Psalms 134

Amharic 2000 (የአማርኛ መጽሐፍ ቅዱስ (ሰማንያ አሃዱ))

← Chapter 133 Jump to: Chapter 135 →

1የእግዚአብሔርን ስም አመስግኑ፤ እናንተ የእግዚአብሔር ባሪያዎች ሆይ፥ አመስግኑት።

2በእግዚአብሔር ቤት ውስጥ፥ በአምላካችን ቤት አደባባይ የምትቆሙ።

3እግዚአብሔር ቸር ነውና እግዚአብሔርን አመስግኑ፤ ለስሙ ዘምሩ፥ መልካም ነውና፤

4እግዚአብሔር ያዕቆብን ለራሱ፥ እስራኤልንም ርስቱ እንዲሆን መርጦታልና፤

5እግዚአብሔር ታላቅ እንደ ሆነ፥ አምላካችንም ከአማልክት ሁሉ እንዲበልጥ አውቃለሁና።

6በሰማይና በምድር፥ በባሕርና በጥልቆችም ሁሉ፥ እግዚአብሔር የወደደውን ሁሉ አደረገ።

7ከምድር ዳር ደመናትን ያወጣል፤ ለዝናም ጊዜም መብረቅን አደረገ፤ ነፋሳትንም ከመዛግብቱ ያወጣል።

8የግብፅን በኵር ልጆች ሁሉ ከሰው ጀምሮ እስከ እንስሳ ድረስ ገደለ።

9ግብፅ ሆይ፥ በመካከልሽ በፈርዖንና በባሪያዎቹ ሁሉ ላይ ተአምራትንና ድንቅን ሰደደ።

10ብዙ አሕዛብን መታ፥ ብርቱዎችንም ነገሥታት ገደለ።

11የአሞራውያንን ንጉሥ ሴዎንን፥ የባሳንንም ንጉሥ ዐግን፥ የከነዓንን ነገሥታት ሁሉ ገደለ፤

12ርስት ምድራቸውንም ለሕዝቡ ለእስራኤል ርስት አድርጎ ሰጠ።

13አቤቱ፥ ስምህ ለዘለዓለም ነው፥ መታሰቢያህም ለልጅ ልጅ ነው፤

14እግዚአብሔር ለሕዝቡ ይፈርዳልና፥ ባሪያዎቹንም ያጽናናልና።

15የአሕዛብ ጣዖታት የብርና የወርቅ፥ የሰው እጅ ሥራ ናቸው።

16አፍ አላቸው፥ ግን አይናገሩም፤ ዐይን አላቸው፥ ግን አያዩም፤

17ጆሮ አላቸው፥ ግን አይሰሙም፤ አፍንጫ አላቸው፥ ግን አያሸቱም፤ እጅ አላቸው፥ ግን አይዳስሱም፤ እግር አላቸው፥ ግን አይሄዱም፤ በጕሮሮአቸው አይናገሩም፥ እስትንፋስም በአፋቸው የለም።

18የሚሠሩአቸው ሁሉ፥ የሚታመኑባቸውም ሁሉ እንደ እነርሱ ይሁኑ።

19የእስራኤል ወገኖች ሆይ፥ እግዚአብሔርን አመስግኑት፤ የአሮን ወገኖች ሆይ፥ እግዚአብሔርን አመስግኑት፤

20የሌዊ ወገኖች ሆይ፥ እግዚአብሔርን አመስግኑት፤ እግዚአብሔርን የምትፈሩት ሆይ፥ እግዚአብሔርን አመስግኑት።

21በኢየሩሳሌም የሚያድር እግዚአብሔር በጽዮን የተመሰገነ ነው።

← Chapter 133 Jump to: Chapter 135 →