Ezra 7

Zande

← Chapter 6 Jump to: Chapter 8 →

1Fuo agi apai re, ti ga Arutasasata zogarago nangia bakindo aParaso, Ezara nangia wiri Seraya ki kuru Babera yo. Seraya angia wiri Azaraya, Azaraya ki ngia wiri Erekiya,

2Erekiya ki ngia wiri Saruma, Saruma ki ngia wiri Sadoka, Sadoka ki ngia wiri Aituba,

3Aituba ki ngia wiri Amaria, Amaria ki ngia wiri Azaraya, Azaraya ki ngia wiri Merayota,

4Merayota ki ngia wiri Zeraya, Zeraya ki ngia wiri Uzi, Uzi ki ngia wiri Buki,

5Buki ki ngia wiri Abisua, Abisua ki ngia witi Finasa, Finasa ki ngia wiri Erazara, Erazara ki ngia wiri Arona nangia gbia aboromotumo.

6Gi Ezara re ko akuru Babera yo. Ko adu ni bakeapai zaza rogo ga Mose rugute, nga gu Yekova afu nga ga aYisaraere Mbori. Bakindo ki idi pa gako sasana he dunduko, bambiko be Yekova adu ku ri ko nga gako Mbori.

7Agu aboro aYisaraere ki ndu ku Yerusarema yo a, na agu aboromotumo, na agu aRevi, na agu abayango, na agu ababanda angbadimo, na agu aNetina, ti gu saba garã zogarago nangia ga bakindo Arutasasata.

8Ezara ki da Yerusarema yo ti bisue diwi, rogo saba garã zogarago nangia ga bakindo.

9Bambiko ko aguari Babera yo ti bambata uru nga ga bambata diwi, ko ki da ku Yerusarema yo ti bambata uru nga ga bisue diwi, bambiko be gako Mbori adu ku ri ko sa wenepai.

10Bambiko Ezara arugu kpotoko yo ya ko agbata ga Yekova rugute, ka amanga ha, ka ayugo i ugaapai ku Yisaraere yo na asarangbanga a.

11Gere nga kpia gu kekepai Bakindo Arutasasata afu fu Ezara nangia boromotumo, nangia bakeapai, nangia bainipa ga Yekova arugute, na gako rugapai fu aYisaraere a.

12Si ki ya, “Arutasasata nga bakindo ku ri abakindo, fu Ezara nga boromotumo du ni bakepa gu rugute nga ga Mbori nga ga ngbangbaturũ ko, nake pai wen

13Mi rũ ndika ya agu yo dagba agu boro nga ga aYisaraere yo dunduko, watadu gayo aboromotumo, na aRevi du rogo gi ngbi, du gayo berá zaza ka ndu ku Yerusarema yo, i ndú na mo.

14Bambiko wa bakindo nikedi ro na gako abaakumba saba ka wisiga pa Yuda na Yerusarema, ku sangba gu rugute du be ro, nga ga gamo Mbori,

15na ka tinda gu feda na gu dahabu bakindo afu na gako abaakumba zaza fu ga aYisaraere Mbori, du gako banye Yerusarema yo,

16na gu feda na gu dahabu dunduko mo ka bi he rogo ngbi Babera dunduko, na gu gamunihe nga ga aboro na ga aboromotumo, nga gu i afu he na nyemuhe tipa gu bambu nga ga gayo Mbori du Yerusarema yo.

17Si du mo ka ngbe abaabagara ti ni ni ngará na gi mará re, na abaakandoro, na awiri akandoro na gaami amotumo ngungo, na gaami amotumo mbirimbiri he. Mo atumo na ami ri gu bamotumo du rogo gu bambu nga ga gaoni Mbori du Yerusarema yo.

18Oni ki mangi gu pai ka ngba bangiro na bangiri awirinamo na gu yangara feda na gu dahabu ka anye be roni, oni mangi he kuti sangba gaoni Mbori.

19Agu aũsunge i afu foro tipa manga pa sunge ga gaoni Mbori bambu, mo amaa ha ku bara bangiri Mbori nga ga Yerusarema ko.

20Gu kura ahe ka akpa tipa gu bambu nga ga gaoni Mbori, nga gu mo ka ida ka fu he, mo ki di he rogo ga bakindo bambu iga marã.

21“Mi nga bakindo Arutasasata, mi rũ ndika fu agu ababandamará dunduko du ku mbiti di yo: ya, Agu ahe dunduko Ezara ka sasana roni tipa ha, nga boromotumo ni bakepa gu rugute nga ga Mbori nga ga ngbangbaturũ ko, oni nimangi he ni ngará,

22ka feda susi nga taranda 100 ya, na ka ringbisiringbisi zende ahe súsi nga aritere 37,000 ya, ringbisiringbisi imekakue ka si susi nga aritere 3,700 a ya, ringbisiringbisi nzeme ka si súsi nga aritere 3,700 a ya, kina tikpo ka zanga ringbisa ha.

23Agu apai Mbori nga ga ngbangbaturũ ko arugu he, i nimángi kina ha dunduko tipa gu bambu nga ga Mbori nga ga ngbangbaturũ ko, gako zinga ka du ku ri ngbi na ku ri bakindo, na ku ri awiriko a.

24Ani naruga pai fu roni a tipa aboromotumo na aRevi, na abayango, na ababanda angbadimo, na aNetina, na amoyambu gi ga Mbori bambu re, ya si adu nga tipa ka dia mará rúhe be yo na tumo gene na ngbeti wa sa te.

25“Mo a Ezara, mo moi abasapungbanga na abarugupai ku sangba gu ga Mbori tatamana du ti ro re, i sapu ngbanga aboro ku mbiti di yo dunduko, na agu yo ini ga gamo Mbori arugute. Oni ki yugu he fu gu ni aina nga ha ya.

26Gu ni ka ida nga ka manga sangba ga gamo Mbori rugute ya, na ga bakindo rugute a ya, i sápu ngbanga kuti ni ni ngará, watadu sa kpio, watadu baga ni ku sa yo, watadu gbu gani ahe, na ba ni ku bambukisa yo.”

27I sámbua Yekova, nga ga abarani Mbori, namoi pai wa gere ku kpoto bakindo yo, ko ngbanyasi ga Yekova bambu du Yerusarema yo,

28ki yugu inapai fere bara bangiri bakindo, na bara bangiri gako abaakumba, na bara bangiri ga bakindo nyanyaki abazogo dunduko. Were be Yekova nga gi Mbori adu ti re mi ki ngará ki dungura abaakumba dagba aYisaraere ani mongo ndu na yo.

← Chapter 6 Jump to: Chapter 8 →