2 Chronicles 23

Amharic Dawro DFBE (ጌሻ ማጻፋ) No Year

← Chapter 22 Jump to: Chapter 24 →

1ላፑን ላይን ዮዳሄ ምኒደ፥ ጼቱዋ ካፓቱዋ ይሮሃማ ናኣ አዛርያሳ፥ ያሆሀናና ናኣ እስማኤላ፥ ዮቤዳ ናኣ አዛርያሳ፥ አዳያ ናኣ ማእሴያነ ዚክራ ናኣ ኤልሻፋጻ ሺሺደ፥ ኡንቱንቱና ቃላ ጫቁዋ ጫቀቴዳ።

2ኡንቱንቱ ይሁዳ ቢታ ኡባ ዩዪደ፥ ይሁዳ ካታማቱዋን ደእያ ሌዋቱዋነ እስራኤልያ ያራቱ ካፓቱዋ ኡባ አኪደ፥ የሩሳላመ ዬድኖ።

3ሄዋፐ ጉይያን፥ ሄ ሺቄዳ አሳይ ኡባይ ጾሳ ጌሻ ጎልያን ካትያና ቃላ ጫቁዋ ጫቄድኖ። ዮዳሄ ሄ አሳ፥ “ካትያ ናኣ ሀዋ በእተ! መና ጎዳይ ካሰ ዳዊታ ዘረባ ሃሳዬዳዋዳን እ ካተቶ።

4ህንተንቱ ኦናዉ በስያባይ ሀዋ: ሳምባታ ጋላሳን ሀ ጌሻ ጎልያ ገልያ ቄሳቱ ዋፐነ ሌዋቱዋፐ ሄዙ ኩሽያፐ እት ኩሺ ፐንግያ ናግተ፤

5ቃይ ሄዙ ኩሽያፐ እት ኩሺ ካትያ ጎለን ደእተ፤ ሄዙ ኩሽያፐ እት ኩሺ ቃይ ባሱዋ ፐንግያን ደእተ። አሳይ ኡባይ መና ጎዳ ጌሻ ጎልያ ዳባባ ሺቆ።

6ቄሳቱ ዋፐነ ኦያ ሌዋቱዋፐ አትና፥ ኦንነ መና ጎዳ ጌሻ ጎልያ ገሎፖ። ኡንቱንቱ ጌሻ ግድያ ድራዉ፥ ገልኖ፤ ሽን ሀራ አሳይ ኡባይ መና ጎዳ አዛዙዋ ናጊደ፥ ጌሻ ጎልያፐ ካረና ደእኖ።

7“ሌዋቱ ኡባይ ባረንቱ ኦላ ሚሻ ባረንቱ ኩሽያን ኩሽያን ኦይቂደ፥ ካትያ ግዶዪደ፥ ካቲ ከስያ ዎደነ ገልያ ዎደ ኡባን አናና እትፐ ደእኖ። ጌሻ ጎልያ ገልያ ኦናነ ዎተ” ያጌዳ።

8ሌዋቱነ ይሁዳ አሳይ ኡባይ ቄሲ ዮዳሄ አዛዜዳዋ ኡባ ኦድኖ። ቄሲ ዮዳሄ ሳምባታን ኦሱዋፐ ከሳናዉ በስያ ሌዋቱዋ ከሲደ የድቤና። ሄዋ ድራዉ፥ ናጉዋ ካላይ ጋኬዳዋንቱካ ናጉዋ ካላን ፖሌዳዋንቱካ ኡባይ ያን ደኢኖ። ሄዋን ካፓቶ አካናዉ ግድያ አሳይ ደኤ።

9ሄዋፐ ጉይያን፥ ቄሲ ዮዳሄ ጾሳ ጌሻ ጎልያን ደእያ፥ በን ካትያ ዳዊታ ቶራቱዋ፥ ዎጋ ጎንዳለቱዋነ ቄር ጎንዳለቱዋ ካፓቶ እሜዳ።

10አሳይ ኡባይ ኦላ ሚሻ ባረ ኩሽያን ባረ ኩሽያን ኦይቂደ፥ ጌሻ ጎልያዉ ኡሸቻ ባጋፐ ሀድርሳ ባጋ ጋካናዉ፥ ያርሽያ ሳኣ ማታንነ ጌሻ ጎልያ ማታን ካትያ ዩሹዋን ኤቃናዳን ቄሲ ዮዳሄ ኦዳ።

11ሄዋፐ ጉይያን፥ ዮዳሄ ካትያ ናኣ ዮኣሻ ካረ ከሲደ፥ አ ሁጲያን ካላቻ ዎዳ፤ ካዉታ ህግያ ማጻፋ አዉ እሚደ ካተዬዳ። ዮዳሄነ አ ናናይ ዮኣሻ ኦኪደ፥ “ካቲ ሸምፑዋ ጋምኦ!” ያጌድኖ።

12አሳይ ዎጺደነ ካትያ ሳቢደ ሆምቦጭያዋ አታላ ስሴዳ ዎደ፥ አሳኮ መና ጎዳ ጌሻ ጎልያ ባዱ።

13ካቲ ፐንግያን ባረ ቱሳ ማታን ኤቄዳዋ በኣዱ። ካፓቱነ ጹሩምባ ፑንያዋንቱ ካትያ ማታን ደኢኖ፤ ይሁዳ አሳይ ኡባይ ናሸቲደ፥ ጹሩምባ ፑኒኖ፤ ማዝሙርያ የጽያዋንቱካ ስንዉ አደ፥ ባረንቶ ደእያ የ ሚሻን ጋላቲኖ። አታላ ባረ ማዩዋ ፔደ፥ “ሀዌ ማካላ! ሀዌ ማካላ!” ያጋደ ዋሳዱ።

14ቄሲ ዮዳሄ ኦላንቻቱ ካፓቱዋ፥ “አታሎ መና ጎዳ ጌሻ ጎልያን ዎፕተ! ኦ ያናነ ሃና ሳልፒደ ሳልፐቱዋ ግዱዋን ዎደ፥ ካረ ከስተ፤ እዞ አሻናዉ ካጄልያ አሳይ ደኦፐ ዎተ!” ያጌዳ።

15ሄዋ ድራዉ፥ ኡንቱንቱ እዞ ኦይቂደ፥ ካትያ ጎልያ አፌድኖ፤ ፓራ ፐንግያን እዞ ዎድኖ።

16ሄዋፐ ጉይያን፥ ዮዳሄ እ ባረ ሁጲያዉ፥ አሳይ ኡባይነ ካቲ መና ጎዳ አሳ ግዳናዳን ቃላ ጫቁዋ ዎዳ።

17ሄ ዎደ አሳይ ኡባይ ባኣላ ኤቃ ጎልያ ቢደ፥ ሄ ጎልያ ክንቼዳ፤ ያርሽያ ሳአቱዋነ ምስለቱዋ ክንቼሬዳ። ቃይ ማታና ግያ ባኣላ ቄስያ ያርሽያ ሳአቱ ስንን ዎድኖ።

18ዮዳሄ ቄሳቱ ዋነ ሌዋቱዋ መና ጎዳ ጌሻ ጎልያ ኦሶ ካፑዋ ኦደ ሱንዳ። ኡንቱንቱ ኪታይ ሙሴ ህግያን ጻፈቴዳዋዳን መና ጎዳዉ ጹግያ ያርሹዋ ያርሽያዋነ ካቲ ዳዊተ ኦዴዳዋዳን ማዝሙርያ የጽያዋነ ባላ ቦንችስያዋ።

19ህግያን ጻፈቴዳዋዳን ቱና አሳይ እቱነ ገለናዳን ዮዳሄ መና ጎዳ ጌሻ ጎልያ ፐንግያን ናግያዋንታ ዎዳ።

20ዮዳሄ ጼቱዋ ካፓቱዋ፥ ዎልቃማ አሳቱ፥ ደርያ ሞድያዋንታነ ሄ ቢታ አሳ ኡባ ባረናና አኪደ፥ ካትያ መና ጎዳ ጌሻ ጎልያፐ ዱገ ዎዳ። ቆሞ ባጋ ፐንግያና ካትያ ጎልያ ገሌድኖ፤ ካትያ ካዉተ አራታን ኡትሴድኖ።

21ያትና ይሁዳ አሳይ ኡባይ ናሸቴዳ። አታላ ካትያ ጎለን ማሻን ሀይቄዳዋፐ ጉይያን፥ ካታማይ ዎፑ ጌዳ።

← Chapter 22 Jump to: Chapter 24 →