1 Thessalonians 2

Ahirani (आहिराणी नवा करार) - No Year

← Chapter 1 Jump to: Chapter 3 →

1ओ विश्वासी भावूसहोण, तुमले माहिती शे कि आमन तुमना जोळे एन कितल फायदान होत.

2तुमले माहिती शे कि आमी तुमना जोळे थेस्सलनीका शहर मा येवाना पहिले फिलिप्पै शहर मा कितला दुख आणि अपमान सहन करनुत, आणि तठे इतला भारी विरोध ऱ्हातांना बी परमेश्वर नि आमले अशी हिम्मत दिधी कि आमी परमेश्वर नि सुवार्ता तुमले आयकाळनूत.

3कारण कि आमना उपदेश नईत भ्राती कण शे आणि नईत अशुद्धता ना उद्देश कण आणि नईत कपट कण शे.

4पण, आमी कायम जशी परमेश्वर नि ईच्छा शे तसाच प्रचार करतस, कारण कि परमेश्वर नि आमले योग्य ठराईसन सुवार्ता सोपेल शे, एनासाठे आमी माणसस्ले नई पण परमेश्वर ले खुश करतस जो आमना मनस्ले तपासस.

5तुमले चांगल्या प्रकारे माहिती शे आणि परमेश्वर बी ह्या गोष्ट ना साक्षी शे कि आमनी नईत कदी खुशामत ना गोष्टी सांगनुत आणि नईत आमनी कदी धन ना लोभ कण प्रेरित हुईसन काही करनुत.

6आमी माणसस कळून आदर नई देखत होतुत, नईत तुमना पासून आणि नईत कोणा कळून.

7जरी ख्रिस्त ना प्रेषित होवा मुळे तुमना कळून मदत लेवाना आमना अधिकार होता. तरी बी ज्या प्रमाणे माय आपला पोरस्ना पायन-पोषण करस, तसाच आमी बी तुमना मधमा राहीसन सौम्यता कण व्यवहार कर.

8एनासाठे तुमना कळे आमना प्रेम मुळे आमी नईत फक्त परमेश्वर नि सुवार्ता ले तुमना संगे वाटाणा देखत होतुत पण तुमना साठे आपला जीव बी देवाले तयार होतुत, एनासाठे कि तुमी आमना प्रेमय हुई जायेल होतात.

9कारण कि ओ विश्वासी भावूसहोण, निश्चित तुमी हय आठवण ठेवतस, कि आमनी कोणत्या प्रकारे कठीण परिश्रम करेल शे. आमनी रात दिन काम धंदा करीसन तुमना मधमा परमेश्वर नि सुवार्ता प्रचार करी कि तुमना मधून कोणावर वजन नई होवो.

10तुमी आमना साक्षी शेतस आणि परमेश्वर बी साक्षी शे कि तुमी विश्वासीस्ना संगे आमना व्यवहार कसा पवित्र आणि धार्मिक आणि निर्दोष ऱ्हायना.

11तुमले माहिती शे कि जसा बाप आपला पोरस संगे वागस, तसाच आमी तुमना मधून प्रत्येक ले उपदेश देत, शांती देत आणि समजाळत होतुत, आणि विनंती करत होतुत कि असा जीवन जगा जेना कण परमेश्वर खुश होवो, जो तुमले आपला राज्य नि महिमा ना साठे बलावस.

13एनासाठे आमी कायम परमेश्वर ना धन्यवाद करतस कि जव आमना व्दारे परमेश्वर ना वचन तुमना जोळे पोहोचना, त तुमनी तेले माणसस्ना नई पण परमेश्वर ना वचन समजीसन स्वीकार कर, जो खरज शे बी. हय परमेश्वर नि सुवार्ता तुमना मा ज्या ख्रिस्त वर विश्वास करतस आते बी कार्य करी ऱ्हायना शे.

14ओ विश्वासी भावूसहोण, तुमना संगे बी तसच हुईन जस यहूदीया प्रांत मा परमेश्वर ना मंडळीस्ना लोकस संगे जो ख्रिस्त येशु मा हुईन. तुमनी आपला लोकस पासून तसाच दुख भेटणा जसा तेस्ले यहुदीस पासून भेटेल होता,

15जेस्नी प्रभु येशु ले आणि भविष्यवक्तास्ले बी मारी टाक आणि आमले गैरा त्रास दिनात. परमेश्वर तेस्ना कण खुश नई आणि त्या सर्वा माणसस्ना विरोध करतस,

16आठ लगून कि तेस्नी बिगर यहुदीस्ना मधमा आमले त्या संदेश ना प्रचार करा पासून रोकनात जेना कण तेस्ना तारण हुईन. ह्या प्रमाणे त्या स्वता आपलाच पापस्ना घळा भरी ऱ्हायनात. आणि आते तेस्ना वर परमेश्वर ना भयानक राग ईपळेल शे.

17ओ विश्वासी भावूसहोण, जव थोळा टाईम साठे आमी शारीरिक रूप कण तुमना संगे नई होतुत, पण आमी कायम तुमना बारामा विचार करत होतुत. आमनी मोठा आशा कण तुमले परत भेटासाठे आखो जास्त प्रयत्न करनुत.

18आमी तुमना जोळे परत येवाना देखत होतुत. खास करीसन मी एक सावा नई पण गैरा सावा तुमना जोळे येवाना देखनु, पण सैतान आमले रोकी ठेवणा.

19आखरी मा ह्या तुमीच शेतस, तुमीच आमना प्रभु येशु ख्रिस्त ना समोर तेना येवाना टाईम वर आमनी आशा व खुशी व आमनी जीत मा बळाई ना कारण होवोत.

20निश्चितच आमनी बळाई आणि खुशी तुमीच शेतस.

← Chapter 1 Jump to: Chapter 3 →