1 Peter 2

Ahirani (आहिराणी नवा करार) - No Year

← Chapter 1 Jump to: Chapter 3 →

1एनासाठे सर्वा प्रकार ना वाईट व्यवहार सोळी द्या. दुसरास्ले धोका नका द्या, कपटी नका बना, दुसरास्ना संगे हेवा नका ठेवा, कोणा विरुद्ध मा वाईट गोष्ट नका करा.

2जसा नवा जल्मेल पोऱ्या आपली माय ना युध्द दुध नि ईच्छा ठेवस, तसाच तुमी परमेश्वर ना वचन ले आयकानी ईच्छा ठेवा, जेना कण तुमी परिपक्व हुई जावोत. तव परमेश्वर तुमले या जग ना वाईटस पासून वाचाळीन.

3कारण कि शास्त्र अस सांगस, “कारण कि तुमनी प्रभु ना चांगुलपणा ना स्वाद चाखी लीयेल शे.”

4प्रभु येशु ख्रिस्त ना जोळे या तो जिवंत दघळ शे, जेले लोकस्नी त बेकार समजीसन काळी दिधा, पण तो परमेश्वर द्वारा निवाळेल आणि तेनी नजर मा मूल्यवान शे. तुमी तेना जोळे उनात आणि जिवंत दघळ ना समोर आत्मिक भवन मा निर्मित हुई ग्यात. ह्या प्रकारे तुमी पवित्र यहुदी पुजारी-वर्ग बनीसन अशी आत्मिक बलिदान चळावू सकशान, जी येशु ख्रिस्त ना द्वारे परमेश्वर ले स्वीकार होवो.

6हय असच शे जस परमेश्वर नि आपला पुस्तक मा सांगेल शे, “देखा, मी कोणी असा ले जो कोनशील दघळ ना सारखा शे सियोन शहर मा ऱ्हास. जो पाया उभा करासाठे निवाळा मा एयेल शे. जो कोणी तेनावर विश्वास करीन, तो कोणत्याच प्रकारे लज्जित नई होवाव.”

7हवू दघळ तुमी लोकस साठे मूल्यवान शे ज्या प्रभु येशु ख्रिस्त वर विश्वास करतस. पण ज्या तेनावर विश्वास नई करतस तेस्ना साठे पवित्र शास्त्र हय सांगस, “ज्या दघळ ना वापर करा कण राजमिस्त्रीस्नी नकार करी टाक, तोच दघळ पाया उभा कराले सर्वास्तून महत्वपूर्ण ठरणा.”

8आणि पवित्र शास्त्र परत सांगस, “तो असा दघळ शे जेना कण लोकस्ले ठेस लागस, असा खळक शे जेना कण त्या ठोकर खातस.” तेस्नी वचन वर विश्वास करानी ईच्छा नई, एनासाठे त्या ठोकर खाईसन पळी जातस. परमेश्वर नि तेस्ले एनासाठे ठराव कि तेस्ना संगे असच होवो.

9पण तुमी असा नई शेतस, तुमी परमेश्वर नि निवाळेल प्रजा शेतस, तुमी राजकीय यहुदी पुजारी-वर्ग शेतस. तुमी परमेश्वर ले समर्पित करेल लोक शेतस, आणि परमेश्वर नि निजी प्रजा शेतस. तेनी तुमले आंधारा मधून आपला अदभूत उजाया मा बलायेल शे, एनासाठे कि तुमी परमेश्वर ना अदभूत कामस्ले प्रगट करी सकोत.

10पहिले तुमी परमेश्वर ना लोक नई होतात, पण आते परमेश्वर ना लोक शेतस. पहिले तुमी परमेश्वर नि कृपा ले नई वयखत होतात, पण आते तुमी तेले वयखतस कारण कि तेनी पहिले पासूनच आपली दया तुमना वर प्रगट करेल शे.

11ओ विश्वासीसहोण, मी तुमले विनंती करस कि तुमी स्वता ले बाहेर देश ना आणि प्रवासी समजीसन त्या जगिक वासनास पासून वाचीसन राहा ज्या आत्मा ना संगे युध्द करतस.

12दुसऱ्या जातीस्ना मधमा तुमी लोकस्ना वागणूक चांगल राहो. एनासाठे कि ज्या-ज्या गोष्टीस्मा त्या तुमले कुकर्मी सांगीसन तुमनी निंदा करतस, त्या तुमना चांगला कामस्ले देखीसन ख्रिस्त ना दुसरा सावा येवाना दिन परमेश्वर नि महिमा करतीन.

13प्रभु ना आदर मुळे, तुमी ह्या संसार ना ठरायेल शासकस्ना आधीन मा राहा, म्हणजे राजा ना जो सर्वास्तून उच्चा अधिकारी शे.

14आणि राज्यपालस्ना आधीन राहा. कारण कि त्या कुकर्मीस्ले दंड देवा साठे आणि चांगला कामस्ले करणारस्नि प्रशंसा करासाठे राजा ना कळून धाळामा एयेल शेतस.

15कारण कि हय परमेश्वर नि ईच्छा शे, कि आमना चांगला कामस्ना द्वारे, त्या लोक ज्या परमेश्वर ले नई वयखतस त्या आमना वर खोटा आरोप लावानी हिम्मत नई करावत.

16आते तुमी पाप ना दासत्व मा नईत, कारण कि आमना प्रभु येशु ख्रिस्त नि तुमले पहिलेच स्वतंत्र करी टाकेल शे. पण ह्या स्वातंत्रता ले वाईट ना साठे आळ नका बनावज्यात, पण आपला कामस्ना द्वारे हय प्रगट करा कि तुमी परमेश्वर ना खरा दास शेतस.

17सर्वास्ना आदर करा, सर्वा विश्वासी भावूस्वर प्रेम ठेवा, परमेश्वर ले भ्या, राजा ना सन्मान करा.

18ओ विश्वासी सेवकसहोण, तुमी ज्या घरस्मा काम करतस, तुमी आपला मालकस्नी आदन्यास्ना पालन करा आणि तेस्ना आदर करा. असा सर्वा मालकस्ना संगे करा, भले तो चांगला राहो, नम्र राहो कि कठोर राहो.

19कारण कि जर आमी परमेश्वर ना विचार करीसन अन्याय कण दुख उचलत क्लेश सहन करतस, त हय परमेश्वर ले आवळस. कारण कि आमले माहित शे कि परमेश्वर नि ईच्छा हईच शे, आणि परमेश्वर आमना शी खुश होस.

20पण कदी तुमी चूकीन करा मुळे दुख सहन करतस, त एनामा कोणतीच चांगली गोष्ट नई. पण जर चांगला काम ना साठे दुख भोगतस आणि धीर धरतस, त हय परमेश्वर ले आवळस.

21परमेश्वर ना द्वारे बलावामा येवाना एक आखो उद्देश हय बी शे, कि तुमी तेना साठे दुख भोगोत. कारण कि ख्रिस्त नि बी तुमी लोकस्ना साठे दुख भोगीसन तुमले एक उदाहरण दिधा कि तुमी बी तेना पद चिंन्हस्वर चाली सकोत.

22पवित्र शास्त्र सांगस, “नईत तेनी पाप कर आणि नईत तेना तोंड कण कपट नि कोणती गोष्टी निघनी.”

23जव लोक येशु ना अपमान करणात, त तो बदला मा तेस्ना अपमान नई करना. जव लोक तेले दुख दिनात त बदला मा तेनी तेस्ले धमकी नई दिधी. पण परमेश्वर वर विश्वास ठेव, कारण कि तेले माहिती होत कि परमेश्वर सत्यता कण सर्वास्ना न्याय करस.

24जव ख्रिस्त मरणा, त तो आमना पापस्नी शिक्षा आपला शरीर मा लिसन क्रूस वर चळी ग्या. तेनी अस एनासाठे कर कि आमी पाप करान सोळीसन धार्मिकता ना साठे जीवन जगोत. आणि तेनाच मार खावा कण तुमी बरा हुईनात.

25तुमी पहिले दवळेल मेंढ्यास्ना सारखा होतात, पण आते आपला जीव ना मेंडपाळ आणि अध्यक्ष म्हणजे ख्रिस्त ना जोळे परती एयेल शेतस.

← Chapter 1 Jump to: Chapter 3 →