Philippians 4

Ahirani (आहिराणी नवा करार) - No Year

← Chapter 3 Jump to:

1एनासाठे ओ मना विश्वासी भावूसहोण, तुमी मना कितला प्रिय शेतस आणि मनी तुमले भेटणी ईच्छा शे. तुमी मनी खुशी शेतस आणि मले तुमना वर गर्व शे. ह्याच प्रकारे विश्वास मा मजबूत बनी राहा.

2मी युवदीये आणि सुंतुखे, ह्या दोनी बहिनिस्ले विनंती करस कि तुमी आपस मा वाद नई करता प्रभु मा एक मन कण राहा.

3ओ मना विश्वास योग्य सहकर्मी, मनी ईच्छा शे कि तू त्या बहिनस्नी मदत करो कारण कि तीस्नी मना संगे सुवार्ता आयकाळा मा, क्लेमेंत आणि मना दुसरा जोळीदारस संगे कष्ट करेल शे, जेस्ना नाव जीवन नि पुस्तक मा लीखायेल शेतस.

4तुमी प्रभु मा कायम खुश राहा, मी परत सांगस, खुश राहा.

5प्रत्येक झनस संगे सौम्यता कण वागा, प्रभु लवकरच येणार शे.

6कोणतीच गोष्ट नि चिंता नका करा, पण प्रार्थना आणि विनंती करीसन धन्यवाद कण आपला सर्वा गरजा परमेश्वर ना समोर ठेवा.

7आणि परमेश्वर नि शांती जी माणसस्नी समज तून बाहेर शे, तुमना हृदय आणि विचारस्ले ख्रिस्त येशु मा सुरक्षित ठिईन.

8एनासाठे ओ विश्वासी भावूसहोण, ज्या गोष्टी खऱ्या आणि आदरणीय शेतस, आणि ज्या ज्या गोष्टी धार्मिकता, ज्या ज्या गोष्टी प्रशंसनीय, आणि आनंददायक शेतस, आणि ज्या ज्या गोष्टी सदगुण आणि स्तुती ना शेतस, तेस्ना वर ध्यान लावत जा.

9जी शिक्षा तुमनी मना कळून शिकेल शे आणि जो उपदेश तुमनी मना पासून स्वीकारेल शे. आणि जो उदाहरण मनी आपला शब्द आणि कामस्ना द्वारे तुमले दाखाळेल शे तेस्ना पालन करा. तव परमेश्वर जो शांतीदाता शे तुमना संगे राहीन.

10मी प्रभु मा गैरा खुश शे कि आते इतला दिनस नंतर तुमना परत एक सावा मना बारामा चिंता दायेल शे. मना सांगाणा अर्थ हय नई शे कि तुमनी मनी चिंता कराले सोळी दियेल होत, पण हय कि तुमले संधी नई भेटणी.

11मी हय एनासाठे नई करी ऱ्हायनु कि मले कोणती गोष्ट नि कमी शे, कारण कि मनी प्रत्येक परिस्थिती मा तृप्त राहाण शिकी लीयेल शे.

12मले कमितरता मा बी राहाण माहिती शे आणि संपन्नाता मा बी राहाण माहिती शे. हरेक गोष्ट मा आणि सर्व्या स्थितीस्मा तृप्त होण, भुक्या राहाण, आणि जीवन ना उतार चळाव मा राहाण शिकेल शे.

13ख्रिस्त ना सामर्थ्य ना द्वारे मी सर्व्या परिस्थितीस्ना सामना करी सकस.

14पण तुमनी मनी दुख मा मनी मदत करीसन चांगलच कर.

15ओ मना प्रिय फिलीप्पि शहर ना मित्रसहोण, तुमले माहिती शे कि सुवार्ता प्रचार नि सुरुवात मा, जव मी मासेदोनिया प्रांत मधून निघणु तव फक्त तुमनीच मंडळी ना लोकस्नी मना लेन-देन ना बारामा मनी मदत करेल होती.

16ह्याच प्रकारे जव मी थेस्सलनीका प्रांत मा होतु तव तुमनी एक सावा नई पण कईक सावा मना गरजा पुरा करासाठे मले मदत धाळेल होती.

17अस नई शे कि मले दान पाहिजे, पण मनी ईच्छा शे कि हय तुमना साठे हुयेल चांगला कामस्नी यादी मा जोळाई जावो, जेना साठे परमेश्वर तुमले प्रतीफय दिन.

18जे काही तुमनी मले दिध ते सगळ काही मना जोळे शे, पण जास्त तून बी जास्त शे. ज्या वस्तू तुमनी एपफ्रदीत ना हात कण लीधाळेल होती तेस्ले लिसन मी तृप्त हुई जायेल शे, तो त परमेश्वर ना समोर सुखद सुगंध, स्वीकार करा योग्य अर्पण ना सारख शे, जो तेले आवळस.

19मना परमेश्वर बी आपला त्या धन ना प्रमाणे जो महिमा मा ख्रिस्त येशु मा शे, तुमनी प्रत्येक गरजस्ले पुरा करीन.

20आमना परमेश्वर बाप नि महिमा युगानयुग होत राहो. आमेन.

21येशु ख्रिस्त मा प्रत्येक पवित्र लोकस्ले नमस्कार सांगा. जो विश्वासी भावू मना संगे शे, तेस्ना कळून तुमले नमस्कार.

22सर्वा पवित्र लोकस कळून, खास करीसन ज्या रोमी सम्राट कैसर ना कर्मचारी तुमले नमस्कार सांगतस.

23आमना प्रभु येशु ख्रिस्त नि कृपा तुमना संगे राहो.

← Chapter 3 Jump to: