hap-bān kè-bô͘ beh siau-bia̍t ông ta̍k-séng ê Iû-thài -lâng ê chiàu-su.

6Góa ná ōe jím-sim khòaⁿ ka-kī ê tông-pau siū hām-hāi? Ná ōe jím-sim khòaⁿ ka-kī ê chong-cho̍k siū siau-bia̍t?”

7A-hap-sûi-ló͘ -ông chiū tùi ông-hō͘ Í-su-thiap kap Iû-thài -lâng Boa̍t-tí-kái kóng, “In-ūi Hap-bān bô͘-hāi Iû-thài -lâng, góa í-keng chiong i ê ka-sán sù hō͘ Í-su-thiap, lâng mā chiong Hap-bān tiàu tī chhâ-kè téng.

8Lín thang ēng ông ê miâ chiàu lín khòaⁿ-chòe thò-tòng--ê, siá chiàu-su hō͘ Iû-thài -lâng, ēng ông ê chhiú-chí khàm-ìn. Só͘-ū ēng ông ê miâ siá, koh ēng ông ê chhiú-chí khàm-ìn ê chiàu-su, bô lâng ōe-tàng chhú-siau.”

9Saⁿ--ge̍h, chiū-sī Se-oan-ge̍h jī-cha̍p-saⁿ ji̍t, ông ê su-kì chiàu Boa̍t-tí-kái ê chí-sī, siá chiàu-su kià hō͘ Iû-thài -lâng, mā sàng hō͘ tùi Ìn-tō͘ kàu Kó͘-si̍t, kiōng chi̍t-pah jī-cha̍p-chhit séng ê chóng-tok, séng-tiúⁿ, kap jîn-sîn, ēng ta̍k-séng ê bûn-jī kap ta̍k-cho̍k ê gú-giân lâi siá; kià hō͘ Iû-thài -lâng--ê mā chiàu in ê bûn-jī kap gú-giân siá.

10Boa̍t-tí-kái ēng A-hap-sûi-ló͘ -ông ê bêng-gī siá chiàu-su, ēng ông ê chhiú-chí khàm-ìn, chiong hit-ê chiàu-su kau hō͘ sàng-bûn-su--ê, khiâ hông-ka khoài-má sàng kàu ta̍k só͘-chāi.

11Tī chiàu-su ê lāi-bīn, ông ún-chún ta̍k-ê siâⁿ ê Iû-thài -lâng chū-chi̍p, khí-lâi pó-hō͘ in ka-kī ê sìⁿ-miā; ta̍k-séng ta̍k-cho̍k nā ū kun-peng beh kong-kek in, in thang hoán-kek, sat-hāi, siau-bia̍t hiah-ê lâng, mā thang thâi-sí in ê gín-á kap hū-jîn-lâng, koh chhiúⁿ in ê châi-sán;

12tī A-hap-sûi-ló͘ -ông ê ta̍k-séng, Iû-thài -lâng tī cha̍p-jī--ge̍h, chiū-sī A-ta̍t-ge̍h cha̍p-saⁿ ji̍t hit-ji̍t ōe-tàng án-ni chòe.

13Chiàu-su ê chhau-pún chiâⁿ-chòe hoat-lēng, tùi ta̍k-séng, ta̍k-cho̍k pan-pò͘, thang hō͘ Iû-thài -lâng chún-pī, thèng-hāu hit-ji̍t, tùi in ê tùi-te̍k pò-siû.

14Hiah-ê sàng-bûn-su--ê hōng ông ê bēng-lēng kóaⁿ-kín khiâ hông-ka khoài-má chhut--khì; chit-ê chiàu-su mā tī Su-san -siâⁿ pan-pò͘.

15Boa̍t-tí-kái chhēng nâ-sek pe̍h-sek ê tiâu-ho̍k, tì tōa-téng ê kim koan-bián, chhēng chí-sek iù-môa-pò͘ ê gōa-phàu, tùi ông ê bīn-chêng chhut--lâi. Su-san -siâⁿ chhiong-móa hoaⁿ-hí khoài-lo̍k ê siaⁿ.

16Tùi Iû-thài -lâng lâi kóng, che sī kng-bêng, hoaⁿ-hí, khoài-lo̍k, chun-kùi ê sū.

17Ông ê chiàu-su kap bēng-lēng sàng kàu ê ta̍k-séng ta̍k-siâⁿ, Iû-thài -lâng lóng hoaⁿ-hí khoài-lo̍k, pān-toh khèng-chiok, tēng hit-ji̍t chòe choeh-ji̍t. Ta̍k só͘-chāi ū chin chōe lâng in-ūi kiaⁿ Iû-thài -lâng, chiū kái-chong chòe Iû-thài -lâng.

← Chapter 7 Jump to: Chapter 9 →