Micah 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Sek-an ê chú-bîn, tio̍h chū-chi̍p chiâⁿ-chòe kun-tūi. Lán siū ûi-khùn kong-kek lah; in ēng kùn teh kòng Í-sek-lia̍t léng-siù ê chhùi-phóe.

2Í-hoat-tha tōe-khu ê Pek-lī-hêng ah, lí tī Iû-tāi chong-cho̍k tiong sui-jiân bî-sòe, m̄-kú ū chi̍t ūi ōe tùi lí hia chhut--lâi, ūi góa tī-lí Í-sek-lia̍t; i ê kun-goân tùi kó͘-chá, tùi siōng khí-thâu chiū ū.

3Só͘-í, Siōng Chú beh chiong I ê chú-bîn kau hō͘ tùi-te̍k, ti̍t-kàu hit-ê teh chhui-chūn ê hū-jîn-lâng kā kiáⁿ siⁿ--chhut-lâi. Hit-sî, hiah-ê siū-lia̍h iáu oa̍h--teh ê tông-pau ōe tò-lâi Í-sek-lia̍t hia.

4I beh khò Siōng Chú ê khùi-la̍t khiā--chhut-lâi, hōng Siōng Chú — i ê Siōng-tè ê miâ ê ui-giâm, bo̍k-ióng i ê iûⁿ-kûn, hō͘ in an-jiân khiā-khí; i ōe tī choân-tōe siū chun chòe tōa.

5Chit-ūi ōe hō͘ lán sù-kéng-pêng-an. A-su̍t chhim-hoān lán ê kok-thó͘, kong-kek lán ê pó-lúi ê sî, lán beh chí-phài chhit ê bo̍k-chiá, poeh ê siú-léng hoán-kek.

6In ōe ēng kiàm tī-lí A-su̍t -tōe, ēng pu̍ih--chhut-lâi ê to thóng-tī Lêng-lio̍k -tōe. A-su̍t chhim-hoān lán ê tōe, thún-ta̍h lán ê kok-thó͘ ê sî, chit-ūi ōe kái-kiù lán.

7Í-sek-lia̍t só͘ chhun ê chú-bîn tī bān-bîn tiong, ōe chhin-chhiūⁿ Siōng Chú kàng-lo̍h ê lō͘-chúi, chhin-chhiūⁿ lūn-te̍k chháu ê kam-lîm; in m̄-bián óa-khò lâng, m̄-bián kî-thāi sè-kan-lâng.

8Í-sek-lia̍t chhun--lo̍h-lâi ê chú-bîn tī bān-kok bān-bîn tiong, ōe chhin-chhiūⁿ chhiū-nâ lāi pah-siù tiong ê sai, chhin-chhiūⁿ iûⁿ-kûn tiong-kan siàu-chòng ê sai, in keng-kè ê sî, ōe thún-ta̍h, thiah-li̍h, bô lâng ōe-tàng kái-kiù.

9Lín ōe iâⁿ-kè tùi-te̍k, siau-bia̍t lín só͘-ū ê te̍k-jîn.

10Siōng Chú kóng: Tī hit-ji̍t, góa beh tùi lín tiong-kan tû-khì lín ê chiàn-bé, húi-hoāi lín ê chiàn-chhia.

11Góa beh húi-hoāi lín kok-lāi ê siâⁿ-chhī, thiah-húi lín só͘-ū ê pó-lúi.

12Góa beh tû-khì lín chhiú teh lāng ê siâ-su̍t, tī lín hia bô koh ū pok-kòa--ê.

13Góa beh tùi lín tiong-kan tû-bia̍t tiau-khek ê ngó͘-siōng kap chio̍h-thiāu-siōng; lín chiū bô koh kūi-pài ka-kī ê chhiú chō ê ngó͘-siōng.

14Góa beh tùi lín tiong-kan pu̍ih-chhut A-sià-la lú-sîn ê thiāu-siōng, koh húi-bia̍t lín ê siâⁿ-chhī.

15Góa mā beh hoat tōa siū-khì, pò-èng bô sūn-thàn ê lia̍t-kok.

← Chapter 4 Jump to: Chapter 6 →