2 Timothy 1

Ahirani (आहिराणी नवा करार) - No Year

Jump to: Chapter 2 →

1मी पौल, परमेश्वर नि ईच्छा ना नुसार ख्रिस्त येशु ना प्रेषित शे. मले त्या कायम ना जीवन ना प्रचार कराले धाळामा एयेल शे जो येशु ख्रिस्त वर विश्वास कराना द्वारे परमेश्वर देवाना करार करस. मी हवू पत्र तीमुथियुस तुले लिखस, जो मना प्रिय पोऱ्या ना सारखा शे.

2मी प्रार्थना करस कि परमेश्वर बाप आणि आमना प्रभु येशु ख्रिस्त ना कळून तुले कृपा आणि दया आणि शांती भेटत राहो.

3मी कायम तुले आपल्या प्रार्थनास्मा आठवण करत परमेश्वर ना धन्यवाद करस, जेनी सेवा मी आपला वळिल लोकस सारखी शुद्ध विवेक कण करस.

4मले आठवण शे कि तुनी आसू व्हावाळेल शेतस जव आमी आल्लग हुयेल होतुत, आणि मले तुले भेटानी गैरी ईच्छा शे, एनासाठे कि मना हृदय खुशी कण भरी जावो.

5मले तुना त्या निष्कपट विश्वास नि आठवण शे, ह्या प्रकार ना विश्वास तुनी आजी लोईस मा आणि तुनी माय युनीके मा बी होता. मले खात्री शे कि हवू विश्वास तुना मा बी शे.

6ह्या मुळे मी तुले आठवण देस कि त्या वरदान ना पूर्णपणे वापर करजो मना हात ठेवाना द्वारे परमेश्वर नि तुले दियेल शे.

7कारण कि परमेश्वर नि आमले जी आत्मा देयेल शे ती आमले भित्रा नई बनावत, पण सामर्थ्य ना आत्मा दियेल शे, जो आपले दुसरास्वर प्रेम कराले, आणि स्वता वर संयम ठेवाले मदत करस.

8ह्या मुळे प्रभु येशु नि साक्ष लोकस्ले सांगाले लाजजो नको, आणि नईत मना मुळे लाजजो जो ख्रिस्त येशु नि सेवा मुळे कैद मा शे. पण त्या सामर्थ्य ना वापर करीसन जो परमेश्वर नि तुले दियेल शे, सुवार्ता साठे मना संगे दुख उचल.

9परमेश्वर नि आमना तारण कर आणि पवित्र जीवन जगा साठे बलाव, आणि अस तेनी आमना पुण्य ना कामस मुळे नई पण आपला उद्देश आणि कृपा मुळे कर. सुरुवात पासून हय परमेश्वर नि ईच्छा होती (कि आमले प्रभु येशु ख्रिस्त नि कृपा भेटो,)

10पण आते येशु ख्रिस्त जो आमना तारणार शे ह्या दुनिया मा उना आणि आमना वर आपली कृपा प्रकट करना. तेनी मृत्यु नि सामर्थ्य ना नाश कर आणि सुवार्ता ना द्वारे आमले कायम ना जीवन ना रस्ता दावा.

11ह्या सुवार्ता साठे परमेश्वर नि मले प्रेषित, प्रचारक आणि उपदेशक बी ठराव.

12ह्या मुळे मी जेल मा दुखस्ले बी उचलस. पण मी तेना कण लाजत नई, कारण कि मले माहिती शे कि मना विश्वास कोणावर शे, आणि मले खात्री शे कि ख्रिस्त जेनी मले हय वारसा सोपेल शे आपला परत येवाना दिन लगून राखोई करू सकस.

13ज्या खरी शिक्षा मनी तुले शिकाळेल शे तीस्ले धरी ठेव, आणि ख्रिस्त येशु ना संगतीना विश्वास व प्रेम मा दृढ बनी ऱ्हाय.

14आमना मा येणारी पवित्र आत्मा ना सामर्थ्य ना द्वारे ह्या सत्य नि राखोई कर जी तुले सोपामा एयेल शे.

15तुले माहित शे कि आशिया प्रांत मा कईक विश्वासी लोकस्नी मले सोळी दिधा जेस्ना मा फुगल आणि हर्मगनेस बी शे.

16अनेसिफर ना घराणा वर प्रभु दया करो, कारण कि तेनी गैरा सावा मले भेटीसन मनी हिम्मत व्हाळायेल शे. तो मले जेल मा होवा मुळे लाज ना नई.

17पण जव तो रोम शहर मा उना, त गैरा यत्न कण मले झामलीसन मना संगे भेट करी.

18प्रभु अनेसिफर वर न्याय ना दिन मोठी दया दाखाळो. तुमी स्वता ले माहिती शे जव मी इफिस शहर मा होतु तव तेनी मनी कितली मदत करेल होती.

Jump to: Chapter 2 →