2 Timothy 3

Zande

← Chapter 2 Jump to: Chapter 4 →

1Mo ini gere a, ya rogo kusa rago gbegberẽ rago ayé.

2Bambiko aboro akpi kina nyemu tiyo, ki du ni airakpinyemumarã, airaruka, airarekangose, agberẽngba yo, abasasangba avunguyo, atambua nga he ya, airazanga ziaziapai,

3airasakparakpa, aguaurundika, airasoapai, airazanga rugatise, airaerã, akpi nga nyemu wenepai ya,

4airabiriki, airanyakari, airaabiatise, i akpi nyemu sangba borose susi nyemu Mbori;

5ki nika kuti kpia sinombori, ono i ati kangu tanduhe. Oni kpára tironi ti agi yo re a.

6Bambiko i nga agu yo narima ku dimo yo, ki zi gu mumungo ade naba guta ingapai ku ri yo, i dungu gbegberẽ nyemuahe agbefa yo,

7i nake na wirikapai, ka i ada nga ti gu inahe nga ga rengo ya.

8A wa aYane na Yamabure ati kangu na Mose, kina wo agi yo re nati kangu na rengo a; aboro zirĩberã, nigberẽ tipa idapase.

9Ono i andú nga ku mbata yo te; mbiko gayo mungo adu ku bangiri aboro dũ, wa ga Yane na ga Yamabure aima du a.

10Ono mo apeke gi yugopai, gi mangapai, gu pai mi napeka, idapase, gbanga hipai, nyemuse, zadapai,

11rungosi, egerã; agu apai naye sa re Andiokia yo, na Ikonio yo, a Rusetura yo; wa mi aru nyanyaki rogo ho. Gbia ki batasi re rogo agi apai re dunduko.

12Ii, i arungosi agu yo dunduko ka kpi nyemu ka ka kuti sino Mbori wa du yo ni ungayo rogo Kristo Yesu yo a.

13Ono gbegberẽ aboro agbérã agberã ki susi na airanangahe a, ki ninangi aboro, aboro ki ninangi yo a.

14Ono mo nyé rogo agu apai mo awiriki ki ini he ni rengo, niini agu aboro mo awiriki he be yo;

15ho mo adu ni ni gude, mo atona ina gu Ziazia Kekeapai rengbe na fu tatamana foro sa bata, mbiko gu idapase du rogo Kristo Yesu yo.

16Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai;

17ya ga Mbori boro du ziazia, aũ manga wene apai dunduko ki du be ni.

← Chapter 2 Jump to: Chapter 4 →

Recommended Reading

Commentary 2 Timothy Commentaries → Devotional 2 Timothy Devotional Guide → Get This Bible Zande Study Bible →