Ezra 3

Zande

← Chapter 2 Jump to: Chapter 4 →

1Ho saba diwi ada ni, awiri aYisaraere ki du kina rogo abaakporo, aboro ki dungura tiyo ku Yerusarema yo wa boro sa.

2AYesua ki ru ku ari nangia wiri Yozadaka, na akurako nangia aboromotumo, na Zerubabera nangia wiri Saratiere, na awirinako, i ki dua ga ga Yisaraere Mbori bamotumo berewe, ka atumo ni zozo amotumo auru he, wa du he ni keke he rogo ga Mose rugute yo nangia ga Mbori kumba.

3I ki moi bamotumo ku ba ha, bambiko gbudagbuda azi yo be aboro agu aringara re. I ki nitumo ni zozo amotumo auru he fu Yekova, nga kina zozo amotumo awiso na anyemu a.

4I ki mangi gu pumbo nga ga abasura, a wa du he ni keke he, ki nitumo ni zozo amotumo na uru ni gedigedi he, a wa i aringbisi paha, rengbe na gu uru.

5Fuo gure i atumo na gu zozo motumo i ka atumo na ni na uru kindi, na agu amotumo nga ga fogo diwi, na ga Yekova ringbisiringbisi apumbo dunduko du ni kparakpara ha, na gu nga ga agu aboro nafu gayo gamunihe na nyemuhe zaza fu Yekova.

6I atona fu zozo amotumo fu Yekova ti gu bambata uru nga ga saba diwi. Ono i ata maa nga mburu ga Yekova yekaru ho te.

7Si du i afu marã fu abasekembia, na fu abasekengua a; na riahe, na mbirimbiri he, na nzeme fu aboro Sidona na aboro Tura a, i ye na ngua kedara Rebanona yo ku pangba baime ku Yapo yo, ku sangba gu pai Kurese aidi fu yo nangia bakindo aParaso.

8Were ti gu ue gará fuo da yo ku pati ga Mbori bambu Yerusarema yo, ti ue diwi, aZerubabera nangia wiri Saratiere, na Yesua nangia wiri Yozadaka, na yangara awirinayo nangia aboromotumo na aRevi, na agu aboro naadu ni zizi yo nayega ku Yerusarema yo dunduko, i atona sunge bungia ha, i ki asia pa ru ku ri sunge ga Mbori bambu fu agu aRevi garãyo asusi 20.

9Yesua na awiriko na awirinako, Kademiere na awiriko, na awiri Yuda, i ki du ku ri abamangi sunge ga Mbori bambu, wa sa na awiri Enadada, na aRevi, awiriyo na awirinayo.

10Ho abamebambu amoi mburu ga Yekova yekaru ni, aboromotumo ki ye ni ukadiukadi ti yo ni gayo roko na ambanya be yo, na aRevi nangia awiri Asafa na gu sirigi napaa apaa, ka tambua Yekova na ni, wa Dawidi aringbisi he nangia bakindo aYisaraere.

11I ki ta dia bia akurayo nikaraga ha na irisa na tambuahe fu Yekova, niya, “Ngba ko angba bambiko gako inapai nye anye fu aYisaraere kindi.” Aboro ki nita ngbayo ni bakere wawa, ho i atambua Yekova ni, bambiko i amoi mburu ga Yekova bambu.

12Ono agu aboromotumo na aRevi na agu abaakumba nadu ku ri angbatunga abayo, na gbinza aboro, nangia agu aboro naabi gu bambata bambu, ho i amoi mburu gi bambu ni re ku bangiriyo, i ki nikpari ni bakere kpe ni aume. Agu yo ni dungu yo ki nipoi ku ari ni ngbarago

13Ka aboro aruga nga tiyo na pa kparaka gu woro he nangia ga paa ku ari ni ngbarago, na woro he nangia gu kpe nga ga aboro ya, bambiko aboro ata ngbayo ni bakere wawa, i ki nigi woro ho tuturu.

← Chapter 2 Jump to: Chapter 4 →