1 Peter 5

Ahirani (आहिराणी नवा करार) - No Year

← Chapter 4 Jump to:

1तुमना मधून ज्या मंडळी वरिष्ठ शेतस, तेस्ले मनी काही सांगानी ईच्छा शे, कारण कि मी बी तुमना सारखा एक प्राचीनच शे. मनी स्वता ख्रिस्त ना दुखस्ले देखेल शे ज्या तेनी सहन करेल होतात, आणि जव तो दुसरा सावा परत ईन त मी बी तेनी महिमा मा सहभागी होसू. आते मी तुमले विनंती करस,

2कि परमेश्वर ना विश्वासीस्ना समूह नि राखोई करा, जेस्नी राखोई नि जबाबदारी तुमले देवामा एयेल शे. खुशी कण तेस्नी राखोई करा नई कि दबाव कण, कारण कि हईच परमेश्वर नि ईच्छा शे. त्या विश्वासीस्नी राखोई नीच कमाई साठे नई पण सेवाभाव कण करा.

3ज्या लोकस्नी जबाबदारी तुमले सोपामा एयेल शे, त्या लोकस्वर पुढारीस सारखा अधिकार नका जताळा. पण त्या लोकस साठे एक चांगला उदाहरण बना.

4आणि जव येशु ख्रिस्त जो आमना मुख्य चारणारा शे परत प्रगट हुईन, त तुमले महिमा ना मुकुट देवामा ईन, जेनी महिमा ना प्रकाश कदीच कमी नई होवाव.

5ह्याच प्रकारे ओ जवानसहोण, तुमी बी माथारा लोकस्ना आदन्यास्ना पालन करा, तुमी सर्वा एक-दुसरा नि नम्रता कण सेवा करा. कारण कि पवित्र शास्त्र सांगस, “परमेश्वर गर्व करणारस्ना विरोध करस, पण दीनस्वर कृपा करस.”

6ह्या साठे स्वता ले परमेश्वर ना समोर नम्र बनावा जो राखोई करामा बलवान शे, एनासाठे कि तो तुमले योग्य टाईम वरे उचलो.

7आपली सर्वी चिंता ना भार परमेश्वर वर टाकी द्या, कारण कि तो तुमनी ध्यान ठेवस.

8सावधान राहा, आणि जागत राहा, कारण कि तुमना विरोधी सैतान गर्जणार सिंह सारखा ह्या शोध मा फिरत ऱ्हास कि कोले फाळी खावू.

9तुमी आपला दृढ विश्वास कण तेना विरोध करा. आठवण ठेवा, कि तुमना विश्वासी भावू-बहिणी ज्या पुरा संसार मा ऱ्हातस, तुमनाच सारखा दुख भोगी ऱ्हायनात.

10परमेश्वर नि, जो सर्वी कृपा ना झरा शे, तुमी लोकस्ले येशु ख्रिस्त ना संगे आपली कायम नि महिमा ना भागीदारी होवा साठे बलायेल शे. तो तुमना थोळाच टाईम लगून दुख भोगा नंतर तुमले परिपूर्ण बनाईन एनासाठे कि तुमना मा कोणताच दोष नई राहो, तो तुमना हृदय ले दृढ करीन एनासाठे कि तुमना विश्वास तेनावर स्थिर हुई जावो.

11तो युगानयुग सामर्थ्यशाली रूप मा राज्य करीन, आमेन.

12मनी सारांश मा तुमले हय पत्र लिखेल शे आणि सिल्वान नि मदत कण, जेले मी ख्रिस्त मा विश्वास योग्य भावू समजस, हय पत्र तुमले धाळेल शे. मना लिखाना उद्देश हवूच शे कि तुमले प्रोत्साहित करू आणि विश्वास देवाळू कि जे तुमी अनुभव करी ऱ्हायनात ती खरज तुमना साठे परमेश्वर नि कृपा ना भाग शे, ह्या कृपा मा स्थिर राहा.

13बाबेल शहर ना विश्वासी लोक ज्या तुमना सारखाच परमेश्वर ना द्वारे निवाळेल शेतस, तुमले नमस्कार सांगतस. मार्क, जो मना पोऱ्या सारखा शे तुमले नमस्कार सांगतस.

14खरा प्रेम कण एक-दुसराले नमस्कार करा. परमेश्वर तुमी सर्वास्ले ज्या ख्रिस्त मा शेतस शांती देवो.

← Chapter 4 Jump to: