Psalms 49

Amharic 2000 (የአማርኛ መጽሐፍ ቅዱስ (ሰማንያ አሃዱ))

← Chapter 48 Jump to: Chapter 50 →

1የአማልክት አምላክ እግዚአብሔር ተናገረ፥ ምድርንም ጠራት፤ ከፀሐይ መውጫ ጀምሮ እስከ መግቢያዋ ድረስ።

2ከክብሩ ውበት ከጽዮንም፥

3እግዚአብሔር በግልጥ ይመጣል። አምላካችንም ዝም አይልም፤ እሳት በፊቱ ይነድዳል፥ በዙሪያውም ብዙ ዐውሎ አለ።

4በላይ ያለውን ሰማይን ምድርንም በሕዝቡ ለመፍረድ ይጠራል፥

5እንደ ሕጉ መሥዋዕትን የሚያቀርቡትን፥ ጻድቃኑን ሰብስቡለት።

6ሰማያት ጽድቁን ይናገራሉ፥ እግዚአብሔር ፈራጅ ነውና።

7ሕዝቤ፥ ስማኝ ልንገርህ፤ እስራኤልም እመሰክርብሃለሁ፤ አምላክስ እኔ አምላክህ ነኝ።

8ስለ መሥዋዕትህ የምዘልፍህ አይደለሁም፤ የሚቃጠል ቍርባንህም ሁልጊዜ በፊቴ ነው።

9ከቤትህ ፍሪዳን፥ ከመንጋህም ጊደርን አልወስድም፤

10የዱር አራዊት ሁሉ፥ የምድረ በዳ እንስሶችና ላሞች ሁሉ የእኔ ናቸውና።

11የሰማይን አዕዋፍ ሁሉ አውቃለሁ፥ የዱር ውበትም በእኔ ዘንድ አለ።

12ብራብም አልለምንህም፥ ዓለም ሁሉ በመላው የእኔ ነውና።

13የፍሪዳውን ሥጋ አልበላም፥ የፍየሉንም ደም አልጠጣም።

14ለእግዚአብሔር የምስጋናን መሥዋዕት ሠዋ፥ ለልዑልም ጸሎትህን ስጥ፤

15በመከራህ ቀን ትጠራኛለህ አድንህማለሁ፥ አንተም ታከብረኛለህ።

16ኀጢአተኛውን ግን እግዚአብሔር አለው፦ “ለምን አንተ ሕጌን ትናገራለህ? ኪዳኔንም በአፍህ ለምን ትወስዳለህ?

17አንተስ ተግሣጼን ጠላህ፥ ቃሌንም ወደ ኋላህ መለስኽ።

18ሌባውን ባየህ ጊዜ ከእርሱ ጋር ትሮጣለህ፥ ዕድል ፋንታህንም ከአመንዝሮች ጋር አደረግህ።

19አፍህ ክፋትን አበዛች፥ አንደበትህም ሽንገላን ተበተባት።

20ተቀምጠህ ወንድምህን ታማዋለህ፥ ለእናትህም ልጅ ዕንቅፋትን አኖርህ።

21ይህን አድርገህ ዝም አልሁህ፤ ኀጢአት አማረችህን? እኔ እንዳንተ እሆን ዘንድ ጠረጠርህ? በፊትህ ቆሜ ልዝለፍህ?

22እግዚአብሔርን የምትረሱ እናንተ፥ ይህን አስተውሉ፤ አለዚያ ግን ይነጥቃል፥ የሚያድንም የለም።

23የከበረች መሥዋዕት ታከብረኛለች፥ እግዚአብሔር ማዳኑን ያሳየባት መንገድ በዚያ አለች።”

← Chapter 48 Jump to: Chapter 50 →