1 John 4

Zande

← Chapter 3 Jump to: Chapter 5 →

1Abadiangba, ka oni ídi nga pa agu yo dunduko naya Ziazia Toro ti yo ya, ono oni ásadi yo, si ngia i naye yo du Mbori ni, bambiko dungu zire anebi ndu rogo zegino.

2Gi ini oni ga Mbori Toro ti ni re, nga kina agu yo nakusa Yesu Kristo ya ko aye ni borose i nga ga Mbori yo.

3Agu yo akusa nga Yesu ya, i nga ga Mbori yo te, agi yo re du na toro nga ga vurakristo ko re, oni ini aina ya ko naye; awere ko ima du zegino.

4Oni nga ga Mbori roni, gi rukutu agude, oni adi be zire anebi; bambiko gu ko du rogo roni yo ko nga bahe ti gu ko du zegino.

5I nga ga zegino yo; si i agumba pa zegino ti ni, zegino ki nigi pa yo.

6Ani nga ga Mbori rani. Gu ni ini Mbori ni nagia pa rani; gu ni adu nga ni ga Mbori ni ya, ni agia nga pa rani te. Si ani ini gu toro ti ni nga ga rengo ko, na gu toro nga ga ingahe ko.

7Abadiangba, nyemu akuarani du adu ti rani, bambiko nyemuse nga ga Mbori he; gu ni du na nyemuse ni nga ga Mbori vungu, ni ini Mbori a.

8Gu ni adu nga na nyemuse ya, ni aina nga Mbori te; bambiko Mbori nga nyemuse.

9Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino, ani du ni ungarani mbiko ko.

10Gi nga nyemuse re, nga nyemu Mbori adu nga ti rani te, kina rani du nyemurani ti ko, ko akedi Wiriko ko du ni motumo gaani ingaapai.

11Abadiangba, ka nyemurani du ti Mbori were, nyemu akuarani du adu ti rani a.

12A nga boro sa nabi Mbori ni gu rago wa sa te; ka nyemu akuarani du ti rani, Mbori nye anye rogo rani yo, gako nyemuse ki du ti rani nzunzu.

13Gi ani ini ti ni re ya ani nye rogo ko yo, ko ki nye rogo rani yo, nga bambiko ko fu gako toro fu rani.

14Ani bi he ki du ni dezirehe ya Mbori nga Ba akedi Wiriko ko du ni Batasi zegino.

15Gu ni ka kusi Yesu ya Wiri Mbori nga ko, Mbori nye anye rogo ni yo, ni ki nye rogo Mbori yo.

16Ani ini gu ga Mbori nyemuse du ti ko sa rani ki idi pa ha. Mbori nga nyemuse; gu ni nye rogo nyemuse yo, ni nye rogo Mbori yo, Mbori ki nye rogo ni yo.

17Gi du nyemuse ti ni nzunzu ti rani re, nga du ani zukazuka rago sapangbanga; bambiko wa du ko, kina wo du ani rogo gi zegino re.

18Gunde ti nyemuse te, ziazia nyemuse nabafa gunde abafa, bambiko gunde du na mbusa. Gu ni nagunde gani nyemuse nzunzu te.

19Nyemuse ti rani, bambiko ko nyemurani adu ti ko mbata.

20Ka boro ya, nyemu Mbori ti ni, ki nisogo wirinani, irazire nga ni; mbiko gu ni adu nga nyemu gu wirinani ti ni bi ni ni ya, ka nyemu Mbori du nga ti ni ni abi nga ko ya te.

21Gi rugute re di ani he yo du ko ni, nga gu ni du nyemu Mbori ti ni, nyemu wirinani du ti ni a.

← Chapter 3 Jump to: Chapter 5 →