Philippians 1

Ahirani (आहिराणी नवा करार) - No Year

Jump to: Chapter 2 →

1मी पौल, ख्रिस्त येशु ना दास होवा मुळे, आणि तीमुथियुस ना संगे फिलिप्पै शहर मा राहणारा परमेश्वर ना पवित्र लोकस्ले, अध्यक्ष आणि सेवकस्ले हई चिठ्ठी लिखस.

2आमना बाप परमेश्वर आणि प्रभु येशु ख्रिस्त मा तुमले कृपा आणि शांती भेटत राहो.

3जव कदी मी तुमनी आठवण करस, त मी तुमना साठे परमेश्वर ना धन्यवाद करस.

4आणि जव कदी मी तुमी सर्वास्ना साठे प्रार्थना करस, त मी खुशी कण प्रार्थना करस.

5कारण कि तुमी पहिला दिन पासून त आज लोंग सुवार्ता पसाराना काम मा मनी मदत करेल शे.

6आणि मले पुरा विश्वास शे कि ज्या परमेश्वर नि हय चांगल काम तुमी लोकस्मा सुरु कर, तोच तेले येशु ख्रिस्त ना येवाना दिन लोंग पुरा करीन.

7मनासाठे हय बर शे कि मी तुमी सर्वास साठे असाच विचार करू, आणि तुमी सर्वा मना मन मा बठी जायेल शेतस. कारण कि आते जव मी कैद मा शे आणि जव मी सुवार्ता नि राखोई साठे उत्तर आणि साक्ष देवाले आणि तेले दृढता कण स्थापित करासाठे मोक्या रूप मा कार्य करत होतु, त्या टाईम ले बी तुमी सर्वा मना संगे त्या कृपा मा सहभागी हुईनात जी परमेश्वर नि मनावर करेल शे.

8मी हय खर करी ऱ्हायनु कि तुमी सर्वास्ना साठे मना हृदय मा हय भावना स्वता ख्रिस्त येशु ना कळून एस, ह्या गोष्ट मा परमेश्वर मना साक्ष शे.

9मी हय प्रार्थना करस कि तुमना प्रेम खरा ज्ञान आणि विवेक मा आखो बी जास्त वाळत जावो.

10एनासाठे कि तुमी चांगल्या तून चांगल्या वस्तूस्ना बरोबर निवळ करामा योग्य बनोत. जव ख्रिस्त ईन, तव तुमी त्या दिन सगळी अशुद्धता आणि दोष कण स्वतंत्र होश्यान.

11तुमना जीवन धार्मिकता ना चांगला गुणस कण भरी जावो जो फक्त येशु ख्रिस्तच तुमना मधमा उत्पन्न करू सकस, जेना द्वारे परमेश्वर नि महिमा आणि स्तुती होस.

12ओ भावूसहोण, मनी ईच्छा शे कि तुमी हय समजी ल्या कि जे काही मना संगे हुयेल शे, तेना कण सुवार्ता प्रचार ना काम आखो जास्त व्हाळेल शे.

13आणि तेना परिणाम सम्राट नि राज्यभवन नि पुरी सेना आणि आखो गैरा लोकस्ले ह्या गोष्टी माहिती शेतस कि मी ख्रिस्त ना सेवक होवा मुळे जेल मा कैदी शे.

14मले जेल मा कैद होवा मुळे गैरा विश्वासी भावूस्ले ताखत भेटेल शे त्या प्रभु वर विश्वास ठीसन पयला पेक्षा जास्त हिंमत कण परमेश्वर ना वचन आयकाळतस.

15तेस्ना मधून काही द्वेष आणि झगळा मुळे ख्रिस्त ना प्रचार करतस पण काही चांगला मन कण बी ख्रिस्त ना प्रचार करतस.

16त्या लोक ज्या चांगला मन कण प्रचार करतस, कारण कि तेस्ले माहिती शे कि परमेश्वर नि मले सुवार्ता ना प्रतीउत्तर ना आणि तेले साबित कराना काम सोपेल शे.

17पण त्या लोक ज्या द्वेष कण ख्रिस्त ना प्रचार करतस स्वतास्ना स्वार्थ साठे असा करतस. कारण कि अस कराना द्वारे त्या विचार करतस कि त्या मनासाठे जेल मा आखो क्लेश उत्पन्न करतीन.

18एना कण मले काही फरक नई पळत. भले वाईट उद्देश कण राहो कि चांगला उद्देश कण, ज्या बी प्रकार कण हो ख्रिस्त ना प्रचार हुई त ऱ्हायना. मी एनाच मा खुश शे आणि खुशी करत ऱ्हासु.

19कारण कि मले माहिती शे कि तुमनी विनंती ना द्वारे, आणि प्रभु येशु ख्रिस्त नि आत्मा ना मदत कण मी मुक्त हुई जासू.

20मनी हय हार्दिक ईच्छा आणि आशा शे कि मले कोणतीच गोष्ट मा लज्जित नई होण पळो, पण मी पुरा बिगर भ्यावाना ख्रिस्त ना बारामा बोलू जसा कि आते लगून बोलत ईऱ्हायनु जेना कण मना शरीर ना व्दारे भले जीत्ती अवस्था मा व मरेल अवस्था मा ख्रिस्त नि स्तुती होत राहो.

21म्हणून मनासाठे जित्ता ऱ्हाण ख्रिस्त शे, आणि मरी जान फायदा शे.

22पण जर कदी जित्ता ऱ्हासुत आखो बी सामर्थ्य ना काम करी सकस, पण मले नई माहिती कि मी काय निवाळू.

23मी दोनीस कळून पेचमा शे, मले ह्या जीवन ले सोळीसन ख्रिस्त जोळे जावानी ईच्छा शे, जे कि मनासाठे जास्त चांगल शे.

24पण तुमना साठे मले जित्ता राहाण जास्त आवश्यक शे.

25मले हय खात्री शे आणि मले हय माहिती शे कि मी जित्ता ऱ्हासु आणि तुमना संगे राहीसन तुमनी मदत करसू, जेना कण कि तुमी विश्वास मा व्हाळत जावोत आणि खुश राहोत.

26जव मी तुमना जोळे परत एसू, त ख्रिस्त येशु जो मना द्वारे करी ऱ्हायना तेना मुळे तुमी येशु ख्रिस्त वर आखो जास्त गर्व कराले लागश्यात.

27फक्त ईतलच करा कि तुमना आचारण ख्रिस्त ना सुवार्ता ना योग्य होवो. भले मी ईसन तुमले देखू, आणि नई बी देखू. तरी बी तुमना बारामा हय आयकू कि तुमी एकच उद्देश्य कण आणि एक चित्त हुईसन सुवार्ता ना विश्वास साठे कष्ट करत ऱ्हातस.

28आणि आपला विरोधीस संगे ज्या तुमले त्रास देतस तेस्ले नका भ्या. कायम साहास ठेवा, आणि एना कण स्पष्ट हुई जाईन कि त्या हारतीन आणि तुमी जिती जाश्यात, कारण कि परमेश्वर तुमले जीत देस.

29कारण कि तुमी लोकस्ले नईत फक्त ख्रिस्त येशु मा विश्वास कराना, पण तेना मुळे दुख भोगाना बी वरदान भेटेल शे.

30आते तुमी मना संगे ह्या संघर्ष मा हिस्सा लेवू सकतस. हवू तोच संघर्ष शे जेले तुमनी मले फिलीप्पि शहर मा झगळतांना देख, आणि जसा कि तुमी आयकतस त्याच संघर्ष मा मी आज बी झगळस.

Jump to: Chapter 2 →