Matthew 22

Chinese TTVR (現代台語譯本羅馬字版)

← Chapter 21 Jump to: Chapter 23 →

1Iâ-so͘ koh ēng phì-jū kā in kóng:

2“Thian-kok thang phì-jū chòe chi̍t ê kok-ông kā i ê kiáⁿ pān hun-iàn.

3I chhe po̍k-jîn khì kiò só͘ chhiáⁿ ê lâng-kheh lâi hù hun-iàn, put-kò in m̄ lâi.

4Kok-ông koh chhe kî-tha ê po̍k-jîn, kā in kóng, ‘Lín khì kā hiah-ê siū iau-chhiáⁿ ê lâng kóng, góa ê iàn-se̍k í-keng chún-pī hó-sè; góa ê gû kap pûi ê gû-á-kiáⁿ mā í-keng thâi, it-chhè lóng chún-pī hó-sè lah, chhiáⁿ lín lâi hù hun-iàn.’

5M̄-kú hiah-ê siū iau-chhiáⁿ ê lâng bô khòaⁿ-chòe iàu-kín, chòe in khì; chi̍t ê khì hn̂g--ni̍h chòe kang; chi̍t ê khì chòe seng-lí;

6kî-tha--ê lia̍h i ê po̍k-jîn, kā in lêng-jio̍k, sòa kā in thâi-sí.

7Kok-ông hui-siông siū-khì, chiū phài peng khì châu-bia̍t hiah-ê hiong-siú, pàng-hé sio in ê siâⁿ.

8Jiân-āu i kā po̍k-jîn kóng, ‘Hun-iàn chún-pī hó lah, m̄-kú só͘ iau-chhiáⁿ--ê lóng put-phòe hō͘ lán chhiáⁿ.

9Só͘-í, lín khì koe-lō͘-kháu, tú--tio̍h ê lâng lóng kā in chhiáⁿ-lâi hù hun-iàn.’

10Hiah-ê po̍k-jîn chiū chhut-khì koe--ni̍h, tú--tio̍h-ê bô-lūn hó-lâng pháiⁿ-lâng lóng kā in chhiáⁿ--lâi; hun-iàn ê só͘-chāi lâng-kheh chiū chē kàu móa-móa.

11“Kok-ông ji̍p--lâi khòaⁿ hiah-ê lâng-kheh, khòaⁿ-tio̍h tī hia ū chi̍t ê lâng bô chhēng hun-iàn ê lé-ho̍k,

12chiū kā i mn̄g, ‘Pêng-iú ah, lí ji̍p-lâi chia ná bô chhēng hun-iàn ê lé-ho̍k?’ Hit-ê lâng lóng bô ìn.

13Kok-ông chiū tùi chhe-ēng--ê kóng, ‘Kha-chhiú kā pa̍k--khí-lâi, kā i hiat chhut-khì gōa-bīn o͘-àm ê só͘-chāi. Tī hia, i ōe thî-khàu, kā-gê-chhiat-chhí.’

14“Siū ho͘-tiàu--ê chin chōe, m̄-kú siū kéng-soán--ê chin chió.”

15Hoat-lī-sài-phài ê lâng chhut--khì, chòe-hé chham-siông beh án-chóaⁿ lia̍h Iâ-so͘ ê ōe-phāng thang kā I hām-hāi.

16In chhe ka-kī ê bûn-tô͘ kap Hi-lu̍t-tóng ê lâng khì Iâ-so͘ hia, tùi I kóng, “Lāu-su, goán chai lí chin sêng-si̍t, chiàu-si̍t chiong Siōng-tè ê tō-lí kà-sī lâng, bô-lūn sím-mi̍h khoán lâng, lí tùi-thāi in lóng bô chha-pia̍t.

17La̍p-sè hō͘ Lô-má hông-tè Khái-sat ū ha̍h Lu̍t-hoat bô? Chhiáⁿ kā goán kóng lí ê siūⁿ-hoat siáⁿ-khoán.”

18Iâ-so͘ chai-iáⁿ in ê ok-ì, chiū tùi in kóng, “Ké-hó ê lâng, sī-án-chóaⁿ beh kā góa chhì-thàm?

19The̍h chi̍t ê la̍p-sè ê gûn-pè hō͘ góa khòaⁿ.” In chiū the̍h chi̍t ê gûn-pè hō͘ I.

20Iâ-so͘ mn̄g in, “Che sī sím-mi̍h-lâng ê siōng, sím-mi̍h-lâng ê jī-hō?”

21In kóng, “Khái-sat ê.” Iâ-so͘ chiū kā in kóng, “Án-ni, Khái-sat ê mi̍h hō͘ Khái-sat; Siōng-tè ê mi̍h hō͘ Siōng-tè.”

22In thiaⁿ-liáu chin tio̍h-kiaⁿ, chiū lī-khui.

23Siâng hit-ji̍t, chi̍t-kóa chú-tiuⁿ bô koh-oa̍h ê Sat-to͘-kai-phài ê lâng lâi Iâ-so͘ hia, mn̄g I kóng,

24“Lāu-su, Mô͘-se kóng, ‘Ū lâng bô siⁿ-kiáⁿ chiū sí--khì, sió-tī tio̍h chhōa hiaⁿ-só thòe hiaⁿ-ko thoân-chong-chiap-tāi.’

25Í-chêng goán chia bat ū chhit ê hiaⁿ-tī; siōng-tōa--ê kiat-hun, bô lâu hō͘-tāi chiū sí--khì, pàng bó͘ hō͘ sió-tī.

26Tē-jī--ê, tē-saⁿ--ê, kàu tē-chhit--ê lóng siâng-khoán.

27In lóng sí liáu-āu, hit-ê hū-jîn-lâng mā sí--khì.

28Án-ni, koh-oa̍h ê sî, chit-ê hū-jîn-lâng sī chit chhit ê lâng tiong-kan tó chi̍t ê ê bó͘? In-ūi in lóng bat chhōa i.”

29Iâ-so͘ ìn kóng, “Lín m̄-tio̍h. Lín m̄ bat Sèng-keng, mā m̄ bat Siōng-tè ê koân-lêng.

30In-ūi koh-oa̍h ê sî, in kap thiⁿ-téng ê thiⁿ-sài siâng-khoán, bô kè bô chhōa.

31Koan-hē sí-lâng koh-oa̍h ê sū, lín kiám bô tha̍k-tio̍h Siōng-tè tùi lín kóng ê ōe:

32‘Góa chiū-sī A-pek-la-hán ê Siōng-tè, Í-sat ê Siōng-tè, Ngá-kok ê Siōng-tè’? I m̄-sī sí-lâng ê Siōng-tè, sī oa̍h-lâng ê Siōng-tè.”

33Kûn-chiòng chi̍t-ē thiaⁿ--tio̍h, tùi I ê kà-sī kám-kak chin tio̍h-kiaⁿ.

34Hoat-lī-sài-phài ê lâng thiaⁿ-tio̍h Iâ-so͘ hō͘ Sat-to͘-kai-phài ê lâng bô ōe thang ìn, chiū chū-chi̍p chòe-hé.

35Kî-tiong ū chi̍t ê lu̍t-hoat-kàu-su lâi mn̄g chi̍t ê būn-tôe, beh kā I chhì-thàm, kóng,

36“Lāu-su, Mô͘-se ê Lu̍t-hoat tó chi̍t tiâu sī siōng-tōa ê kài-bēng?”

37Iâ-so͘ ìn kóng, “Lí tio̍h choân-sim, choân-chêng, choân-ì thiàⁿ Chú — lí ê Siōng-tè.

38Che sī siōng-tōa koh tē-it ê kài-bēng.

39Tē-jī ê mā siâng-khoán: Tio̍h thiàⁿ chhù-piⁿ chhin-chhiūⁿ thiàⁿ ka-kī.

40Choân-pō͘ Lu̍t-hoat kap sian-ti ê kà-sī lóng ēng chit nn̄g tiâu chòe kun-kù.”

41Hoat-lī-sài-phài ê lâng chū-chi̍p ê sî, Iâ-so͘ mn̄g in,

42“Koan-hē Ki-tok, I sī sím-mi̍h-lâng ê hō͘-tāi, lín siūⁿ án-chóaⁿ?” In kóng, “I sī Tāi-pi̍t ê hō͘-tāi.”

43Iâ-so͘ tùi in kóng, “Nā-sī án-ni, sī-án-chóaⁿ Tāi-pi̍t siū Sèng Sîn kám-tōng ê sî chheng Ki-tok chòe Chú, kóng:

44Chú kā góa ê Chú kóng: Lí chē góa ê chiàⁿ-pêng, kàu góa hō͘ lí ê tùi-te̍k khut-ho̍k tī lí kha-ē.

45Kì-jiân Tāi-pi̍t chheng-ho͘ Ki-tok chòe ‘Chú’, Ki-tok ná ōe sī Tāi-pi̍t ê hō͘-tāi?”

46Bô lâng ōe-tàng hôe-tap pòaⁿ-kù. Tùi hit-ji̍t khí, bô lâng káⁿ koh kā I mn̄g sím-mi̍h būn-tôe.

← Chapter 21 Jump to: Chapter 23 →