Nahum 1

Zande

Jump to: Chapter 2 →

1Gu pa rungo du tipa Nineve. Gu kitabu nga ga pa gu pai Nauma abi nangia boro Erekose.

2Yekova du ni iraringo Mbori ki niiri bape, Yekova naira bape, gako zinga narunguda; Yekova naira bape ti agu yo nafuda ko ki niigi gako era tipa avurako.

3Yekova du ni bayee ko tipa zinga, ko du na bakere tandu gbe, Yekova asára nga ngbanga fu agu aboro du na pai ku ri yo te. Gako gene du rogo bakamikami yuge yo na rogo bamai, dubo mai nga gu nvutu nga ga nduko

4Ko naza baime ki ugudisi he, ko niugudisi adi dunduko a; Basana napaya na Karumera, gu mbumbuda ahe du Rebanona yo si ki gboroka.

5Abaagangara nazigizo tihe bara bangiriko, agangara ki nizaraga; kpotosende ki su ku ari bara bangiriko, na zegino dũ na agu yo dunduko naraka rogo ho.

6Da rengbe ka ru ba gako imisiri ngbaduse? Da rengbe ka ru rago gako zinga? Ko nauka gako ngariangaria zinga wa we, ko nakuadi ambia ngbingbi.

7Yekova du ni wene ko, nga nyanyaki gbata rago fudifudipai; ko ini agu yo nakida kuti ko.

8Ono ko anyása avurako dunduko na ime akangbi, ko adúsia avurako ku bitimo yo.

9Gini pai oni asanga ha kuti Yekova? Ko anyása ha dunduko; fudifudipai akúra nga bara ue te.

10Bambiko ka i vura du wa akiwe nawindia tihe, i aríta dunduko wa ugu kakarika.

11Boro nakura nga yo du mo ni, nasanga gbigbitapai kuti Yekova, du ni kungba boro rondo, te?

12Ya Yekova wẽ, “Ka i vura du teketeke ziazia ni dungu yo, i abáfa yo ku sa yo, gayo pai ki nyasi. Wa mi afuda ro, mi afúda nga ro berewe te.

13Mi akíta gako gonga goro awere ki kafu agu agire navoda ro kpa.”

14Yekova arugu pai tipa ro: “Ka rimo ngbatungaro adu nga ho berewe ya; mi abáfa sese kpiahe abafa ku sa yo bambu gamo ambori yo, na gu kpiahe i amangi rogo zaragasizaragasi marã. Mi ambákada murãro, bambiko kii nga paro te.”

15Mo ngére, ri abaagangara yo du ndu gu ni ni naye na wene pangbanga, nataka pande pa zereda! Ako Yuda, mo mbákadi gamo apumbo, mo dígisi gamo azungahe, bambiko kungba boro asúsa nga rogo ro yo berewe te, i ba ni aba kindi.

Jump to: Chapter 2 →