Exodus 2

Amharic Dawro DFBE (ጌሻ ማጻፋ) No Year

← Chapter 1 Jump to: Chapter 3 →

1ሄ ዎደ እት ሌዊያ ቆሞ ግዴዳ ብታኒ ሌዋዌ ማጫውኖ አኬዳ፤

2እዛ ሻሃራደ አቱማ ናኣ የላዱ። ናአይ ማላ ሎኦ ናኣ ግድያዋ እዛ በኣደ፥ ሄዙ አግና ቆሳዱ።

3ሽን እዛ ሄዋፐ ዳሩዋ ቆሳናዉ ዳንዳየናዋ ኤራደ፥ ጫርያፐ ቁንኣ አዉ ዳዳዱ፤ ያታደ ሃይ ገለና ማላ ሽድያን ማራጋደ፥ ናኣ አ ግዶን ዎዱ፤ ናይለ ሻፋ ጌተትያ ሃ ዶናን ጫርያ ግዶን ዎዱ።

4አ ምቻታ እ ሀንያባ በአናዉ ሃኩዋን ኤቃዱ።

5ግብጼ ካትያ ናታ ቦላ ሜጨታናዉ ናይለ ግያ ሻፋ ዎዱ፤ እዝ ማጫ ቆማቱ ሃ ዶናን ያነ ሃነ ሀመቲኖ፤ እዛ ቁንኣ ጫርያ ግዶን በኣደ፥ ባደ አካ ያና ማላ ባረ ቆማቶ ኪታዱ፤

6ቁንኣ ፖካደ፥ በእተ ሀዋን ቄር ናአይ ዬክ ደኤ፤ እዛ አዉ ቃረታደ፤ “ሀዌ እብራዌቱ ቄር ናናቱዋፐ እቱዋ” ያጋዱ።

7ሄ ዎደ አ ምቻታ ካትያ ናቶ፥ “ነዉ ሀ ናኣ ንናዉ እብራዌ ማጫ አሳፐ እትኖ ጼሳናዉ ቦ?” ያጋደ ኦቻዱ።

8እዛ፥ “ኤ፥ ባ” ያጋዱ። ናታ ባደ፥ ሄ ናኣ ዳዮ አሃዱ።

9ካትያ ናታ ሄ ምሽራቶ፥ “ሀ ናኣ አፋደ፥ ታዉ ንሻ፤ ታን ነዉ ድርጉዋ ጭጋና” ያጋዱ። ምሽራታ ናኣ አፋደ፥ ንዱ።

10ናአይ ድጭና፥ ካትያ ናትኮ አ አሃዱ፤ እ እዝዉ ናኣ ግዴዳ፤ “ታን ሃፐ አ ከሳድ” ጋደ፥ ሙሳ ጋ ሱንዱ።

11ሙሴ ድጭ ዎጋ ግዲደ፥ እት ጋላስ ባረ አሳይ ደእያ ሳኣ ቢደ፤ ኡንቱንቱ ዴጾ ኪታ ኪተትሽን ጼሌዳ። ግብጼ ቢታ አሳ እቱ፥ እሻቱዋ ግዴዳ እብራዋቱዋፐ እቱዋ ዋሽን በኤዳ።

12እ ያ ሃ ጼልና፥ ኦንነ ባይናዋ በኢደ፥ ሄ ግብጼ ብታንያ፤ ዎደ ሻፍያ ግዶን ቆሴዳ።

13ዎንተ ጋላስ ከሲደ፥ በእተ! ሀቼ ቃይ ላኡ እብራዌቱ ዋቲኖ። ናቄዳዋ እ፥ “ኔን ነ እሻ ግዴዳ እብራውያ አያዉ ደቻይ?” ያጊደ ኦቼዳ።

14ሄ ብታኒ፥ “ኔና ኑ ቦላ ሞድያዋነ ዳና ኦ ሱንዳዌ ኦኔ? ኔን ሄ ግብጼ ብታንያ ዎዳዋዳን፥ ታናካ ዎናዉ ቆፓይ?” ያጌዳ። ሙሴ ሄ ዎደ፥ “ታን ኦዳባይ ኤረት ድጌዳ” ያግ ቆፒደ ያዬዳ።

15ካቲካ ሀዋ ስሴዳ ዎደ፥ ሙሳ ዎናዉ ኮዬዳ፤ ሽን ሙሴ ካትያፐ ባቃቲደ፥ ሚድያማ ጋድያን ደአናዉ ቢደ ሃ ኦላ ዶናን ኡቴዳ።

16ሄ ዎደ ሚድያማ ቄሳቱዋፐ እቶ ላፑን ማጫ ናናይ ደኢኖ፤ ኡንቱንቱ ባረንቱ አዉዋ ዶርሳቱዋ ሃ ኡሻናዉ ዎንግርያን ሃ ዱቂ ኩንናዉ ዬድኖ።

17ሄንንቻቱ ዪደ ማጫ ናና የደርሴድኖ፤ ሽን ሙሴ ደንድ ኤቂደ፥ ኡንቱንታ አሼዳነ ኡንቱንቱ ዶርሳቱዋ ሃ ኡሼዳ።

18ኡንቱንቱ ባረንቱ አዉዋ ዮቶረኮ ዬዳ ዎደ፥ “ሀቼ ዋን ኤለካ ዬድቴ?” ያጊደ ኦቼዳ።

19ኡንቱንቱ ዛሪደ፥ “ግብጼ ጋደ አሳ እቱ ኑና ሄንንቻቱዋፐ አሼዳ፤ እ ኑዉ ሃካ ዱቂደ ዶርሳ ዉድያ ኡሼዳ” ያጌድኖ።

20እ ባረ ማጫ ናና፥ “ያትና እ ሀቃን ደኢ? ህንተንቱ ሄ ብታንያ አያዉ አግ ባሼድቴ? አነ አ ጼሲደ፥ ምያባ ሾቢተ” ያጌዳ።

21ሙሴ ሄ ብታንያና ያን ደአናዉ ማየቴዳ፤ ብታኒካ ባረ ናቶ ጽፓሮ ሙሴዉ ማቻቶ ኦደ እሜዳ።

22ጽፓራ አቱማ ናኣ የልና፥ ሙሴ አ፥ “ታን አሳ ጋድያን በተ ግዳድ” ያጊደ፥ ገርሾማ ግ ሱንዳ።

23ጮራ ላይፐ ጉይያን፥ ግብጼ ካቲ ሀይቄዳ። እስራኤላቱ ባረንቱ አይለተፐ ኡንኤቲደ ዋሴድኖ፤ ኡንቱንቱ ዋሴዳ ዋሱ ፑደ ጾሳኮ ጋኬዳ።

24ጾሳይ ኡንቱንቱ ኡንኣ ዋሱዋ ስሲደ፥ እ አብራሃመና፥ ይሳቃናነ ያቆባና ጫቄዳ ጫቁዋ ሀሳዬዳ።

25ሄዋ ድራዉ፥ ጾሳይ እስራኤላቱዋ ጼሊደ ኡንቱንቱ ድራዉ ቆፔዳ።

← Chapter 1 Jump to: Chapter 3 →