2 Timothy 2

Ahirani (आहिराणी नवा करार) - No Year

← Chapter 1 Jump to: Chapter 3 →

1एनासाठे ओ मना पुत्र तीमुथियुस, हय जानीसन बलवान हुई जा कि परमेश्वर नि तुनावर कृपा करेल शे जे फक्त ख्रिस्त येशु ना संगे नात बनावावर भेटस.

2त्या शिक्षास्ले ज्या तुनी गैरा साक्षस्ना उपस्थिती मा मना कळून शिकेल शे, मनी ईच्छा शे कि तू तीच शिक्षा दुसरा विश्वासीस्ले बी शिकाळ जेस्ना वर तू विश्वास करस, कि त्या बी दुसरास्ले शिकाळी सकोत.

3ख्रिस्त येशु ना चांगला योद्धा ना सारखा मना संगे दुख उचल.

4एक योद्धा जो सेना मा आपली सेवा दि ऱ्हायना हो तो कोणता बी प्रकार ना संसार ना कामस्मा नई फसत कारण कि तो आपला अधिकारी ले खुश कराना प्रयत्न करस.

5एक खेळाळू जो स्पर्धा मा भाग लेस, तो तठ लगून ईलाम नई जिकू सकत जठ लगून तो त्या खेळ ना नियमस्ना पालन नई करत.

6वावर मा काम करणार शेतकरीले, सर्वास्तून पहिले पिक ना हिस्सा भेटाले पाहिजे.

7ज्या उधारणस्ले मी तुले दि ऱ्हायनु तेस्ना बारामा विचार कर, कारण कि परमेश्वर एस्ले समजामा तुनी मदत करो.

8येशु ख्रिस्त कोण शे ह्या गोष्ट नि आठवण करत ऱ्हाय, तो जो राजा दाविद ना वंश शे, जेले परमेश्वर नि मरेल मधून परत जित्ता करा, आणि हईच सुवार्ता शे जो मी लोकस्मा प्रचार करस.

9मी गुन्हेगार सारखा जेल मा कैद शे आणि दुख उचली ऱ्हायनु कारण कि मनी सुवार्ता ना प्रचार करा. पण त्या लोकस्ले परमेश्वर नि सुवार्ता ना प्रचार करा कण नई रोकी सकावत.

10पण मी परमेश्वर ना निवाळेलस्ना फायदा साठे सर्व काही सहन करी ऱ्हायनु, एनासाठे कि त्या बी विश्वास करीसन त्या तारण ले प्राप्त करोत जो येशु ख्रिस्त मा शे, आणि कायम ना गौरव बी प्राप्त करोत.

11हय गोष्ट विश्वास करा योग्य शे, जर आमी तेना संगे मरी जायेल शेतस, त तेना संगे जित्ता बी होसुत.

12जर आमी तेना संगे दुख सहन करत ऱ्हासुत, त तेना संगे राज बी करसुत. जर आमी तेले वयखाले नकारसुत, त तो बी सांगीन कि आमी तेना नई शेतस.

13जर आमी विश्वास योग्य नई बी शेतस, तरी बी तो विश्वास योग्य सदा ऱ्हास कारण कि तो आपला स्वभाव ना विरुद्ध नई जावू सकत.

14लोकस्ले ह्या गोष्टीस्नी ज्या मनी तुले सांगेल शे आठवण देवाळीसन आणि परमेश्वर ना साक्षी बनीसन चेतावणी दे कि शब्दस्ना अर्थ वर वाद-विवाद नका करा. असा वाद-विवादस कण कोलेच फायदा नई होत पण आयकनारा बिगळी जातस.

15तू परमेश्वर ना वचनस्ले चांगल्या प्रकारे शिकाळत ऱ्हाय, आणि ज्या काम करस, तेस्ना मा लज्जित होवाना सारखा काही कारण नई राहो असा, आणि परमेश्वर ले स्वीकार योग्य असा सेवक बनाना पुरा प्रयत्न कर.

16अशुद्ध मूर्खपणा ना गोष्टीस पासून दूर ऱ्हाय, कारण कि ज्या लोक असा गोष्टीस्मा लागेल ऱ्हातस त्या आखो बी अशुद्ध मा वाळत जातस आणि परमेश्वर पासून दूर होत जातस.

17जसा सळेल घाव शरीर ले नुकसान पोहोचाळस तसाच तेस्ना गोष्टीस्ना प्रभाव बी शे जी आयकनारस्ना विश्वास ले नाश करस. हूमनाय आणि फिलेत बी तेस्नाच मधला शे.

18तेस्नी सत्य वर विश्वास कराले सोळीसन दवळी जायेल शे. त्या असा सांगतस कि ज्या ख्रिस्त मा मरी जायेल शेतस परमेश्वर नि पहिलेच कायम ना जीवन दि टाकेल शे, त्या असा सांगीसन काही विश्वासीस्ले उल्टा-फुल्टा करी टाकतस.

19पण परमेश्वर ना लोक त्या पक्का पाया सारखा शेतस जो कदी हालू नई सकत, आणि ह्या पाया वर हय लिखेल शे. “प्रभु ले माहिती शे कि तेना लोक कोण शेतस” आणि “जो कोणी प्रभु ना नाव लेस तो वाईट काम कराले सोळी देवो.”

20मोठा घर मा सर्वा प्रकार ना भांडा राहतस, तेस्ना मधून काही सोन आणि चांदी ना बनेल ऱ्हातस आणि काही माती आणि लाकूळ ना. काहीस्ना खास टाईम वर वापर होस आणि काहीस्ना साधारण टाईम वर.

21एनासाठे जर कोणी विश्वासी व्यक्ती स्वता ले सर्वा प्रकार ना वाईट पासून आल्लग करी लेस त तो त्या खास भांडा सारखा हुईन जेना वापर खास टाईम वर करामा एस. कारण कि त्या समर्पित शेतस आणि आपला मालक साठे उपयोगी शेतस आणि प्रत्येक चांगला कामस साठे तयार शेतस.

22पाप नि वासनास पासून पय जी जवानस्ले आकर्षित करस, आणि ज्या शुद्ध मन कण परमेश्वर ले मदत साठे हाक मारतस तेस्ना संगे धार्मिकता, विश्वास, प्रेम, आणि शांती ना पाठलाग कर.

23आणि मूर्खपणा आणि अज्ञान ना विवादस पासून दूर ऱ्हाय, कारण कि तुले माहित शे कि एस्ना कण झगळा निर्माण होतस.

24प्रभु ना दास झगळा करणार नको पायजे, पण सर्वास्ना संगे सौम्य आणि सहनशील राहाले पाहिजे आणि परमेश्वर ना वचन ले चांगल्या प्रकारे सिखाळणार पाहिजे.

25तो ह्या आशा कण आपला विरोधीस्ले नम्रता कण समजाळो, काय माहित कि परमेश्वर तेस्ले मन फिराव ना मन दि देवो कि त्या बी ख्रिस्त ना सत्य ले वयखोत.

26ह्या प्रकारे त्या शुद्धी मा ईसन सैतान ना फंदा मधून सुटी जातीन, जेनी तेस्ले आपली ईच्छा पुरी करासाठे आपला जाय मा फसाळी लीयेल शे.

← Chapter 1 Jump to: Chapter 3 →