2 Chronicles 16

Amharic Dawro DFBE (ጌሻ ማጻፋ) No Year

← Chapter 15 Jump to: Chapter 17 →

1አሳይ ካተቴዳ ሀታማነ ኡሱፑን ላይን እስራኤልያ ካቲ ባእሽ ይሁዳ ቦላ ዎራጄዳ፤ ይሁዳ ካትያ አሳኮ ኦንነ ገለናዳንነ ከሰናዳን ተአናዉ ራማ ካታማ ዩሹዋ ምንሲደ ግምቤዳ።

2ሄዋ ጋሱዋን ካቲ አስ መና ጎዳ ጌሻ ጎልያነ ባረ ካትያ ጎልያ ሚሻ ምንጅያ ሳኣፐ ዎርቃነ ብራ አኬዳ። አኪደ ዳማስቆ ካታማን ደእያ ሶርያ ካትያ በንሀዳዳዉ ሀዋዳን ያጊደ የዴዳ፤ “ካሰ ታ አቡናነ ነ አቡና ጫቀቴዳዋዳን፥ አነ ታናናነ ኔናና ጫቀቶይተ። በአ፥ ታን ነዉ ብራነ ዎርቃ የዳድ። እስራኤልያ ካቲ ባእሽ ባረ ኦላንቻቱዋ ታ ጋድያፐ ከሳና ማላ፥ ኔን ካሰ አናና ጫቀቴዳ ጫቁዋ ኮላ” ያጌዳ።

4በንሀዳድ ካቲ አሳይ ጌዳዋ ማዪደ፥ ባረ ኦላ ጋዳዎቱዋ እስራኤልያ ካታማቱዋ ኦላናዉ የዴዳ። ኡንቱንቱ አይኖ፥ ዳናነ አቤል-ቤትማእካ ጌተትያ ካታማቱዋነ ንፍታሌማ ጋድያን ደእያ ሻሉዋ ምንጅያ ካታማቱዋ ኡባ ጾኔድኖ።

5ባእሽ ሄዋ ስሲደ፥ ራማ ካታማ ግምቢያዋ አግ ባሼዳ።

6ሄዋፐ ጉይያን፥ ካቲ አሳይ ይሁዳ አሳ ኡባ ሺሼዳ፤ አሳይ ባእሽ ካሰ ያን ጎኤትያ ሹቻነ ም ራማፐ ኬዜድኖ። እ ገባአነ ምጽጳ ጌተትያ ካታማቱዋ አን ምንሲደ ግምቤዳ።

7ሄ ዎደ ትምቢትያ ኦድያ ሀናን ይሁዳ ካትያ አሳኮ ዪደ፥ “ኔን ሶርያ ካትያን አማነታደ፥ መና ጎዳን፥ ነ ጾሳን፥ አማነታቤና ድራዉ፥ ሶርያ ካትያ ኦላንቻቱ ነ ኩሽያፐ ከስ አኬድኖ።

8ቶጵያ አሳቱነ ሊብያ አሳቱ፥ ጮራ ፓራ ጋረቱነ ፓራቱ ደእያ ዳሮ ኦላንቻቱዋ ግድክኖየ? ሽን ኔን መና ጎዳን አማነቴዳ ድራዉ፥ ጾሳይ ኡንቱንታ ነ ኩሽያን አ እሜዳ።

9አያዉ ጎፐ፥ ባረ ኩመን ዎዛናፐ ጾሳን አማነትያ አሳ ምንናዉ መና ጎዳ አይፊ ሳኣ ቦላን ኡባሳ ጼሌ። ኔን ሀ የዉዋን ኤያዳ፤ ሄዋ ድራዉ፥ ሀቼፐ ዶምና፥ ኔፐ ኦላይ ሻከተና” ያጌዳ።

10አሳይ ትምቢትያ ኦድያዋ ቦላ ዳሮ ሀንቀቴዳ፤ ቃሾ ጎለን የጌዳ። ቃይ አሳይ ሄ ዎደ አሳፐ አማሬዳዋ መቶዳ።

11አሳይ ኦዳባይ ኮይሮፐ ዉርሰ ጋካናዉ ይሁዳ ካተቱነ እስራኤልያ ካተቱ ታርክያ ማጻፋን ጻፈት ኡቴዳ።

12አሳይ ካተቴዳ ሀታማነ ኡዱፑን ላይን ገድያ ሳከቴዳ፤ አዉ ሳኩ ሎይ ዳሮፐካ፥ እ አክማቱዋ ኮዬዳፐ አትና፥ መና ጎዳ ኮይቤና።

13አሳይ ባረ ካተቴዳ ኦይታማነ እተንያ ላይን ሀይቂደ፥ ባረ ማይዛን ጋከቴዳ።

14ኡንቱንቱ አ አሃ ዱፉዋን ዱማ ዱማ ሽቱነ ሳዉ ደእያ ግሱዋ ቦላ ዎድኖ። ኡንቱንቱ አ ቦንቾ ዳሮ ም ዶሪደ፥ ታማ ኤደ፥ ዳሮፐ ዬኬድኖ። አሳይ ባረዉ ዳዊታ ካታማን ሹቻ ዎጪደ ጊግሴዳ ዱፉዋን አ ሞጌድኖ።

← Chapter 15 Jump to: Chapter 17 →