Galatians 5

Zande

← Chapter 4 Jump to: Chapter 6 →

1Raniri Kristo akusi rani ani ra ni rirani; oni rú nyanyaki mbiko ho, ka oni dú nga ni zizi roni berewe na gonga akanga ya.

2Oni ngére, mi, Pauro, ya mi fu roni, ka i yere roni, Kristo asongoda nga roni te.

3Ii, mi nagumba ha agumba berewe fu gu boro yere yo ni, ya ni nga ga rugute borobape ka manga ha dunduko.

4Agu roni nakpi nyemu i sapu ngbanga fu roni mbiko rugute, oni kpara ti Kristo; oni tiwi pati undahe.

5Ono ani nasunga ka ngera Mbori sa rani ni ruru rani be Toro mbiko idapase.

6Mbiko rogo Kristo Yesu yo pai ti yeratise te, pai ti zangayeratise a te; kina gu idapase nadu mbiko nyemuse.

7Oni aoro wenengãi; da naza roni ya ka oni gi nga sangba rengo ya?

8Gi zungaditi re si aye nga yo du gu ko ni nayamba roni te.

9Agbooro ni umba ra ki ndu andu rogo kpokuta dunduko.

10Mi ini pa roni aina mbiko Gbia, ya oni aberã nga pai akia te. Ono gu ni nafuda roni ni ahi sapangbanga, ka ni vura du adu ni gu boro vurũ.

11Mi tigimi, awirina, ka mi atungusa pa yeratise kindi were, tipagine i narungosi re ti ni? gu pai ka akpakara ti pa wagiwagi ngua ka si go ago kusa.

12Agu yo nafuda roni ka i agbunda tiyo si ka ngba ti re a!

13Bambiko oni, awirina, i ayambu roni sa raniri; ono ka oni sá nga gaoni raniri sa peka pa borose ya; kina manga pa akuaroni dagba roni mbiko nyemuse.

14Bambiko digida rugute nga kina gi pai sa re, nga; “Mo nikpí nyemu akuaro akpi wa mo akpi nyemu tiro.”

15Ono ka oni arunduka tironi ni riti tironi, oni bánda tironi oni ka nyasa tironi anyasa.

16Ono ya mi, oni péke Toro, ka oni amánga nga gu nyemuhe nga ga borose ya.

17Bambiko borose naso vura aso na Toro, Toro ki niso vura aso na borose; agi ahe re kparaka ha akparaka; si du ka oni amanga nga agu apai ti ni oni akpi nyemu he ya.

18Ono ka Toro ngbe fu roni mbata yo, oni adu nga tii rugute te.

19Were agu apai borose amanga binibangirise du, nga, bari, na pa meteka, na wasiro,

20na irisa kpiaahe, na soroka, na asogote, na kpata, na aringo, na azinga, na kpika pai, na kparaka, na kparakpara pai,

21na kpiboro, na kpibuda, na do pumbo gbarakagbaraka, na tunga agi apai re: mi naringbisa pa agi apai re fu roni, a wa mi aringbisi he mbata fu roni, ya agu yo namanga tunga agi apai re, i adia nga gu ũkumbo nga ga ga Mbori ngbi te.

22Ono zuzu Toro nga nyemuse, na ngbarago, na zereda, na hipai, na mangapase, na weneringise, na du ngangarã,

23na zera, rugatise; rugute ho tipa gere wa sa te.

24Agu yo nga ga Kristo Yesu yo i awagi borose na gaha apai na gaha nyemuahe.

25Ka ngia ani ni ungarani mbiko Toro, ani nindu andu mbiko Toro.

26Ka ani mángi nga ruka, ka zingisa tirani, ka kpi tirani ya.

← Chapter 4 Jump to: Chapter 6 →