Colossians 1

Ahirani (आहिराणी नवा करार) - No Year

Jump to: Chapter 2 →

1मी पौल, जो परमेश्वर नि ईच्छा कण ख्रिस्त येशु ना निवाळेल प्रेषित शे, आणि आमना भावू तीमुथियुस ना कळून,

2कलस्सै शहर मा राहाणारा ख्रिस्त मा त्या पवित्र आणि विश्वासी भावूस्ले हय पत्र लिखस. आणि मी प्रार्थना करस कि आमना बाप परमेश्वर आणि प्रभु येशु ख्रिस्त मा तुमले कृपा आणि शांती भेटत राहो.

3जव आमी तुमना साठे प्रार्थना करतस, तव आमी आपला प्रभु येशु ख्रिस्त ना बाप म्हणजे परमेश्वर ना धन्यवाद करतस.

4कारण कि आमी तुमना विश्वास ना बारामा जो प्रभु येशु ख्रिस्त वर शे आणि त्या प्रेम ना बारामा जो तुमी परमेश्वर ना लोकस संगे ठेवतस आयकेल शे,

5तुमना विश्वास आणि प्रेम त्या आशा वर निर्भर शे जो तुमना साठे स्वर्ग मा सुरक्षित ठेवामा एयेल शे. जेना बारामा तुमी पहिलेच आयकी लीयेल शेतस, जव काही लोक सर्वास्तून पहिले तुमना जोळे उनात आणि ख्रिस्त येशु नि सुवार्ता ले तुमले सांग, जो परमेश्वर ना सत्य वचन शे.

6जी सुवार्ता तुमना जोळे पोहोचनी, तिले आयकीसन गैरा लोक विश्वास करी ऱ्हायनात आणि सुवार्ता पुरा जग मा पसरी ऱ्हायनी, आणि ह्या गोष्ट कण तुमी पुरा समजी जायेल होतात कि परमेश्वर कितला कृपालु शे. आणि हय तेच शे जे तुमना मा बी असच करस.

7तुमनी परमेश्वर ना कृपा नि शिक्षा आमना सहकर्मी एपफ्रा ना कळून लीधी, जो आमना कळून ख्रिस्त ना विश्वास योग्य सेवक शे.

8तेनीच आमले तुमना त्या प्रेम ना बारामा सांगेल शे जो तुमले आत्मा ना द्वारे भेटेल शे.

9जव पासून आमी तुमना बारामा आयकेल शेतस तव पासून आमी तुमना साठे प्रार्थना आणि विनंती करी ऱ्हायनूत कि परमेश्वर तुमले पुरा आत्मिक ज्ञान आणि बुद्धी देवो, जेना कण तुमी तेनी ईच्छा ले पूर्णपणे समजी सको.

10एनासाठे कि तुमी प्रभु नि ईच्छा प्रमाणे जीवन जगाना योग्य बनोत आणि कायम जे तेले आवळस तेच करज्यात. तुमी सर्वा प्रकार ना चांगला कार्यस्ले करज्यात आणि परमेश्वर ले आखो बी चांगल्या प्रकारे समजा आणि तेनामा वाळत जावा.

11तेनी महिमा नि शक्ती ना नुसार सर्वा प्रकार नि सामर्थ्य कण बलवंत होत जावा, एनासाठे कि तुमी धीर व खुशी देणारी सहनशीलता कण आपला कष्टस्ले सहन करी सकोत.

12आणि परमेश्वर बाप ना धन्यवाद करत राहा, जेनी आमले ह्या योग्य बनाव कि उजाया ना राज्य मा पवित्र लोकस्ना संगे मिरास मा सहभागी होवो.

13कारण कि तेनी आमले अंधकार नि सामर्थ्य कण सोळाव आणि आपला प्रिय पुत्र ना राज्य मा प्रवेश करायेल शे.

14जेना बलिदान ना द्वारे परमेश्वर नि आमले सुटका म्हणजे पाप नि माफी दियेल शे.

15ख्रिस्त त नई दिखणारा परमेश्वर ना दिखणारा प्रतिरूप शे. तो त पुरी सृष्टी ना निर्मिती ना पहिले अस्तित्व मा होता आणि तो पुरा निर्माण करेल वस्तूस्मा जेष्ठ शे.

16तेनाच द्वारे परमेश्वर नि आकाश मा आणि पृथ्वी वर सर्व काही बनाव, दिखणारी आणि नई दिखणारी वस्तू, अधिकार आणि प्रधानता, आध्यात्मिक शक्ती, प्रभूता. परमेश्वर नि पुरा ब्रह्मांड नि रचना तेनाच द्वारे करी आणि तेनाच साठे बनावी.

17ख्रिस्त पुरी सृष्टी ना पहिले अस्तित्व मा होता, आणि तेनाच द्वारे पुरी सृष्टी एक क्रम मा आपला योग्य जागा वर स्थिर ऱ्हास.

18तोच आपला शरीर म्हणजे मंडळी ना डोक शे, तोच पहिले पासून जीवन ना स्त्रोत शे. तो मरेल मधून परत जित्ता होणारस मधून पहिला शे, कि सर्वा गोष्टीस्मा तोच सर्वश्रेष्ठ ठरो.

19कारण कि हय बाप परमेश्वरनाच निर्णय ना द्वारे शे कि तेना पुत्र म्हणजे ख्रिस्त मा परमेश्वर ना पुरा स्वभाव निवास करो.

20म्हणून तेनी क्रूस वर आपला रक्त ले व्हावाळीसन आपला जीव दिधा. परमेश्वर नि हय एनासाठे कर कि तेना द्वारे तो सर्वा वस्तूस्ना सामंजस्य आपला संगे कराई लेवो. ह्या प्रकारे तेनी आपला संगे पुरी पृथ्वी आणि आकाश नि गोष्टीस संगे शांती स्थापित करी.

21एक टाईम ले तुमी परमेश्वर पासून गैरा दूर होतात आणि आपला वाईट कामस्ना द्वारे आणि मन ना वाईट विचारस्ना द्वारे तेना शत्रू बनी जायेल होतात.

22पण आते, आपला पुत्र नि शारीरिक मोत ना द्वारे परमेश्वर नि तुमना संगे सामंजस्य करी लीयेल शे एनासाठे कि तुमले पवित्र आणि निष्कलंक, आणि निर्दोष बनाईसन आपली उपस्थिती मा लयो.

23पण तुमी ख्रिस्त मा विश्वास ना पाया वर दृढ बनी ऱ्हातस, आणि त्या सुवार्ता नि आशा ले जेले तुमनी आयकेल शे नका सोळा, जेना प्रचार आकाश ना खाले पुरी सृष्टी ना लोकस्ले करामा उना, आणि जेना मी, पौल, सेवक बनणु.

24आते मी त्या दुख मुळे आनंद करस जो मी तुमना साठे उचलस, मी ख्रिस्त ना क्लेश नि कमी जी राही जायेल शे, तेना शरीर म्हणजे मंडळी ना साठे, आपला शरीर मा पुरी करस.

25आणि मी परमेश्वर ना द्वारे त्या व्यवस्था नुसार मंडळी ना सेवक बनणु, जेनी मले मंडळी ना चांगला साठे हय काम सोप एनासाठे कि मी परमेश्वर ना वचन ले पुरा-पुरा प्रचार करू.

26म्हणजे त्या भेद ज्या युगानयुग आणि पिढीनपिढी लगून गुप्त ऱ्हायनात, पण आते तेना पवित्र लोकस्वर प्रकट हुयेल शे.

27हय परमेश्वर नि योजना शे कि तेना लोक तेना भेदना महिमा ना मुल्य ले समजो जो सर्वा जाती ना लोकस साठे शे आणि हवू भेद स्वता ख्रिस्त शे जो तुमना मा ऱ्हास. जी परमेश्वर नि महिमा नि आशा शे.

28एनासाठे आमी ख्रिस्त ना प्रचार सर्वा लोकस्मा करतस आणि पुरा ज्ञान कण प्रत्येक माणसस्ले शिकाळतस आणि जताळतस कि आमी प्रत्येक व्यक्ती ले ख्रिस्त मा सिद्ध करीसन परमेश्वर ना समोर उपस्थित करो.

29एनाच साठे मी तेनी ती शक्ती ना नुसार जी मना मा सामर्थ्य कण प्रभाव टाकस, तन मन लाईसन मेहनत बी करस.

Jump to: Chapter 2 →