Galatians 1

Zande

Jump to: Chapter 2 →

1Pauro, mokedi ga aboro te, boro aasia nga paha fere te kina Yesu Kristo, na Mbori nga Ba, gu ko nazingisi ko dagba akangba,

2na agu awirina du na mi, Fu agu akanisa du Garatia yo:

3Undahe dú na oni na zereda be Mbori nga Ba, na gaani Gbia Yesu Kristo,

4nga gu ko nafu tiko tipa gaani gbegberẽapai, ko batasi rani be gi gbegberẽ zegino re, a wa Mbori akpi nyemu he nga Barani.

5Taarimo dú fu ko nye anye kindi. Amina.

6Si nairiwo ti re were wa oni naguari ni ipo pati gu ko nayambu roni rogo ga Kristo undahe sa gu kura pangbanga akia;

7nga kura pangbanga nga ha te. Ono agu yo du ho nafuda roni, nikpi nyemu ka sa gu wene pangbanga nga ga Kristo.

8Ono ka ani tungusi pangbanga akia ti gu ani aima tungusa fu roni, na maraika ngbangbaturũ yo a, i tiwa ni atiwa!

9A wa ani agumba ha mbata, kina wo ya mi berewe, Ka boro atungusa kura pangbanga fu roni akia ti gu oni aima zia ha mbata i tiwa ni atiwa!

10Bambiko watadu aboro, na Mbori, da mi azúngadi ni awere? mi nagbata pai ka ngba na ni bangiri aboro? ka mi angba angba ti aboro kindi, mi adu nga ni ga Kristo moyambu te.

11Bambiko mi nayugo pai fu roni, awirina, tipa gu wene pangbanga mi atungusi, ya si wa ga boro te.

12Bambiko mi adia nga ha be boro te, i ayugo nga ha ayugo fere a te, mi aini he kina be ga Yesu Kristo yugoti.

13Bambiko oni agi pa agu apai mi anamanga mbata rogo ga aYudo dini yo, wa mi anarungosi ga Mbori akanisa susi, ki niasadi ka nyasa ha.

14Mi ki susi agu yo asusa ni dungu yo garãyo arengbe na gimi dagba ngbatungarani rogo ga aYudo dini yo, bambiko nyemu ga abuba pai anamanga re amanga kakaka susi yo.

15Ono ho Mbori akpi nyemu yugo Wiriko ni fere, gu ko nakpara re, kina vuru nina yo, ki yambu re ni gako undahe,

16mi nitungusi pa ko dagba aGendiria; ni ba sa mi asaka nga paha na agu yo nga aboro te.

17Mi andu nga ku Yerusarema yo koyo du agu yo ni nadu ni amokedi mbata fere a te, ono mi andu ku Araba yo; mi ki karaga tire ku Damaseke yo berewe.

18Garã ki du biata mi ki ndu tie ku Yerusarema yo ka bi Kefa nga Petero, mi ki raki koyo du ko ni bawe na bisue.

19Ono mi abi nga kura amokedi te, kina Yakoba sa, nga wirina Gbia.

20Were agu apai mi ake fu roni re, oni ngére, ku bangiri Mbori, mi agumba nga ha ni zire te.

21Mi ki ye tie ku rogo agu aringara nga Suria na Kirikia.

22Agu akanisa du rogo Kristo yo Yuda vo i ata ina nga re ni bangiriyo te;

23ono i agi kina gu pai nga, “Gu ko naarungosi rani mbata, ko natungusa pa gu idapase ko agbarasi he mbata awere.”

24I ki taasi rimo Mbori mbiko re.

Jump to: Chapter 2 →