Nahum 2

Zande

← Chapter 1 Jump to: Chapter 3 →

1Bakuadi ahe rukutu ye sa ro. Mo bánda nyanyaki agbata; ki ningere gene; ki tapa tiro; ki nyakasi tiro na omero du.

2Bambiko Yekova nakaraga ga Yakoba bairisa berewe wa ga Yisaraere bairisa, bambiko abagbarasi ahe kuya yo ki gbarasi gayo bakakue.

3I zamasi gu vurakube nga ga gako nyanyaki akumba, i ukadi gako kangará akumba ni ititi roko. Angbagidavura nakĩ wa we ti rago mbakada apai; abaso ki niwo awo gbe.

4Angbagidavura ki niyara ayara ngba agene bakporo, gu ki nifõ tihe kuti kura ha ngba basisi agene; kpiaha ki du wa mirawe, si naora wa aikpira gumba.

5Ko nayamba gako irisiirisi aboro, i nakotoka wa i nandu, i naipisa tiyo ku pati ngapa, ki mbakadi pa bandarago.

6I siri naiga ime, bambu bakindo ki zirĩ;

7i uru roko ti nairakporo, ki tindi ri ku sa yo, gari akanga ki nikpari ri, ni kpe wa ambipo nauruma pai, ni duruga gora kuti ngbadura.

8Nineve du wa gu ime munga nafu afu bau. I ki poi ku ari; “Oni rú nga! Oni rú nga!” ono a nga boro sa nakaraga tini ku sa yo te.

9Oni gbú feda ni gbu ahe, oni gbú dahabu ni gbu ahe! Bambiko kikiipaahe adiga nga te, na gu ũkumuko nga ga wene aũsunge dunduko a te.

10Kungba rago du! Bate na gberã rago! Kpotoyo yo nazizirã, gu rukusue ki nifõko tiru kuti gu kura ha, imisiripai ki du dimose yo dunduko, kpakpuyo dunduko ki du ni ndukudindukudi he!

11Wari du ga abaabahu sima ni, na simbia paranga abahu? yo babahu aye na gau umozi ku ho ni, yo awiru adu ni, a nga boro sa nagundesi ra te.

12Bahu ayepe pasio rukutu rengbe na awiru ki nikama gorõ anya tipa anara; ki nihisi gau amaga na umozi na gau asima na yepeyepe pasio.

13Yekova nga ga arimbasa ko naya, Mo ngére, mi gbarasi rimoro, mi azó gamo angbagidavura ku we yo, basape ki nyasi gamo paranga abahu; mi anyása gamo umozi auru kpotosende no, i agía nga fugo gamo abandusunge berewe te.

← Chapter 1 Jump to: Chapter 3 →

Recommended Reading

Commentary Nahum Commentaries → Devotional Nahum Devotional Guide → Get This Bible Zande Study Bible →