Galatians 6

Zande

← Chapter 5 Jump to:

1Awirina, ka i vura zia boro na ingapai, oni nga ga Toro aboro, oni ki songodi ni asongoda ni zera; mo nibí tiro i ka asada ro a.

2Oni tíndi ga akuaroni tindiro atinda, si oni ka digisa ga Kristo rugute ti ni.

3Bambiko ka boro aberã pa tini, ya he a nga u, ka ni adu nga ni he ya, si wa ni nananga tini ananga.

4Ono boro niásadi kina gani sunge, ni nikadu na gu pai ka ni tambua tini mbiko kina ha sa, mbiko kurani te.

5Bambiko boro nakpida kina gani pai.

6Gu ni i ayugo pa pai ayugo fu ni ni nigamu ngbatunga wene ahe agama dunduko fu gu ni nayugo pai.

7Ka i nángi nga roni ya; i asawia nga Mbori te, bambiko gu he rũ boro kina ha ke ni a.

8Bambiko gu ni narú he fu kina boroni ni aké zirã ake be borose; ono gu ni narú he fu Toro ni aké nyenye unga be Toro.

9Ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni.

10Were, momu nimángi rani tie, ani ki mangi gu pai amanga ngba angba fu aboro dunduko, fu kina agu yo gbe du ku idapase yo.

11Oni bí nga gu kikindigi keke apai mi ake fu roni ni kina bere re.

12Agu yo dunduko nakpi nyemu mbakada payo ku bangirise ni boroyo, i nasosoda roni asosoda i yere roni; ya ka i rungosi nga yo mbiko ga Kristo wagiwagi ngua ya.

13Agu yo nga ayeretise i aka nga kuti rugute ti gayo a te; ono i nakpi nyemu yera roni i sambua tiyo ni bororoni.

14Ono tipa re tigimi mi asambua tire kina mbiko gu wagiwagi ngua nga ga gaani Gbia Yesu Kristo, nga gu i awagi zegino ti ni fere, ki wagi re fu zegino.

15Bambiko pai ti yeratise te, pai ti zangayeratise a te, kina du ni vovo fufu boro.

16Agu yo dunduko nata ti gi pai re, zereda du fu yo na inapai, ki du fu ga Mbori Yisaraere.

17Ka boro fúdi nga re fuo gi berewe re ya; bambiko fuo Yesu du ti kpotore.

18Gu undahe nga ga gaani Gbia Yesu Kristo si dú na tororoni, awirina. Amina.

← Chapter 5 Jump to: