2 Chronicles 4

Amharic Dawro DFBE (ጌሻ ማጻፋ) No Year

← Chapter 3 Jump to: Chapter 5 →

1ሄዋፐ ጉይያን፥ ሶሎሞነ ጌሳይ ላታሙ ዋ፥ ጎምፓይ ላታሙ ዋ፥ ጌሳይ ታሙ ዋ ግድያ ያርሽያ ሳኣ ናሃስያ ብራታፐ ኦስሴዳ።

2ቃይ ናሃስያ ብራታ ሲልሲደ፥ ዶናይ ያ ጋጻፐ ሀ ጋጻ ጋካናዉ ታሙ ዋ፥ ጌሳይ እቼሹ ዋነ ዩሹ ሀታሙ ዋ ግድያ አባ ግያ ሳኒያ መሴዳ።

3አባ ሳኒያ ዶናን ካረ ባጋና ዝቂ ጊደ፥ አናና ኦይቀቲደ መቴዳ ምስለቱ ደኢኖ፤ ሄ ምስለቱ ላኡ ማራን ደእያ ቦራቱዋ ምስለቱዋ።

4ሄ አባ ሳኒ ናሃስያ ብራታፐ መቴዳ ታማነ ላኡ ቦራቱዋ ምስለቱ ዞክያን ኡቴዳ። ቦራቱዋፐ ሄዛቱ ሁጲሳ ባጋ፥ ሄዛቱ አዋይ ዉልያ ባጋ፥ ሄዛቱ ገድሳ ባጋ፥ ሄዛቱ ቃይ አዋይ ዶልያ ባጋ ስሚደ ጼልያዋ ማላትኖ። አባ ሳኒ ኡንቱንቱ ቦላ ኡቴዳ፤ ኡንቱንቶ ጉየ ባጋይ ግዱዋኮ ስም ኡቴዳ።

5አባ ሳኒ እት ታካ ኬሻ ኦርዱዋ፤ አ ዶናይ ዋንጫ ዶና ማላ፤ ቃይ ጪሻይ ጪሼዳዋካ ማላቴ። ሄ አባ ሳኒ ኡሱፑን ታሙ ሻአ ሊትሮ ግድያ ሃ ኦይቂያዋ።

6ሶሎሞነ ቃይካ ሜጨትያ ታሙ ከረቱዋ መሴዳ፤ መሴዳ እቼሻቱዋ ገድሳ ባጋና፥ ቃይ እቼሻቱዋ ሁጲሳ ባጋና ዎዳ። ኡንቱንቱን ጹግያ ያርሹዋ አሹ ሜጨቴ፤ ሽን አባ ሳኒያ ሃን ቄሳቱ ሜጨትኖ።

7ሄዋፐ ጉይያን፥ ሶሎሞነ ኡንቱንቶ እመቴዳ ሀልቹዋዳን ጾምፕያ ዎያ ባላቱዋ ታማቱዋ ዎርቃፐ ኦስሲደ፥ እቼሻቱዋ ኡሸቻ ባጋና፥ እቼሻቱዋ ሀድርሳ ባጋና ጌሻ ጎልያ ግዶን ዎዳ።

8ቃይካ እ ታሙ ጻርጴዛቱዋ ኦደ፥ እቼሻቱዋ ኡሸቻ ባጋና፥ እቼሻቱዋ ሀድርሳ ባጋና ጌሻ ጎልያ ግዶን ዎዳ። ቃይ ጼቱ ኩይጻሮቱዋካ ዎርቃፐ መሴዳ።

9ሶሎሞነ ቄሳቶ ግዶ ዳባባነ ካረ ባጋ ዎልቃማ ዳባባ ጊግሴዳ፤ ዳባባዉ ፐንገቱዋ ጊግሲደ፥ ፐንገቱዋ ናሃስያ ብራታን ሼሼዳ።

10አባ ሳኒያ ጌሻ ጎልያፐ ገድሳ አዋይ ዶልያ ባጋ ዎዳ።

11ሁራም ከረቱዋ፥ አካፋቱዋነ ኩይጻሮቱዋ መዳ፤ ያቲደ ሁራም ካትያ ሶሎሞናዉ ጾሳ ጌሻ ጎልያን ኪታ ኦደ ፖሌዳ።

12እ ኦዳ ኦሶቱካ ላኡ ቱሳቱዋ፥ ቱሳቱዋ ሁጲያን ዎያ ሳአይነ ማላ ላኡ ጉምቦቱዋ፥ ቱሳቱዋ ቦላይ ደእያ ላኡ ጉምቦቱዋ አሌቂስያ ላኡ ግተ ማላ ሳንሳላታቱዋ፥

13እት እት ጉምቡዋ ቦላ ላኡ ማራን ናሃስያፐ መቴዳ እት እት ጼቱ ሮማነ ቴራ ምስለቱዋ፥ ኡባና ኦይዱ ጼቱ ሮማነ ቴራ ምስለቱዋ፥

14ታሙ ጋረቱዋ፥ ጋረቱዋ ቦላን ዎያ፥ ሜጨትያ ታሙ ከረቱዋ፥

15አባ ሳኒያነ አፐ ጋርሳን ደእያ ታማነ ላኡ ቦራቱዋ ምስለቱዋ፥

16ከረቱዋ፥ አካፋቱዋ፥ ዛምቤልያነ ሀራ ሚሻቱዋ ኡባ። ሁራም ካትያ ሶሎሞናዉ መና ጎዳ ጌሻ ጎልያ ኦሶ መዳ ሀ ሚሻቱዋ ኡባ ቁጨቴዳ ናሃስያፐ መዳ።

17ካቲ ሶሎሞነ ሱኮታፐነ ጻሬዳፐ ግዱዋን፥ ዮርዳኖሳ ደምባን ደእያ ናሃስያ ብራታ ሲልስያ ሳኣን ሀዋንታ ኡባ ኦስሴዳ።

18ናሃስያ ብራታፐ መቴዳ ሀ ሚሻይ ኡባይ ሎይ ዳሮ ግዴዳ ድራዉ፥ ዎይሳ ዴጽንቶ፥ ልኪ ኤረትቤና።

19ቃይካ ሶሎሞነ ጾሳ ጌሻ ጎልያ ደእያ ሚሻቱዋ ዎርቃፐ ኡባ መሴዳ። ሄዋንቱካ ዎርቃፐ ኦዳ ያርሽያ ሳኣ፥ ጾሳ ስንን ዎያ ኡክይ ኡትያ ጻራጴዛ፥

20ኡንቱንቶ ዎዳ ዎጋዳን ኡባፐ አያ ጌሻ ሳኣ ስንን ፖአናዳን ጾምፕያ ዎያ ዎርቃ ባላቱዋ፥ ኡንቱንቱ ዎርቃ ጾምፐቱዋ፥

21ጌሻ ዎርቃፐ ኦዳ ጪሻ ምስለቱዋ፥ ጾምፕያ ቶይስያ ቃጰቱዋ።

22ጾምፕያ ቶይስያ ቃጰቱዋ፥ ኩይጻሮቱዋ፥ እጻና ጩዋይያባቱዋነ ታማ አክያ ሚሻቱዋ። ሀ ሚሻቱ ኡባይ ጌሻ ዎርቃፐ ኦሰቴድኖ። ጌሻ ጎልያዉ ካረ ባጋ ፐንገቱዋነ ኡባፐ አያ ጌሻ ሳኣ ገልያ ፐንገቱዋ ዎርቃን ሼሼዳ።

← Chapter 3 Jump to: Chapter 5 →