1 Thessalonians 1

Ahirani (आहिराणी नवा करार) - No Year

Jump to: Chapter 2 →

1मी पौल, सिल्वान आणि तीमुथियुस संगे मियसन थेस्सलनीका शहर नि मंडळी ना लोकस्ले ज्या परमेश्वर बाप आणि प्रभु येशु मा शेतस, हई पत्र लिखस. मी प्रार्थना करस कि तुमले कृपा व शांती भेटत राहो. परमेश्वर तुमना वर कृपा करो व शांती देवो.

2आमी कायम तुमी सर्वास साठे परमेश्वर ना धन्यवाद करतस आणि कायम तुमले आपली प्रार्थनास्मा आठवण करतस.

3जव आमी आपला परमेश्वर बाप ले प्रार्थना करतस, तव आमी तुमना त्या कामस्ले ज्या तुमी ख्रिस्त वर विश्वास करा मुळे करतस आणि त्या कठीण परिश्रम ले जो तुमी प्रेम मुळे दुसरा ख्रिस्ती विश्वासीस्नी मदत करासाठे करतस आणि आमना प्रभु येशु ख्रिस्त मा आशा नि धीर ले कायम आठवण करतस.

4ओ आमना विश्वासी भावूसहोण, आमले माहिती शे कि परमेश्वर तुमना संगे प्रेम करस आणि तुमले निवाळेल शे कि तुमी तेना लोक बनोत.

5कारण कि आमनी ख्रिस्त ना बारामा सुवार्ता फक्त शब्दच मा नई पण पवित्र आत्मा सामर्थ्य कण तेनी पुरी खात्री करीसन तुमना लगून पोहोचाळेल शे. तुमले माहिती शे कि जव आमी तुमना संगे होतुत त आमना व्यवहार कसा होता, ते तुमना चांगला साठे होत.

6तुमनी मोठा क्लेश ले सहन करीसन बी पवित्र आत्मा नि खुशी कण त्या संदेश ले स्वीकार करीसन आमना उदाहरण आणि प्रभु ना उदाहरण ना अनुकरण कर.

7आठ लगून कि मासेदोनिया प्रांत आणि अखया प्रांतस्ना विश्वासीस साठे तुमी आदर्श बना.

8कारण कि तुमना आठून प्रभु ना वचन फक्त मासेदोनिया प्रांत आणि अखया प्रांतस्मा नई पण सर्वा युनानी प्रांतस्मा पसरी ग्या, आणि तुमना विश्वास नि चर्चा जी परमेश्वर वर शे, आमले प्रत्येक जागा वर आयकाले भेटणी कि आमले तुमना बारामा आखो काही सांगानी गरज नई पळणी.

9कारण कि त्या लोक स्वताच सांगतस कि कोणत्या प्रकारे तुमनी आमना स्वागत करेल होतात जव आमी तुमना जोळे एयेल होतुत, आणि कोणत्या प्रकारे तुमी मूर्तीस पासून दूर हुईसन परमेश्वर कळे फिरणात एनासाठे कि जिंदा आणि खरा परमेश्वर नि सेवा करी सकोत.

10आणि तेना पुत्र नि स्वर्ग मधून परत येवानी वाट देखी सकोत, म्हणजे येशु नि जेले परमेश्वर नि मरेल मधून जित्ता कर आणि जो आमले एणारा राग पासून वाचाळस.

Jump to: Chapter 2 →