Matthew 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Iâ-so͘ tùi soaⁿ-téng lo̍h--lâi ê sî, ū kui tōa-tīn ê lâng tè I.

2Tú hit-sî, ū chi̍t ê bâ-hong pīⁿ-lâng kiâⁿ óa--lâi, kūi lo̍h-khì I ê bīn-chêng, kóng, “Chú ah, lí nā khéng, ōe-tàng hō͘ góa chheng-khì.”

3Iâ-so͘ chhun-chhiú kā i bong, kóng, “Góa khéng, hō͘ lí chheng-khì!” I ê bâ-hong-pīⁿ sûi-sî chheng-khì.

4Iâ-so͘ kā i kóng, “Tio̍h chù-ì, lóng m̄-thang kā lâng kóng. Put-kò tio̍h khì hō͘ chè-si giām, koh chiàu Mô͘-se ê kui-tēng hiàn lé-mi̍h, thang tùi chèng-lâng chèng-bêng.”

5Iâ-so͘ ji̍p-khì Ka-pek-lông ê sî, ū chi̍t ê Lô-má kun-koaⁿ kiâⁿ óa-lâi kā I khún-kiû,

6kóng, “Chú ah, góa ê po̍k-jîn poàn-sin-put-sūi tó tī chhù-lāi, hui-siông kan-khó͘.”

7Iâ-so͘ kā i kóng, “Góa lâi-khì kā i i-tī.”

8Kun-koaⁿ ìn kóng, “Chú ah, lí lâi goán tau, góa bōe-kham--tit. Lí kan-ta kóng chi̍t kù ōe, góa ê po̍k-jîn chiū ōe hó.

9In-ūi góa sī hō͘ lâng koán ê lâng, mā ū peng hō͘ góa koán. Góa kā chit-ê kóng ‘Khì’, i chiū khì; kā pa̍t-ê kóng ‘Lâi’, i chiū lâi; kā góa ê po̍k-jîn kóng ‘Lí chòe chit-ê’, i chiū khì chòe.”

10Iâ-so͘ thiaⁿ-liáu kám-kak chin ì-gōa, chiū tùi hiah-ê tè I ê lâng kóng, “Góa si̍t-chāi kā lín kóng, liân tī Í-sek-lia̍t -lâng ê tiong-kan, góa to iáu m̄-bat khòaⁿ-tio̍h chit-khoán ê sìn-sim.

11Góa kā lín kóng, ū chin chōe lâng ōe tùi tang tùi sai lâi kap A-pek-la-hán, Í-sat, Ngá-kok tī Thian-kok chē-toh.

12Put-kò hiah-ê pún-lâi sī Thian-kok ê kiáⁿ-jî--ê, hoán-tńg ōe siū kóaⁿ chhut-khì gōa-bīn o͘-àm ê só͘-chāi, tī hia thî-khàu, kā-gê-chhiat-chhí.”

13Jiân-āu Iâ-so͘ tùi hit-ê kun-koaⁿ kóng, “Lí khì, hō͘ lí só͘ sìn--ê si̍t-hiān!” Tú-tú hit-sî, po̍k-jîn ê pīⁿ chiū hó--khì.

14Iâ-so͘ ji̍p-khì Pí-tek in tau, khòaⁿ-tio̍h i ê tiūⁿ-ḿ hoat-jia̍t, tó tī bîn-chhn̂g.

15Iâ-so͘ bong i ê chhiú, jia̍t thè--khì, i chiū khí-lâi sū-hāu I.

16Hông-hun ê sî, ū chi̍t-kóa lâng chhōa chin chōe hō͘ siâ-sîn hū-sin ê lâng lâi Iâ-so͘ hia. I ēng chi̍t kù ōe chiū kā siâ-sîn lóng kóaⁿ--chhut-khì, koh i-hó só͘-ū ê pīⁿ-lâng.

17Che sī beh èng-giām thong-kè sian-ti Í-sài-a só͘ kóng ê ōe: I sêng-siū lán ê loán-jio̍k, tam-tng lán ê pīⁿ-thiàⁿ.

18Iâ-so͘ khòaⁿ-tio̍h chi̍t tōa-tīn lâng ûi tī I chiu-ûi, chiū hoan-hù bûn-tô͘ kè-khì ô͘ ê hit-pêng hōaⁿ.

19Ū chi̍t ê keng-ha̍k-kàu-su kiâⁿ óa-lâi kā I kóng, “Lāu-su, lí bô-lūn khì tó-ūi, góa lóng beh tè lí.”

20Iâ-so͘ ìn kóng, “Hô͘-lî ū khang, khong-tiong ê chiáu ū siū, put-kò Jîn-chú liân khòa thâu-khak ê só͘-chāi to bô.”

21Lēng-gōa chi̍t ê bûn-tô͘ kā Iâ-so͘ kóng, “Chú ah, thèng-hāu goán sī-tōa-lâng pah-hè-nî-lāu, góa chiū lâi tè lí. ”

22Iâ-so͘ ìn kóng, “Lâi tè góa, hō͘ sí-lâng khì bâi-chòng in ka-kī ê sí-lâng!”

23Iâ-so͘ chiūⁿ-chûn, I ê bûn-tô͘ tè I khì.

24Hut-jiân, ô͘ khí tōa hong-éng, chûn soah hō͘ éng khàm kah beh tîm--lo̍h-khì, m̄-kú Iâ-so͘ teh khùn.

25Bûn-tô͘ khì kā I kiò-chhíⁿ, kóng, “Chú ah, kiù--leh-o͘h, lán teh-beh bô-miā lo͘h!”

26Iâ-so͘ tùi in kóng, “Sió-sìn ê lâng, lín ná chiah bô-táⁿ?” I chiū khí--lâi, chek-pī hong kap éng, ô͘ chiū chēng-chēng-chēng.

27Hiah-ê lâng tio̍h-kiaⁿ kóng, “Chit-ê sī sím-mi̍h khoán lâng, liân hong kap éng to sūn-ho̍k!”

28Iâ-so͘ kè-khì ô͘ ê hit-pêng hōaⁿ, kàu Ka-tāi-lia̍p -lâng ê tōe-khu, ū nn̄g ê hō͘ kúi hū-sin ê lâng tùi bōng-á-po͘ chhut--lâi, tú-tio̍h I. In hiông-kài-kài, só͘-í bô lâng káⁿ tùi hit-tiâu lō͘ keng-kè.

29In hut-jiân tōa-siaⁿ hoah, “Siōng-tè ê Kiáⁿ, lí mài chhap--goán! Sî iáu-bē kàu, lí chiū lâi beh kā goán khó͘-chhó͘ sī--bô?”

30Hit-sî, lī in ū hiah--hn̄g-ah ê só͘-chāi, ū chi̍t tōa-kûn ti teh thó-chia̍h.

31Kúi kiû Iâ-so͘ kóng, “Lí nā beh kā goán kóaⁿ--chhut-khì, tio̍h chhe goán chìn-ji̍p hit-kûn ti.”

32Iâ-so͘ kā in kóng, “Lín khì!” Kúi chiū chhut--khì, chìn-ji̍p ti-kûn; hut-jiân kui-kûn ti lóng tùi soaⁿ-phiâⁿ chông lo̍h-khì ô͘--ni̍h, tū-sí tī chúi-lāi.

33Chhī ti ê lâng chiū tô-cháu, cháu ji̍p-khì siâⁿ-lāi, chiong it-chhè só͘ hoat-seng í-ki̍p hō͘ kúi hū-sin ê lâng só͘ tú--tio̍h ê tāi-chì lóng pò lâng chai.

34Choân-siâⁿ ê lâng lóng chhut-lâi beh khòaⁿ Iâ-so͘; in chi̍t-ē khòaⁿ-tio̍h I, chiū khún-kiû I lī-khui in ê tōe-khu.

← Chapter 7 Jump to: Chapter 9 →