1 Peter 4

Ahirani (आहिराणी नवा करार) - No Year

← Chapter 3 Jump to: Chapter 5 →

1एनासाठे, जव कि ख्रिस्त नि शरीर मा ऱ्हायसन दुख उचल, त तुमी बी तीच भावना कण तेना सारखा दुख उचला साठे तयार राहा, कारण कि कदी तुमी ख्रिस ना साठे दुख उचलानी ईच्छा ठेवतस, त तुमनी पाप ले सोळी दियेल शे.

2परिणाम स्वरूप, तुमी ह्या जग मा आपला बाकी शारीरिक जीवन आपला पापमय स्वभाव ना वासनास्ले पुरा करामा नई व्यतीत कराव, पण तुमी परमेश्वर नि ईच्छा पुरी करा.

3कारण कि पहिला काय मा तुमी लोकस्नी दुसरा जातीस्ना ईच्छा ना नुसार काम करा मुळे जीवन व्यर्थ करणात. तुमनी आपला जीवन कामातुरपणा आणि वासनास्मा, दारूबाजी, रंगेलपण, बेवडापणा, आणि तेस्नी मूर्तीस्ले पूजा करामा तेना संगे परमेश्वर घृणा करस, बिताळ.

4एनासाठे तुमना जुना मित्र, जव तुमी तेस्ना वाईट कामस्मा साथ नई देतस त चकित होतस, एनासाठे त्या तुमले बर-वाईट सांगतस.

5पण एक दिन त्या निश्चितच परमेश्वर ना समोर प्रत्येक ले तेस्ना पृथ्वी वर करामा एयेल कामस्ना बारामा हिसाब-किताब देणा पळीन. आणि तो जित्ता आणि मरेलस्ना न्याय करीन.

6हईच कारण शे कि मरेलस्ले बी ख्रिस्त नि सुवार्ता आयकाळा मा उना. तेस्नी शरीर मा त माणुस ना सारखा दंड ना अनुभव कर आणि मरी ग्यात, पण आते परमेश्वर ना संगे कायम ना साठे आत्मा मा जित्ता शे.

7सर्वा गोष्टीस्नी समाप्ती लगेच होणार शे, एनासाठे तुमी हुशार आणि शांत बना कि तुमी प्रार्थना करी सकोत.

8सर्वास्तून चांगली गोष्ट हय शे, कि तुमी एक दुसरा वर जास्त प्रेम ठेवोत, कारण कि प्रेम गैरा पापस्ले झाकी लेस.

9बिगर कुरूकुरू करत आपला घरस्मा पाहुनास्ना स्वागत करा आणि तेस्ना सत्कार करा.

10प्रत्येक व्यक्ती ले परमेश्वर ना कळून कृपादान भेटेल शे, त्या त्या कृपादान ले परमेश्वर चांगला कारभारी ना सारखा दुसरास्नी सेवा करासाठे वापरमा लयो.

11जर कदी कोले प्रचार कराना वरदान भेटेल शे, त तो परमेश्वर ना संदेश ले प्रचार करो. कदी दुसरास्नी मदत कराना वरदान भेटेल शे, त ती शक्ती कण करो जी परमेश्वर देस. त जे काही तुमी करश्यात तेना कण येशु ख्रिस्त ना व्दारे परमेश्वर ले महिमा भेटीन. सर्वी महिमा आणि सामर्थ्य युगानयुग तेनीच शे. आमेन.

12ओ प्रिय विश्वासी मित्रसहोण, त्या पिळा दायक त्रासस कण जो तुमी ख्रिस्त ना साठे सहन करतस, आश्चर्य नका करा. पण ह्या गोष्टी एनासाठे हुई ऱ्हायनात, कि प्रगट हुई जावो कि तुमी परमेश्वर वर विश्वास ठेवतस कि नई. एनासाठे हय नका विचार करा कि तुमना संगे काही आल्लग हुई ऱ्हायन.

13पण जव तुमी ख्रिस्त ना दुख मा सहभागी होतस, त खुशी करा, कारण कि जव ख्रिस्त आपली महिमा ले सर्वा लोकस्वर प्रगट करासाठे परत ईन, तव तुमी आखो बी जास्त खुश हुई उठश्यात.

14ख्रिस्त ना मांगे चालणारा म्हणून कदी तुमना अपमान करामा एस, त तुमी धन्य शेतस. कारण कि परमेश्वर नि महिमामय आत्मा तुमना मधमा वास करस.

15जर तुमी दुख सहन करतस, त सावधान राहा कि हत्यारा, चोर व कुकर्मी होवा मुळे नईत दुसरास्ना कामस्मा हात टाका मुळे तुमी लोकस मधून कोणीच व्यक्ती दुख नई भोगो.

16पण कदी ख्रिस्त वर विश्वास करा मुळे दुख उचलतस, त लाज नका वाटू देयज्यात. पण ख्रिस्त ना नाव मुळे दुख उचलतस ह्या गोष्ट साठे परमेश्वर नि स्तुती करा.

17कारण कि न्याय ना टाईम ईजायेल शे, आणि सर्वास्तून पहिले परमेश्वर ना लोकस्ना न्याय करीन, आणि जव कि तो आमी विश्वासीस्ना न्याय पहिले करीन, त त्या लोकस्ना आखरी ना बारामा विचार करा ज्या परमेश्वर नि सुवार्ता ले नई मानतस.

18जस पवित्र शास्त्र मा लिखेल शे, “जरी कदी धर्मी माणुसलेच कठीणता कण तारण भेटस, त अधर्मी आणि पापी ना निश्चितच नाश हुई जाईन.”

19एनासाठे ज्या परमेश्वर नि ईच्छा प्रमाणे दुख उचलतस, त्या चांगल करत राहो आणि सृष्टी बनावनारा परमेश्वर ले विश्वास करत आपली आत्मा ले सोपी द्या.

← Chapter 3 Jump to: Chapter 5 →