Philippians 3

Ahirani (आहिराणी नवा करार) - No Year

← Chapter 2 Jump to: Chapter 4 →

1एनासाठे ओ मना विश्वासी भावूसहोण, प्रभु मा सदा खुश राहा. मले ह्या गोष्टीस्ले परत लीखाले काहीच कष्ट नई शे, कारण कि मन अस करा मुळे तुमी भटका पासून वाचश्यात.

2ज्या वाईट काम करतस त्या लोकस पासून सावधान राहा. ज्या कुत्रास सारखा शेतस आणि ज्या सांगतस कि तारण प्राप्त करासाठे शारीरिक सुंता करन निश्चित शे.

3तेस्ना नई, पण तुमना खरा सुंता हुयेल शे, कारण कि आमी तेनी परमेश्वर नि आत्मा कण प्रेरित हुईसन तेनी उपासना करतस आणि येशु ख्रिस्त मा राहीसन आपला जीवन मा गर्व करतस आणि माणुसस्ना काम वर विश्वास नई ठेवतस.

4जरी मनापा कितलाक चांगला कारण शेतस कि मी माणुसस्ना काम वर विश्वास ठेवू, तरी बी कदी कोणी माणुसस्ना काम वर विश्वास ठेवाना विचार करस, त मी तेस्ना तून जास्त असा करी सकस.

5मना जल्म होवाना आठवा दिन ले मना सुंता हुयना जसा कि परमेश्वर नि आदन्या दियेल शे. मी जल्म पासूनच इस्त्राएली शे आणि बन्यामीन ना वंश ना शे, आणि मी एक पक्का इब्री माणुस शे. आणि मोशे ना नियमले पायाना द्वारे मी परूशी माणुस होतु.

6मना यहुदी धर्म ना प्रती उत्साह इतला होता कि मी मंडळीस्ले त्रास देत होतु. आठ लगून कि मी एक मोशे ना नियम ना पालन करणारा धर्मी व्यक्ती होतु, कारण कि मनी त्या सर्वा गोष्टीस्ना पालन करेल होत.

7पण त्या सगळ्या गोष्टी ज्या मनासाठे फायदा ना होवू सकत होत्यात, आते मी तेस्ले ख्रिस्त मुळे नुकसान ना समजी लीयेल शे.

8कारण कि मी मना प्रभु येशु ले वयखान देखस, जो सर्वा वस्तुस्तून जास्त मूल्यवान शे. एनासाठे मी सर्व्या वस्तूस्ले नुकसान समजस, आणि तेना मुळे मी सर्व्या गोष्टीस्ना नुकसान उचलनु, आणि तेस्ले कचरा समजस, एनासाठे कि ख्रिस्त ना आदन्याकारी बनी सकू.

9आणि तेना संगे पुरा रूप कण एक हुई जावू, मना जोळे मोशे ना नियमले मानीसन भेटणारी धार्मिकता नई शे. आते मना जोळे ती धार्मिकता शे जी ख्रिस्त वर विश्वास कराना द्वारे भेटस, ती धार्मिकता परमेश्वर कळून विश्वास करा मुळे भेटस.

10एनासाठे कि ख्रिस्त ले आणि तेना परत जित्ता होवानी नि सामर्थ्य ले समजी सकू, आणि तेना संगे दुखस्मा सहभागी हुईसन तेनी मृत्यु नि समानता ले प्राप्त करू.

11एनासाठे कि मी कसा बी करीसन मोत मधून परत जित्ता करावामा येवू.

12मी हय नई सांगत कि मी पहिले पासूनच यशस्वी हुई जायेल शे व सिद्ध बनी जायेल शे. पण मले तो ईलाम भेटो म्हणून मी प्रयत्न्य करी ऱ्हायनु जेना साठे ख्रिस्त येशु नि मले आपला अधिकार मा ली लीयेल शे.

13ओ मना विश्वासी भावूसहोण, मी असा विचार नई करत कि तो मले भेटी जायेल शे. पण मी हय करस कि ज्या गोष्टी मांगे ऱ्हाईजायेल शेतस तेस्ले ईसरी सन, पुळल्या गोष्टी कळे वाळत जास.

14एनासाठे स्वर्ग ना त्या ईलाम प्राप्त करासाठे मी निशाना कळे पयत जास, जेना साठे परमेश्वर नि मले ख्रिस्त येशु ना द्वारे बलायेल शे.

15एनासाठे, आमी सर्वा ज्या सिद्ध शेतस, हवूच विचार ठेवा. पण कदी तुमना मधून काहीस्ना काही आल्लग विचार हुईन त परमेश्वर तेले बी तुमना वर प्रगट करी दिन.

16तरी जठ लगून आमी पोहोची जायेल शेतस, त्याच प्रमाणे पुळे चालोत.

17ओ विश्वासी भावूसहोण, तुमी सर्वा मियसन मना अनुकरण करा. आणि त्या लोकस्वर ध्यान द्या ज्या ह्याच रिती ना अनुकरण करतस जो आमनी तुमना समोर ठेयेल शे.

18मी पहिलेच तुमले गैरा सावा हय सांगी टाकेल शे, आणि आते परत रळी-रळीसन सांगस, गैरा असा शेतस ज्या आपला जीवन ले जगाना द्वारे ख्रिस्त नि क्रूस वरनी मृत्यु नि बातमी ना विरोध करतस.

19तेस्न शेवट नाश शे, कारण कि त्या आपला शरीर ना ईच्छास्ले भागाळालेच जगतस. ज्या गोष्टीस्वर तेस्ले लज्जित होवाले पाहिजे जेस्ना त्या गर्व करतस, आणि फक्त जग ना गोष्टीवरच मन लावतस.

20आमना स्वदेश स्वर्ग मा शे, आणि आमी उत्सुकता कण तारणार प्रभु येशु ख्रिस्त ना स्वर्ग मधून येवानी वाट देखी ऱ्हायनूत.

21तो आपली ती शक्ती ना प्रभाव प्रमाणे जेना व्दारे तो सगळ्या वस्तूस्ले आपला आधीन मा करी सकस, तेनाच द्वारे तो आमनी कमजोर आणि शारीरिक देह ना रूपांतर करीन आणि आपला गौरव ना शरीर ना सारखा बनाई दिन.

← Chapter 2 Jump to: Chapter 4 →