Matthew 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1“Thian-kok chhin-chhiūⁿ chi̍t ê hn̂g-chú thàu-chá chhut-khì chhiàⁿ kang-lâng lâi i ê phû-tô-hn̂g chòe kang.

2I kap kang-lâng iok-tēng chi̍t ji̍t chi̍t ê gûn, chiū chhe in khì phû-tô-hn̂g chòe kang.

3Chá-khí-sî káu tiám chó-iū i koh chhut--khì, khòaⁿ-tio̍h ū chi̍t-kóa lâng tī chhī-tiûⁿ-kháu teh khiā, bô tāi-chì chòe,

4chiū tùi in kóng, ‘Lín mā khì phû-tô-hn̂g chòe kang, góa ōe hō͘ lín kong-tō ê kang-chîⁿ.’

5In chiū khì. Tiong-tàu cha̍p-jī tiám kap ē-po͘ saⁿ tiám chó-iū i koh chhut--khì, mā án-ni chòe.

6Ē-po͘ gō͘ tiám, i koh chhut--khì, khòaⁿ-tio̍h ū chi̍t-kóa lâng khiā tī hia, chiū tùi in kóng, ‘Lín ná kui-ji̍t khiā tī chia, bô tāi-chì chòe?’

7In kā i kóng, ‘In-ūi bô lâng chhiàⁿ goán.’ Chú-lâng kā in kóng, ‘Lín mā khì phû-tô-hn̂g chòe kang.’

8“Hông-hun ê sî, hn̂g-chú kā i ê koán-ke kóng, ‘Lí khì kiò kang-lâng lâi, hoat kang-chîⁿ hō͘ in, tùi lō͘-bé lâi--ê seng hoat, jiân-āu chiah hoat hō͘ tāi-seng lâi--ê.’

9Hiah-ê ē-po͘ gō͘ tiám chiah lâi--ê, ta̍k-ê lâng niá-tio̍h chi̍t ê gûn.

10Tāi-seng lâi choh-kang ê lâng siūⁿ-kóng ka-kī ōe niá khah chōe, m̄-kú ta̍k-ê lâng mā chí-ū niá chi̍t ê gûn.

11In niá liáu, tùi chú-lâng bâi-oàn,

12kóng, ‘Chiah-ê chòe-āu lâi ê lâng chí-ū chòe chi̍t tiám-cheng nā-tiāⁿ, goán hō͘ ji̍t-thâu pha̍k kui-ji̍t, lô-khó͘ kang-chok, lí kèng-jiân hō͘ in kap goán niá pîⁿ chōe!’

13Chú-lâng ìn kî-tiong chi̍t ê lâng kóng, ‘Pêng-iú, góa tùi lí m̄-sī bô kong-tō. Lí kiám m̄-sī kap góa iok-tēng chi̍t ji̍t chi̍t ê gûn?

14The̍h lí ê kang-chîⁿ, tńg--khì! Góa beh hō͘ siōng-bé lâi--ê kap lí niá pîⁿ chōe.

15Góa ēng ka-kī ê mi̍h chòe góa ài chòe--ê kiám bōe-ēng--tit? Góa khóng-khài, lí teh ba̍k-kháng-chhiah sī--bô?’

16“Án-ni, siōng lō͘-bé--ê ōe chòe tē-it; tē-it--ê ōe chòe siōng lō͘-bé.”

17Iâ-so͘ tī chiūⁿ Iâ-lō͘-sat-léng ê lō͘-tiong kiò cha̍p-jī ê bûn-tô͘ lâi, su-hā tùi in kóng,

18“Taⁿ lán beh chiūⁿ Iâ-lō͘-sat-léng, Jîn-chú ōe siū chhut-bōe hō͘ chè-si-tiúⁿ kap keng-ha̍k-kàu-su. In ōe kā I tēng sí-chōe,

19āu-lâi chiong I kau hō͘ Gōa-pang-lâng, kā I hì-lāng, piⁿ-phah, tèng si̍p-jī-kè; tē-saⁿ ji̍t Siōng-tè ōe hō͘ I koh-oa̍h.”

20Hit-sî, Se-pì-thài ê bó͘ chhōa i nn̄g ê kiáⁿ lâi kìⁿ Iâ-so͘, kūi lo̍h-khì I bīn-chêng, kiû chi̍t hāng tāi-chì.

21Iâ-so͘ mn̄g i kóng, “Lí ài sím-mi̍h?” I ìn kóng, “Lí choh-ông ê sî, chhiáⁿ lí hō͘ góa chit nn̄g ê kiáⁿ chi̍t ê chē lí ê chiàⁿ-pêng, chi̍t ê chē lí ê tò-pêng.”

22Iâ-so͘ kóng, “Lín m̄ chai ka-kī teh kiû sím-mi̍h. Góa teh-beh lim ê poe, lín ōe-tàng lim bōe?” In kóng, “Goán ōe.”

23Iâ-so͘ kā in kóng, “Góa ê poe lín beh lim, put-kò chē góa ê chiàⁿ-pêng tò-pêng m̄-sī góa ōe-tàng hō͘ lâng--ê. Góa ê Pē ūi-tio̍h sím-mi̍h-lâng chún-pī chiū hō͘ hit-ê lâng.”

24Kî-tha hit cha̍p ê bûn-tô͘ thiaⁿ--tio̍h, chiū tùi hit nn̄g ê hiaⁿ-tī siū-khì.

25Iâ-so͘ kiò in lâi, kā in kóng, “Lín chai Gōa-pang-lâng ū thóng-tī-chiá teh kā in koán-hat, ū léng-siù teh kā in chi-phòe.

26Lín tiong-kan chiū m̄ eng-kai án-ni. Lín tiong-kan ài chòe tōa--ê tio̍h chòe lín ê chhe-ēng;

27ài chòe tē-it--ê, tio̍h chòe lín ê po̍k-jîn;

28tú chhin-chhiūⁿ Jîn-chú lâi, m̄-sī beh hō͘ lâng ho̍k-sāi, hoán-tńg sī beh kā lâng ho̍k-sāi, sīm-chì hi-seng ka-kī ê sìⁿ-miā lâi sio̍k-hôe chin chōe lâng.”

29In lī-khui Iâ-lī-ko ê sî, ū chi̍t tōa-kûn lâng tè Iâ-so͘ khì.

30Tú ū nn̄g ê bông-jîn chē tī lō͘-piⁿ, thiaⁿ-tio̍h Iâ-so͘ tùi hia keng-kè, chiū tōa-siaⁿ hoah, “ Tāi-pi̍t ê Kiáⁿ, lîn-bín goán!”

31Kûn-chiòng kā in chek-pī, kiò in tiām-tiām, m̄-kú in koh-khah tōa-siaⁿ hoah, “Chú — Tāi-pi̍t ê Kiáⁿ, lîn-bín goán!”

32Iâ-so͘ thêng-kha, kiò in, kóng, “Lín ài góa kā lín chòe sím-mi̍h?”

33In kóng, “Chú ah, goán ài ba̍k-chiu ōe khòaⁿ--kìⁿ.”

34Iâ-so͘ khó-lîn in, bong in ê ba̍k-chiu, in sûi-sî koh ōe khòaⁿ--kìⁿ, chiū tè I khì.

← Chapter 19 Jump to: Chapter 21 →