Micah 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Tī bîn-chhn̂g tô͘-bô͘ put-gī, kè-ōe pháiⁿ-tāi ê lâng, chhám ah! In thiⁿ chi̍t-ē kng chiū khì chòe pháiⁿ, in-ūi in chiáng-ak koân-le̍k.

2In tham lâng ê hn̂g, chiū kā chhiúⁿ; ài lâng ê chhù, chiū kā chiàm; in khi-ap lâng kap in ê ka-têng, chhiúⁿ-toa̍t lâng kap in ê sán-gia̍p.

3Só͘-í Siōng Chú kóng: Khòaⁿ leh, góa kè-ōe beh kàng chai-hō hō͘ lín chiah-ê lâng; lín bōe-tàng thoat-lī chit-ê chai-hō, kiâⁿ-lō͘ thâu-khak gia̍h bōe koân, in-ūi che sī chai-lān ê sî.

4Tī hit-ji̍t, lâng ōe tùi lín kóng hong-chhì ê ōe, chhiùⁿ pi-chhám ê ai-ko, kóng: Goán hāi-liáu-liáu lah! Goán tông-pau ê sán-gia̍p pìⁿ-chòe pa̍t-lâng ê; goán ê chhân-tōe hō͘ lâng chhiúⁿ--khì, kau hō͘ goán ê tùi-te̍k!

5Só͘-í, tī Siōng Chú ê tāi-hōe tiong, lín choa̍t-tùi bōe-tàng koh thiu-chhiam pun thó͘-tōe.

6In kóng, “Lín m̄-thang soat-kàu, m̄-thang tùi goán soan-káng chiah-ê tāi-chì; Siōng-tè bōe hō͘ goán kiàn-siàu.”

7Ngá-kok ê hō͘-tāi kiám thang kóng, “Siōng Chú ê sim-heng ná hiah oe̍h? I kiám ōe chòe chit-khoán tāi-chì?” Góa ê ōe tùi hêng-ûi chèng-ti̍t ê lâng it-tēng ū lī-ek.

8Siōng-tè kóng: Lín chiah-ê kè-ōe pháiⁿ-tāi ê lâng, chhin-chhiūⁿ tùi-te̍k khí-lâi kong-kek góa ê chú-bîn, chhiúⁿ-toa̍t tùi chiàn-tiûⁿ tńg--lâi, kî-thāi pêng-an kè-ji̍t ê lâng ê gōa-saⁿ.

9Lín chiong góa chú-bîn ê hū-jîn-lâng tùi un-loán ê ka-têng kóaⁿ-chhut, chiong góa tùi in sòe-kiáⁿ ê chiok-hok éng-oán chhiúⁿ--khì.

10Khí--lâi, tô-cháu! Chia m̄-sī lín an-choân khiā-khí ê só͘-chāi; in-ūi lín put-gī ê hêng-ûi, chit-ê tōe it-tēng siū húi-hoāi, thiat-tóe húi-hoāi.

11Nā ū lâng sì-kòe kiâⁿ, thoân bô-iáⁿ-chiah phiàn lâng ê ōe, kóng, “Góa ū-giân, chiong-lâi lín po̍h-chiú kāu-chiú lim bōe liáu.” Chit-khoán sī lín kah-ì ê sian-ti.

12Í-sek-lia̍t só͘ chhun ê chú-bîn ah, góa it-tēng beh kā lín lóng chū-chi̍p--khí-lâi. Góa beh kā lín an-tì tī chi̍t ê só͘-chāi, chhin-chhiūⁿ iûⁿ tī iûⁿ-tiâu, chhin-chhiūⁿ iûⁿ-kûn tī chháu-tiûⁿ, lâng chin chōe, siaⁿ chin ōng.

13Ū chi̍t ūi chhōa-thâu chhiong--chhut-khì, chhōa in tùi siâⁿ-mn̂g chhiong--chhut-khì; in ê ông choh-chêng kiâⁿ, Siōng Chú tī thâu-chêng ín-chhōa in.

← Chapter 1 Jump to: Chapter 3 →