2 Timothy 4

Ahirani (आहिराणी नवा करार) - No Year

← Chapter 3 Jump to:

1जव ख्रिस्त येशु एक राजा ना सारखा राज्य कराले ईन, तो त्या लोकस्ना ज्या जित्ता शे आणि मरी बी जायेल शेतस न्याय करीन. एनासाठे मी परमेश्वर आणि ख्रिस्त ले साक्ष मानीसन तुले आदेश देस,

2कि तू परमेश्वर ना वचन ना प्रचार करासाठे प्रत्येक टाईम ले तयार ऱ्हाय, भले लोक आयकोत कि नई आयकोत. तू मोठी हिंमत कण लोकस्ले सांग कि तेस्नी चूकीन करेल शे आणि तेस्ना पापस साठे तेस्ले दाट, पण जव तू तेस्ले पुरी सहनशीलता कण शिकाळस त तेस्ले प्रोत्साहित बी कर.

3कारण कि असा टाईम ईन जव लोक खरी शिक्षा ले नई आयकावत, पण त्या आपलीच ईच्छा प्रमाणे आपला साठे गैरा सावटा उपदेशक जमा करी लेतीन, ज्या तेस्ले त्याच गोष्टीस्ना प्रचार करतीन ज्या त्या आयकान देखतस.

4त्या खऱ्या गोष्टीस्ले आयकाले सोळीसन काल्पनिक गोष्टीस्ले आयका साठे मन लावतीन.

5पण तू सर्वी परिस्थिती मा सावधान ऱ्हायजो, दुख उचल, सुवार्ता प्रचार ना काम कर, आणि परमेश्वर ना सेवक ना रूप मा आपली सेवा ले पुरी कर.

6कारण कि परमेश्वर ना साठे मना जीवन आणि काम समाप्त होवावर शे, मले माहिती शे कि मना ह्या संसार मधून जावाना टाईम ईजायेल शे.

7मनी हय दौड मा आपल सर्वोत्तम दियेल शे, मनी आपली दौड ले पुरी करेल शे, आणि मी शेवट लगून विश्वास योग्य ऱ्हायनु.

8आते परमेश्वर नि मनासाठे स्वर्ग मा एक ईनाम ठीयेल शे कारण कि मनी धार्मिक जीवन जगेल शे जेना कण परमेश्वर खुश शे, प्रभु जो धार्मिकता ना संगे न्याय करस, जव तो दुनिया ना न्याय कराले ईन, तव तो मले तो मुकुट देईन. पण तो ते ईनाम फक्त मलेच नई देवाव पण प्रत्येक त्या मनुष्य ले दिन जो तेनी येवानी गैरी वाट देखी ऱ्हायना शे.

9मना जोळे लवकर येवाना प्रयत्न कर.

10कारण कि देमास नि ह्या जग ना वस्तूस्ले प्रिय समजीसन मले सोळी टाकेल शे, आणि थेस्सलनीका शहर ले चालना जायेल शे. क्रेसकेंस गलतिया प्रांत ले आणि तीत दालमतीया जिल्हा ले चालना जायेल शे.

11फक्त लूक मना संगे शे, जव तू येशी त मार्क ले आपला संगे लई एयजो, कारण कि मले सेवा-कार्य मा मले तेना कण गैरी मदत भेटीन.

12तुखिक ले मनी इफिस प्रांत मा धाडेल शे.

13जव तू येशी, तर मना वरला झगा जो मनी कार्प ना आठे, त्रोवस शहर मा सोळेल होता तेले लय एयजो, आणि पुस्तक बी, खास करीसन चर्मपत्रस्ले लय एयजो.

14आलेक्सांद्र तांबटानी मना संगे गैरा अन्याय करेल शे, प्रभु तेले तेना वाईट कामस्ना प्रमाणे बदला दिन.

15तू बी तेना पासून सावधान ऱ्हाय, कारण कि तेनी आपला शिक्षा ना गैरा विरोध करेल शे.

16जव मले पहिला सावा न्यायालय मा आपली सफाई देणी पळणी, मना पक्ष ना समर्थन मा, त कोणीच मना साथ नई दिना, सर्वास्नी मले सोळी दिध, आशा करस कि तेस्ले एना लेख देन नई पळाव मी प्रार्थना करस कि परमेश्वर तेस्ले माफ करो.

17पण प्रभु नि मनी मदत करी मले सामर्थ्य दिधी, एनासाठे कि मी ख्रिस्त येशु नि सुवार्ता पूर्णपणे आयकाळी सकू, आणि सर्वा दुसरी जाती ना लोक तेले आयकोत. आणि तेनी मना जीव ले मृत्यु पासून वाचाळ.

18प्रभु मले प्रत्येक वाईट कामस पासून सोळाईन आणि आपला स्वर्गीय राज्य मा सुरक्षित पोहोचाळीन. तेनीच महिमा युगानयुग होत राहो. आमेन.

19प्रिस्कील्ला आणि अक्विल्ला आणि अनेसिफर ना घराणा ले मना नमस्कार सांगजो.

20एरास्त करिंथ शहर मा ऱ्हाईग्या, आणि त्रफिम ले मी मिलेता शहर मा सोळेल शे, कारण कि तो तठे आजारी हुई जायेल होता.

21तू हिवाया तून पहिले येवाना प्रयत्न कर, युबुल, आणि पुदेस, आणि लीन व क्लौदिया, आणि सर्वा विश्वासी भावूस कळून तुले नमस्कार.

22प्रभु तुमनी आत्मा संगे राहो, परमेश्वर नि कृपा तुमी सर्वास्वर होत राहो.

← Chapter 3 Jump to: