Exodus 3

Amharic Dawro DFBE (ጌሻ ማጻፋ) No Year

← Chapter 2 Jump to: Chapter 4 →

1እት ዎደ ሙሴ ሚድያማ ጋደ ቄስያ፥ ባረ ቦሉዋ ዮቶራ ዶርሳቱዋ ሄሜ፤ እ ሄ ዉድያ ላግ አኪደ መላ ቢታ ጋጻ ጋካናዉ አፊደ ጾሳ ደርያ ሲና ጋኬዳ።

2ሄ ሳኣን መና ጎዳ ኪታንቻይ አጫን፥ ኤጽያ ታማ ላጩዋ ግዶን አዉ ቤቴዳ፤ አጫይ ታማን ጹገትንቶካ፥ ታማይ አጫ ሜናዋ ሙሴ በኤዳ።

3ሄዋ ድራዉ፥ ሙሴ፥ “ታን ያ ባደ፥ አጫይ አያዉ ታማን ሜተትቤነንቶ ሀ ኦራባ አነ በአና” ያጊደ ቆፔዳ።

4እ በአናዉ ያ ቤዳዋ መና ጎዳይ በኢደ አጫ ግዶፐ ጾሳይ አ፥ “ሙሴ! ሙሴ!” ያጊደ ጼሴዳ። ሙሴ፥ “አቤ” ጊደ ኮዬዳ።

5ጾሳይ አ፥ “ሃ ሺቆፓ። ኔን ኤቄዳ ቢታይ ጌሻ ግድያ ድራዉ፥ ነ ገድያን ደእያ ጫማ ከሳ” ያጌዳ።

6ቃይካ ጾሳይ አ፥ “ታን ነ አዉዋ ጾሳ፥ አብራሃሞ ጾሳ፥ ይሳቃ ጾሳ፥ ያቆባ ጾሳ” ያጌዳ። ሙሴ ጾሳ ጼላናዉ ያዬዳ ድራዉ፥ ባረ ዴሙዋ ገንዳ።

7መና ጎዳይ ቃይካ ሀዋዳን ያጌዳ፤ “ታን ግብጼ ጋድያን ታ አሳይ ቱጋትያ ቱጋ ጌሻ በኣደ፥ ኡንቱንቱ ባረንቱ ካፖቱዋፐ ዋስያ ዋሱዋ ስሳደ፥ ታን ኡንቱንቱ መቱዋ ኡባ ሻድ።

8ሄዋ ድራዉ፥ ታን ኡንቱንታ ግብጼ ጋድያ አሳቱዋ ኩሽያፐ አሻናዉነ ሄ ጋድያፐ ኡንቱንታ ከሳደ፥ አኮነ ሎኦ ጋድያ አሀናዉ ዎድ። ሄ ጋዲ ማይነ ኤሳይ ጎግያ ቢታ፤ ሄ ጋድያን ካናነቱ፥ ሂተቱ፥ አሞራዋናቱ፥ ፓርዛዋናቱ፥ ሂዌቱነ ያቡሳዋናቱ ሀእ ደኢኖ።

9ሀእ እስራኤለቱዋ ዋሱ ታኮ ጋኬዳ፤ ግብጼ ጋድያ አሳቱ ኡንቱንታ ናቂያ ናቁዋ ታን በኣድ፤

10ሄዋ ድራዉ፥ ሀእ ባ፤ ታ አሳቱዋ፥ እስራኤላቱዋ ግብጼፐ ከሳና ማላ፥ ግብጼ ካትያኮ ታን ኔና ኪታይ” ያጌዳ።

11ሽን ሙሴ ጾሳ፥ “ካትያኮ ባናዉነ እስራኤላቱዋ ግብጼፐ ከሳናዉ ታን ኦኔ?” ያጌዳ።

12ጾሳይ አ፥ “ታን ኔናና ግዳና፤ ቃይ ታን ኔና ኪቴዳዎ ማላይ ሀዋ: ኔን ሄ አሳ ግብጼፐ ከሴዳ ዎደ፥ ሀ ደርያ ቦላን ህንተንቱ ጾሳዉ ጎይናንታ” ያጌዳ።

13ሙሴ ጾሳ፥ “ግዶ ሽን፥ ታን እስራኤለቱዋኮ ባደ፥ ኡንቱንታ፥ ‘ህንተ አዎቱዋ ጾሳይ ታና ህንተንቱኮ ኪቴዳ’ ያግና፥ ኡንቱንቱ ታና፥ ‘አ ሱንይ ኦኔ?’ ያጊደ ኦቾፐ፥ ሄ ዎደ ታን ኡንቱንቶ ዋጋ ኦዶ?” ያጌዳ።

14ጾሳይ ሙሳ፥ “ታን ታና፤ ኔን እስራኤለቶ፥ ‘ታና ጌተትያዌ ህንተንቱኮ ታና ኪቴዳ’ ያጋ” ያጌዳ።

15ጾሳይ ሙሳ ቃይ፥ “ኔን እስራኤላቶ፥ ‘መና ጎዳይ ህንተንቱ አዎቱዋ ጾሳይ፥ አብራሃሞ ጾሳይ፥ ይሳቃ ጾሳይ፥ ያቆባ ጾሳይ፥ እ ታና ህንተንቱኮ ኪቴዳ’ ያጋ፤ ሀዌ የለታፐ የለታይ ጋካናዉ ታን ሀሳየትያ መናዉ ታ ሱን።

16“ስም፤ ባደ እስራኤልያ ጭማቱዋ ሺሻደ፥ ‘መና ጎዳይ ህንተንቱ አዎቱዋ ጾሳይ፥ አብራሃሞ፥ ይሳቃነ ያቆባ ጾሳይ ታዉ ቆንጪደ፤ ታና፥ ታን ህንተንታ ጾሞሳድ፤ ግብጼን ህንተንቱ ቦላ ኦሰቴዳዋካ ታን በኣድ።

17ታን ህንተንታ ግብጼ ጋድያ ቱጋፐ ከሳደ፥ ማይነ ኤሳይ ጎግያ ካናነቱዋ፥ ሂተቱዋ፥ አሞራዋናቱዋ፥ ፓርዛዋናቱዋ፥ ሂዌቱዋነ ያቡሳዋናቱዋ ጋድያ አፋና ጋ ኡታድ።’

18“እስራኤልያ ጭማቱ ነ ቃላ ስሳናዋንታ፤ ሄዋፐ ጉይያን ኔንነ ሄ ጭማቱ ግብጼ ካትያኮ ቢደ አ፥ ‘መና ጎዳይ፥ እብራዌቱዋ ጾሳይ፥ ኑናና ጋከቴዳ። ሀእ ኑን ሄዙ ጋላሳ ኦግያ መላ ቢታ ሀመት ቢደ፥ መና ጎዳ፥ ኑ ጾሳዉ፥ ያርሹዋ ያርሻና ማላ ኑና የዳ’ ያግተ።

19ሽን ዎልቃማ ኩሺ፥ አ፥ ዎልቃን የድሳና ዮፐ፥ ግብጼ ካቲ ህንተንታ የደናዋ ታን ኤራይ።

20ሄዋ ድራዉ፥ ታን ታ ኩሽያ የዳደ፥ ኡንቱንቱ ግዶን ታን ኦያ ታ ማላታቱዋ ኡባን ግብጼቱዋ ሾጫና። ሄዋፐ ጉይያን እ ህንተንታ የዳናዋ።

21“ቃይ ታን ግብጼቱዋን ሀ አሳ ሳቢሳና፤ ያቶፐ ህንተንቱ ከስያ ዎደ ኩሸ መላ ከስክታ።

22እብራዌ ማጫውና ኡባታ ባረ ግብጼ ሾራትኮነ ባረ ሶን ደእያ ግብጼ ማጫ አሳ ኦናነ ግዶፐ ኢኮ ቢደ፥ ብራ ሚሻቱዋ፥ ዎርቃ ሚሻቱዋነ አቱማ ናናይነ ማጫ ናናይ ማያና ማዮቱዋ ‘እምተ’ ጊደ ኦቻናዋንታ። ሄዋዳን ኦደ ህንተንቱ ግብጼቱዋ ማጹዋ ቦንቃንታ” ያጌዳ።

← Chapter 2 Jump to: Chapter 4 →