Micah 6

Chinese TTVR (現代台語譯本羅馬字版)

← Chapter 5 Jump to: Chapter 7 →

1Tio̍h thiaⁿ Siōng Chú teh kóng ê ōe: Khí--lâi, tī tōa-soaⁿ bīn-chêng thê-chhut tap-piān, hō͘ sió-soaⁿ thiaⁿ-tio̍h lín ê siaⁿ.

2Tōa-soaⁿ kap tōe kian-kò͘ ê kun-ki ah, tio̍h thiaⁿ Siōng Chú ê khòng-sò͘; Siōng Chú beh kap I ê chú-bîn cheng-piān, beh khòng-kò Í-sek-lia̍t.

3Góa ê chú-bîn ah, góa ū tùi lín chòe sím-mi̍h? Góa ū sím-mi̍h hō͘ lín ûi-lân? Lín lâi tap-piān.

4Góa ū chhōa lín chhut Ai-ki̍p, kiù-sio̍k lín thoat-lī chòe lô͘-châi ê tōe; góa chhe Mô͘-se, A-lûn, Bí-lī-an chòe thâu chhōa lín.

5Góa ê chú-bîn ah, tio̍h ōe-kì-tit Mô͘-ap -ông Pa-le̍k ê kè-bô͘, kap Pí-ní ê kiáⁿ Pa-lân ìn i ê ōe, ōe-kì-tit tùi Si̍p-têng kàu Kiat-kah hoat-seng ê tāi-chì, thang hō͘ lín chai Siōng Chú kong-chèng ê chok-ûi.

6Góa tio̍h tòa sím-mi̍h chiū-kūn Siōng Chú, tòa sím-mi̍h lâi kèng-pài Chì-koân ê Siōng-tè? Kiám tio̍h ēng sio-hòa-chè, á-sī chi̍t-hè ê gû-á lâi chiū-kūn I?

7Siōng Chú kiám ōe hoaⁿ-hí chheng-chheng chiah ê iûⁿ-káng, á-sī bān-bān tiâu khoe ê iû? Góa kiám tio̍h ūi ka-kī ê chōe-kò hiàn tōa-kiáⁿ, ūi góa ê chōe-ok hiàn góa ê chhin-siⁿ-kiáⁿ?

8Lâng ah, Siōng Chú í-keng ū chí-sī lí sím-mi̍h sī hó. I iau-kiû lí--ê sī sím-mi̍h? Chiū-sī si̍t-hêng kong-gī, sim chûn chû-pi, khiam-pi kap lí ê Siōng-tè chòe-hé kiâⁿ.

9Kèng-ùi Siōng Chú chiah sī tì-hūi. Siōng Chú tùi siâⁿ chhut-siaⁿ ho͘-kiò, “Ta̍k-ê chi-cho̍k kap siâⁿ-lāi ê hōe-chiòng, lóng tio̍h thiaⁿ.

10Góa kiám ōe bōe-kì-tit pháiⁿ-lâng chhù-lāi put-gī ê chîⁿ-châi, bōe-kì-tit bô ha̍h kui-keh ê chin kap táu?

11Góa kiám ōe iông-ún bô kong-tō ê thian-phêng, kap pián--lâng ê chhìn-thûi?

12Siâⁿ-lāi ê hó-gia̍h-lâng chhiong-móa kiông-pō, chū-bîn lóng kóng pe̍h-chha̍t, in ê chhùi-chi̍h khúi-chà.

13Só͘-í góa tāng-tāng kā lí phah, ūi-tio̍h lí ê chōe kā lí húi-bia̍t.

14Lí chia̍h, m̄-kú chia̍h bōe pá; pak-tó͘ put-sî khang-khang. Lí chek-chū, m̄-kú lâu bōe tiâu; lí só͘ chhun--ê, mā ōe tī chiàn-loān tiong siū húi-hoāi.

15Lí iā-chéng, bô thang siu-sêng; chiⁿ kaⁿ-ná, mā bô iû thang boah seng-khu; ta̍h phû-tô, mā bô chiú thang lim.

16In-ūi lín chun-siú Àm-lī ê kui-lē, o̍h A-hap -ke ê pháiⁿ hêng-ûi, sūn-thàn in ê kè-bô͘, só͘-í góa beh kā lín húi-bia̍t, hō͘ lín tòa tī chia ê lâng siū thí-chhiò, lín mā ōe tam-tng góa chú-bîn ê kiàn-siàu.”

← Chapter 5 Jump to: Chapter 7 →