Nahum 3

Zande

← Chapter 2 Jump to:

1Na gberẽ he fu bakporo kure, nahi na pa zire na pa zuu― ũmozi adiga nga yo te!

2Woro giri dupo du, na woro ndu ngbagida, woro agu afarasi nagitikpa na woro agu angbagida naguka!

3Abanduri afarasi zuba, abasape nakĩ na taataa baso, rimbasa kpikpi aboro, guguda akangba ni bahe, ka bageda akangba adú nga ti ni ya― i nakotoka ti akangba!

4Bambiko gu ngenge bari nga ga gu debari, du na wene ngbaya ri nga nairasoroka, nabaga arikaaboro mbiko gari pa bari, na arika ngbatunga aboro mbiko gari soroka.

5Mo ngére, mi gbarasi rimoro, wo poi Yekova nga ga arimbasa ko, mi abá ga roko kina ku riro yo, mi ayúgo kundiri ro fu arikaaboro na ga pa zee fu angbi.

6Mi abá gbegberẽ kere ahe ku ri ro ki payasi paro, ki sa ro wa yuguyugu he gbayaga.

7Si adú wa gere ya agu yo dunduko nikabi ro i aóra be ro ki ya, Nineve du ni kungba rago; da nikakpara ha? wari ka mi gbata abangarãsi he ni?

8Mo ngba susi No-amona nadu ti ngba Nire? aime ki du pati he kirikiri, gaha bangbadarago ki ngia baime, gaha ngapa ki ngia baime a.

9Etiopia adu ni gaha baome, Ezipeta a, digidaha adu nga ti ni te; Puta na aRibue adu ni gaha amounda.

10Ono i adi he ku sa yo, si andu ni zizi he; i abafu gaha rukutu agude, i ki kuadi rukutu ba ri agene bakporo dunduko; i aba ake tipa gaha irisiirisi akumba, i avodi gaha abaakumba ni azogbo.

11Mo akpí imekakue a, i ki oko ro; mo agbáta nyanyaki bagbuko be vuraro.

12Gamo nyanyaki aba nadu wa avurumo dunduko na zamba bambata zuzu he ti ni ka i wo ti ni si atí kina ku ngba bari he yo.

13Mo ngére gamo arikaavura dagba roni du wa kina ade. Angbadimo gamo ringara du ni zaza ha gbagaza fu avuraro; we ariti gamo angbongbo angbadimo.

14Mo tú ime mbiko i ru nguru, ki nyakasi gamo nyanyaki aba; mo ndú ku ba pere yo, ki si he tipa dika he na ni, ki nyakasi bazobiriki!

15Yo we ka rita ro ni, basape adéwa ro ku sa yo. Si aríta ro wa abakirigba narita he. Oni ngéesi tironi wa abakirigba, oni ngéesi tironi a wa ayere!

16Mo angeesi gamo ababagiahe ki susi akerekuru ngbangbaturũ yo. Abakirigba nagbarasa ahe ki nigu ka ga.

17Gamo awiri abakindo i du wa ayere, gamo abakeapai du wa wangu anzede nasunga ri andugu rago zere― ono ho uru nakura ni, ami nigu ki ga; ka boro aina nga barara wari du ami ni ya.

18Ako bakindo aAsurio, gamo ababanda akandoro nara, gamo irisiirisi aboro naongoda. Gamo aboro du ni gbandakagbandaka yo ku ri abaagangara yo ka boro adu nga ho ka dungura yo ya.

19I arengba nga ka zeresa ga imisiri pai te, ga oro du ni kere he. Agu yo dunduko nagia pande gamo apai i ta be yo ku ri ro. Bambiko ga gbigbitapai mo ambu nga ha te da si ada nga ti ni ya?

← Chapter 2 Jump to: