Mark 14 — Chinese TTVR (現代台語譯本羅馬字版)

1Koh nn̄g ji̍t chiū-sī Pôaⁿ-kè-choeh kap Tû-kàⁿ-choeh. Chè-si-tiúⁿ kap keng-ha̍k-kàu-su teh chhē-khòaⁿ beh ēng sím-mi̍h kè-bô͘ thang lia̍h Iâ-so͘, kā I hāi-sí;

2put-kò in kóng, “M̄-thang tī choeh-kî tiong, kiaⁿ-liáu bîn-chiòng khí pō-tōng.”

3Iâ-so͘ tī Pek-tāi-nî bâ-hong pīⁿ-lâng Se-bûn ê chhù teh chē-toh chia̍h-pn̄g ê sî, ū chi̍t ê hū-jîn-lâng lâi, the̍h chi̍t koàn ge̍k-pân, lāi-bīn tóe-móa sûn koh kùi ê Ná-ta̍t phang-iû. I kòng-phòa ge̍k-pân, chiong phang-iû tò tī Iâ-so͘ ê thâu-khak téng.

4Ū chi̍t-kóa lâng chin siū-khì, hō͘-siōng gī-lūn kóng, “Ná tio̍h án-ni lōng-hùi phang-iû?

5Chit-koàn phang-iû ōe-tàng bōe saⁿ-pah gōa ê gûn lâi kiù-chè sàn-chhiah-lâng!” In chiū kā i chek-pī.

6M̄-kú Iâ-so͘ kóng, “M̄-thang kā i tòng! Ná beh kā i tiau-lân? I ū ūi-tio̍h góa chòe chi̍t hāng hó-sū.

7Put-sî ū sàn-chhiah-lâng kap lín chòe-hé, lín nā beh, put-koán-sî to ōe-tàng pang-chān in; put-kò góa bōe put-sî kap lín chòe-hé.

8Chit-ê hū-jîn-lâng í-keng chīn-la̍t chòe lah; i seng ēng phang-iû boah góa ê seng-khu chún-pī góa ê bâi-chòng.

9Góa si̍t-chāi kā lín kóng, chit-ê hok-im bô-lūn thoân kàu choân sè-kài sím-mi̍h só͘-chāi, lâng lóng ōe kóng-khí chit-ê hū-jîn-lâng só͘ chòe ê tāi-chì lâi kì-liām i.”

10Cha̍p-jī sù-tô͘ ê chi̍t ê, Í-su-ka-lio̍k ê Iû-tāi, khì kìⁿ hiah-ê chè-si-tiúⁿ, beh chiong Iâ-so͘ chhut-bōe hō͘ in.

11In thiaⁿ--tio̍h chin hoaⁿ-hí, tah-èng beh chîⁿ hō͘ i. Iû-tāi chiū it-ti̍t teh chhē ki-hōe, khòaⁿ beh án-chóaⁿ thang chhut-bōe Iâ-so͘.

12Tû-kàⁿ-choeh ê thâu chi̍t ji̍t, chiū-sī thâi Pôaⁿ-kè-choeh ê iûⁿ-ko hit-ji̍t, bûn-tô͘ lâi mn̄g Iâ-so͘, “Lí ài goán khì tó-ūi kā lí chún-pī chia̍h Pôaⁿ-kè-choeh ê boán-chhan?”

13Iâ-so͘ chhe nn̄g ê bûn-tô͘, hoan-hù in kóng, “Lín ji̍p-khì siâⁿ-lāi, ōe tú-tio̍h chi̍t ê the̍h chúi-pân ê ta-po͘-lâng, lín tè i khì.

14I bô-lūn ji̍p-khì tó chi̍t keng chhù, lín tio̍h kā hit-ke ê chú-lâng kóng, ‘Lāu-su teh mn̄g, I kap i ê bûn-tô͘ beh chia̍h Pôaⁿ-kè-choeh boán-chhan ê kheh-thiaⁿ tī tó-ūi?’

15I ōe pò lín khòaⁿ lâu-téng chi̍t keng khoán hó-sè ê tōa-thiaⁿ, lín chiū tī hia ūi-tio̍h lán chún-pī.”

16Hit nn̄g ê bûn-tô͘ chiū chhut--khì, kàu siâⁿ-lāi, khòaⁿ-tio̍h ta̍k-hāng kap Iâ-so͘ kā in kóng--ê lóng siâng-khoán; in chiū tī hia chún-pī Pôaⁿ-kè-choeh ê boán-chhan.

17Hông-hun ê sî, Iâ-so͘ kap cha̍p-jī sù-tô͘ chòe-hé lâi.

18In teh chia̍h-pn̄g ê sî, Iâ-so͘ kóng, “Góa si̍t-chāi kā lín kóng, lín chiah-ê kap góa chòe-hé teh chia̍h ê lâng tiong-kan, ū chi̍t ê beh kā góa chhut-bōe.”

19In chin siong-sim, chi̍t-ê chi̍t-ê kā I mn̄g, “M̄-sī góa ho͘hⁿ?”

20Iâ-so͘ kā in kóng, “Sī lín cha̍p-jī lâng tiong ê chi̍t ê, chiū-sī the̍h piáⁿ kap góa tī pôaⁿ--ni̍h teh ùn hit-ê.

21Chiàu Sèng-keng só͘ kì-chài, Jîn-chú ōe siū hāi, put-kò chhut-bōe Jîn-chú hit-ê lâng chhám ah! Hit-ê lâng lêng-khó bô chhut-sì khah hó!”

22In teh chia̍h ê sî, Iâ-so͘ the̍h piáⁿ, kám-siā liáu-āu peh-khui, pun hō͘ bûn-tô͘, kóng, “The̍h--khì; che sī góa ê seng-khu.”

23Āu-lâi I phâng-poe, kám-siā liáu-āu the̍h hō͘ bûn-tô͘, in chiū lóng lim hit-poe.

24Iâ-so͘ kā in kóng, “Che sī góa ê huih, sī li̍p-iok ê huih, ūi-tio̍h chin chōe lâng lâu-chhut--ê.

25Góa si̍t-chāi kā lín kóng, tī Siōng-tè-kok lim sin ê phû-tô-chiú hit-ji̍t í-chêng, góa choa̍t-tùi bōe koh lim chit-ê chiú.”

26In gîm-si liáu-āu chiū chhut--khì, khì Kaⁿ-ná-soaⁿ.

27Iâ-so͘ kā in kóng, “Lín lóng ōe pàng-sak góa, in-ūi Sèng-keng ū kì-chài: Góa beh phah bo̍k-chiá, iûⁿ chiū sì-sòaⁿ.

28Put-kò góa koh-oa̍h í-āu ōe pí lín seng khì Ka-lī-lī.”

29Pí-tek kā Iâ-so͘ kóng, “Chèng-lâng nā lóng pàng-sak lí, góa it-tēng bōe!”

30Iâ-so͘ kā Pí-tek kóng, “Góa si̍t-chāi kā lí kóng, kin-á-ji̍t, chiū-sī kim-mî, koe thî nn̄g piàn í-chêng, lí ōe saⁿ piàn m̄ jīn góa.”

31M̄-kú Pí-tek kian-chhî kóng, “Nā it-tēng tio̍h kap lí chòe-hé sí, góa mā choa̍t-tùi bōe m̄ jīn lí!” Kî-tha ê lâng mā lóng án-ni kóng.

32Iâ-so͘ kap bûn-tô͘ lâi kàu chi̍t ê só͘-chāi, kiò-chòe Khek-se-má-nî. I kā bûn-tô͘ kóng, “Góa khì kî-tó, lín tiàm chia chē.”

33I chiū chhōa Pí-tek, Ngá-kok, Iok-hān chòe-hé khì. I chin kiaⁿ-hiâⁿ, hui-siông thòng-khó͘,

34tùi in kóng, “Góa sim iu-siong kàu beh sí, lín tiàm chia, tio̍h kéng-séng!”

35Iâ-so͘ kiâⁿ khah chìn-chêng, phak tī thô͘-kha kî-kiû, khòaⁿ ōe-tàng hō͘ I bián keng-kè chit-ê thòng-khó͘ ê sî-kan bōe.

36I kiû kóng, “A-pa Pē ah, lí ta̍k-hāng lóng ōe. Chit-ê poe kiû lí kā góa the̍h-khui, m̄-kú m̄-sī chiàu góa ê ì-sù, tio̍h chiàu lí ê chí-ì si̍t-hiān.”

37Āu-lâi Iâ-so͘ tńg--lâi, khòaⁿ-tio̍h bûn-tô͘ teh khùn, chiū kā Pí-tek kóng, “ Se-bûn, lí teh khùn o͘h? Lí bōe-tàng kéng-séng chi̍t tiám-cheng kú sī--bô?

38Tio̍h kéng-séng, tio̍h kî-tó, chiah bōe hām-lo̍h iú-he̍k. Lín sui-jiân sim chin ì-ài, m̄-kú jio̍k-thé loán-jio̍k.”

39Iâ-so͘ koh khì kî-tó, mā-sī kóng siâng-khoán ê ōe.

40I koh tńg--lâi, khòaⁿ-tio̍h in in-ūi ba̍k-chiu chin siap iáu-teh khùn; in m̄ chai beh kā Iâ-so͘ ìn sím-mi̍h.

41Iâ-so͘ tē-saⁿ piàn tńg--lâi, tùi in kóng, “Lín iáu-teh khùn, iáu-teh hioh-khùn o͘h? Kàu-gia̍h lah! Sî-kan í-keng kàu; lín khòaⁿ, Jîn-chú siū chhut-bōe kau tī chōe-jîn ê chhiú-thâu lah.

42Khí--lâi, lán lâi-khì. Lín khòaⁿ, chhut-bōe góa ê lâng lâi lah.”

43Iâ-so͘ iáu-teh kóng ê sî, cha̍p-jī sù-tô͘ ê chi̍t ê — Iû-tāi sûi-sî lâi, chè-si-tiúⁿ, keng-ha̍k-kàu-su, kap tiúⁿ-ló phài--lâi ê chi̍t tīn lâng gia̍h to gia̍h kùn kap i tàu-tīn lâi.

44Chhut-bōe Iâ-so͘ hit-ê lâng ū hō͘ in chi̍t ê àm-hō, kóng, “Góa kā I chim hit-ê chiū-sī; lín kā lia̍h, giâm-bi̍t khàn-siú, kā I ah--khì.”

45Iû-tāi chi̍t-ē kàu, sûi-sî kiâⁿ-óa Iâ-so͘, kiò “Lia̍p-pí”, chiū kā I chim,

46in chiū hē-chhiú lia̍h Iâ-so͘.

47Ū chi̍t ê khiā tī piⁿ--á ê lâng pu̍ih to tùi tōa-chè-si ê po̍k-jîn phut--lo̍h-khì, kā i chi̍t pêng ê hī-á siah--khí-lâi.

48Iâ-so͘ kā in kóng, “Lín gia̍h to gia̍h kùn chhut-lâi lia̍h góa, sī beh lia̍h kiông-tō sī--bô?

49Góa ta̍k-ji̍t tī Sèng-tiān teh kà-sī lâng, lín mā ū tī hia, lín bô kā góa lia̍h. M̄-kú che sī beh hō͘ Sèng-keng ê ōe tit-tio̍h èng-giām.”

50Hit-sî, só͘-ū ê bûn-tô͘ lóng pàng-sak Iâ-so͘, tô-cháu.

51Ū chi̍t ê siàu-liân-lâng teh tè Iâ-so͘, seng-khu chí-ū moa chi̍t tè iù-môa-pò͘. In beh kā i lia̍h,

52m̄-kú i kā iù-môa-pò͘ pàng--leh, thǹg-pak-theh tô-cháu.

53In kā Iâ-so͘ chhōa-khì tōa-chè-si hia; só͘-ū ê chè-si-tiúⁿ, tiúⁿ-ló, kap keng-ha̍k-kàu-su lóng chū-chi̍p tī hia.

54Pí-tek lī hn̄g-hn̄g tè Iâ-so͘, tè ji̍p-khì tōa-chè-si kong-koán ê tiâⁿ, kap hiah-ê kéng-ōe chòe-hé chē-teh hang-hé.

55Hiah-ê chè-si-tiúⁿ kap choân gī-hōe it-ti̍t teh chhē chèng-kù beh kò Iâ-so͘, thang kā I chhú-sí, m̄-kú chhē lóng bô.

56In-ūi ū chin chōe lâng kā Iâ-so͘ bû-kò, in ê chèng-sû bô it-tì.

57Ū kúi-nā ê lâng khí-lâi kā I bû-kò, kóng

58“Goán bat thiaⁿ-kìⁿ I kóng, ‘Góa beh thiah-húi chit-keng lâng ê chhiú só͘ khí ê Sèng-tiān, saⁿ ji̍t lāi beh koh lēng-gōa khí chi̍t keng m̄-sī lâng ê chhiú khí--ê.’”

59Liân chit-ê, in ê chèng-sû mā bô it-tì.

60Tōa-chè-si tī chèng-lâng ê bīn-chêng khiā--khí-lâi, mn̄g Iâ-so͘, “Chiah-ê lâng teh kā lí kò sím-mi̍h? Lí ná lóng bô tap-piān?”

61M̄-kú Iâ-so͘ tiām-tiām, lóng bô ìn pòaⁿ-kù. Tōa-chè-si koh mn̄g I kóng, “Lí sī Ki-tok, sī eng-kai tit-tio̍h chheng-chàn Hit-ūi ê Kiáⁿ á m̄-sī?”

62Iâ-so͘ ìn kóng, “Góa sī. Lín ōe khòaⁿ-kìⁿ Jîn-chú chē tī Choân-lêng-chiá ê chiàⁿ-pêng, chē thiⁿ-téng ê hûn lâi-lîm.”

63Tōa-chè-si chiū thiah-li̍h ka-kī ê gōa-saⁿ, kóng, “Lán iáu su-iàu sím-mi̍h chèng-jîn?

64Lín í-keng ū thiaⁿ-tio̍h I siat-to̍k Siōng-tè. Lín phah-sǹg án-chóaⁿ?” In lóng phòaⁿ I ū-chōe, eng-kai chhú-sí.

65Ū chi̍t-kóa lâng kā Iâ-so͘ phùi chhùi-nōa, ng I ê bīn, ēng kûn-thâu-bú kā I cheng, koh tùi I kóng, “Sian-ti ah, kóng khòaⁿ-bāi, siáⁿ-lâng kā lí cheng?” Kéng-ōe kā I lia̍h-teh ti̍t-ti̍t siàn.

66Pí-tek iáu tī tōa-chè-si kong-koán ē-bīn ê tiâⁿ, ū chi̍t ê tōa-chè-si ê lú-pī lâi.

67I khòaⁿ-tio̍h Pí-tek teh hang-hé, ti̍t-ti̍t kā i siòng, kóng, “Lí mā lóng ū teh kap hit-ê Ná-sat-le̍k -lâng Iâ-so͘ chòe-hé.”

68Pí-tek m̄ jīn, kóng, “Góa m̄ chai, mā thiaⁿ bô lí teh kóng sím-mi̍h.” I chiū chhut-khì tiâⁿ ê gōa-bīn. Hit-sî koe chiū thî.

69Hit-ê lú-pī khòaⁿ-tio̍h i, koh kā khiā tī piⁿ--á ê lâng kóng, “Chit-ê lâng sī in hit-tīn ê lâng.”

70Pí-tek koh-chài m̄ jīn. Kè bô jōa kú, hiah-ê khiā tī piⁿ--á ê lâng koh tùi Pí-tek kóng, “Lí khak-si̍t sī in hit-tīn ê lâng, in-ūi lí mā-sī Ka-lī-lī -lâng.”

71Pí-tek chiū chiù-chōa kóng, “Lín teh kóng hit-ê lâng, góa m̄ bat. Góa nā kóng pe̍h-chha̍t, goān Siōng-tè chek-hoa̍t góa!”

72Hit-sî, koe tē-jī piàn thî. Pí-tek siūⁿ-khí Iâ-so͘ kā i kóng ê ōe “Koe thî nn̄g piàn í-chêng, lí ōe saⁿ piàn m̄ jīn góa”, chiū chhut-siaⁿ khàu.