Exodus 4

Amharic Dawro DFBE (ጌሻ ማጻፋ) No Year

← Chapter 3 Jump to: Chapter 5 →

1ሙሴ ዛሪደ፥ “ኡንቱንቱ ታና አማነናን እጾፐ፥ ዎይ ታን ኦድያዋ ስሰናን እጺደ፥ ‘መና ጎዳይ ነዉ ቆንጭቤና’ ጎፐ ዋኖ?” ያግ ዛሬዳ።

2መና ጎዳይ አ፥ “ሄ ነ ኩሽያን ደእያዌ አዬ?” ያጊደ ኦቼዳ። እካ “ጻምኣ” ያጌዳ።

3መና ጎዳይ አ፥ “አነ ሄ ጻምኣ ሳኣን ኦላ” ያጌዳ። ሙሴ ሄ ጻምኣ ሳኣን ኦሌዳ ዎደ ሾሻ ግዴዳ፤ ያትና፥ ሙሴ አፐ ዎጼዳ።

4ሄዋፐ ጉይያን መና ጎዳይ አ፥ “ነ ኩሽያ የዳደ፥ አ ዱፍያ ኦይቃ” ያጌዳ። ሙሴ የዲደ ሾሻ ኦይቂና፥ ሾሻይ አ ኩሽያን ስሚደ፥ ጻምአዉ ላመቴዳ።

5መና ጎዳይ፥ “ሀዌ ሀኔዳዌ፥ መና ጎዳይ ነ አዎቱዋ ጾሳይ፥ አብራሃማ ጾሳይ፥ ይሳቃ ጾሳይነ ያቆባ ጾሳይ ነዉ ቆንጬዳዋ ኡንቱንቱ አማናናዳና” ያጌዳ።

6ሄዋፐ ጉይያን መና ጎዳይ አ፥ “ነ ኩሽያ ነ ሾጵያን የዳ” ያግና፥ ሙሴ ባረ ኩሽያ ሾጵያን የዴዳ፤ እ ከስ ጼሊደ፥ “ታ ኩሺ ኦሎቲደ ሻቻዳን ቦጼዳ” ያጌዳ።

7ጾሳይ አ፥ “ነ ኩሽያ ነ ሾጵያን ዛራደ የዳ” ያጌዳ። ሙሴ ባረ ኩሽያ ባረ ሾጵያን ዛር የዲደ ከስያ ዎደ፥ “ታ ኩሺ ስሚደ ህንኮ ቦላ ማላ ግዴዳ” ያጌዳ።

8ቃይካ መና ጎዳይ አ፥ “ኡንቱንቱ ኔና አማነናን ዮፐነ ኮይሮ ማላታ አማነናን እጾፐ፥ ላኤን ማላታ ኡንቱንቱ አማናናዋንታ።

9ሽን ኡንቱንቱ ሀ ላኡ ማላታቱዋ አማነናን ዮፐ፥ ዎይ ኔን ኦድያዋ ስሰናን እጾፐ፥ ናይለ ሻፋፐ ሃ አካደ፥ መላ ቢታን ጉሳ፤ ኔን ሻፋፐ አኬዳ ሃይ ቢታን ሱ ግዳናዋ” ያጌዳ።

10ሙሴ መና ጎዳ፥ “አቤት መና ጎዳዉ፥ ታን ሀዋፐ ካሰካ፥ ዎይ ኔን ነ ቆማዉ ሃሳዮደፐ ዶምና ታን ሃሳያናዉ ዳንዳይከ፤ ታን ዴዶታደ ሃሳያይ፤ ቃይ ታ እንጻርሳይካ ሉፋ” ያጌዳ።

11መና ጎዳይ አ፥ “አሳዉ ዶና መዳዌ ኦኔ? አ ዱደ፥ ዎይ ቱለ ኦያዌ ኦኔ? ጼልያዋነ ቆቃ ኦያዌ ኦኔ? ታና መና ጎዳ ግድክታየ?

12ኔን ሀእ ባ፤ ታን ኔና ሃሳያናዳን ማዳና፤ ኔን ጋናባ ታን ኔና ታማርሳና” ያጌዳ።

13ሽን ሙሴ፥ “አቤት ጎዳዉ፥ ሀያና፥ ሀዋ ኦናዉ ሀራ አሳ ኪታርኪ!” ያጌዳ።

14ሄዋፐ ጉይያን መና ጎዳይ ሙሴዉ ሎይ ሀንቀቲደ አ፥ “ሌዊያ ግዴዳ ነ እሻ አሮኔ? እ ሎኦ ሃሳያና ዳንዳይያዋ ታን ኤራይ፤ ሀእ እ ኔናና ጋከታናዉ ዪደ ኦግያ ቦላን ደኤ፤ እ ኔና በእያ ዎደ አ ዎዛናይ ናሸታናዋ።

15ኔን፥ ‘ያጋ፤ ያጋ’ ጋደ አዉ ኦዳና፤ ታን ህንተንታ ላኡዋካ ሃሳያናዉ ማዳናነ ህንተንቱ ኦናባ ታማርሳና።

16እ አሳዉ ነ ድራ ሃሳያናዋ፤ ሄዌካ፥ እ ነዉ ዶና ማላ ግዳናዋ፥ ኔን አዉ ጾሳ ማላ ግዳናሳ ግያዋ።

17ሽን ማላታቱዋ አን ኦናዉ፥ ኔን ሀ ጻምኣ አካደ ባ” ያጌዳ።

18ሄዋፐ ጉይያን ሙሴ ባረ ቦሉዋ ዮቶረኮ ስም ቢደ፥ “ሀኖ ጋካናዉ ሸምፑዋና ደእያ አሳይ ደኦፐ በአናዉ፥ ታን ጉየ ታ አሳኮ ግብጼ ቦ?” ያጌዳ። ዮቶረ ሙሳ፥ “ኤ ባ፤ ሳሮ ጋካ” ያጌዳ።

19ሙሴ ሚድያማ ጋድያን ደእሽን መና ጎዳይ አ፥ “ኔና ዎናዉ ኮዬዳ አሳቱ ኡባይ ሀይቂ ድጌዳ ድራዉ፥ ጉየ ግብጼ ጋድያ ስማደ ባ” ያጌዳ።

20ሙሴ ባረ ማቻቶነ ባረ አቱማ ናና ሀርያ ቶግስ አኪደ፥ ጉየ ግብጼ ስሙሳ ዶሜዳ፤ ሙሴ ጾሳ ጻምኣ ባረ ኩሽያን ኦይቂደ ቤዳ።

21መና ጎዳይ ሙሳ፥ “ኔን ግብጼ ስማደ ብያ ዎደ፥ ታን ነዉ እሜዳ ዎልቃን ኔን ኦና ማላታቱዋ ኡባ ግብጼ ካትያ ስንን ኔን ኦናዋ ባሎፓ። ያትናካ አሳ እ የደና ማላ፥ ታን አ ዎዛና ዶንጭልሳና።

22ሄ ዎደ ታን መና ጎዳይ፥ ግያዋ ካትያዉ ሀዋዳን ያጋደ ኦዳ፤ ‘ “እስራኤሊ ታ ባይራ ናኣ።

23እ ታዉ ጎይናና ማላ፥ ታ ናኣ ኔን የዳና ማላ፥ ታን ነዉ ኦዳድ፤ ሽን ኔን አ የደናን እጻዳ፤ ሄዋ ድራዉ፥ ታን ነ ባይራ አቱማ ናኣ ዎና” ያጌ’ ያጋደ ኦዳ” ያጌዳ።

24ኦግያን ሸምፕያሳን መና ጎዳይ ሙሴና ጋከቴዳ፤ አ ዎና ሀኔዳ።

25አ ማቻታ ጽፓራ ሳልያ አካደ፥ ባረ ናኣ ቃጻራዱ። ሄ ሾኩዋን ሙሴ ገድያ ቦቻዱ። እዛ ሙሳ፥ “ኔን ታዉ ቱሙ ሱ ምሽራ” ያጋዱ።

26መና ጎዳይ ሄዋ ድራዉ አ ዎናን አጌዳ። ሄ ዎደ ቃጻራ ማላታናዉ አ፥ “ኔን ታዉ ሱ ምሽራ” ያጋዱ።

27መና ጎዳይ አሮና፥ “ኔን ሙሴና ጋከታናዉ መላ ቢታ ባ” ያጌዳ። እ ቢደ፥ ሙሴና ጾሳ ደርያን ጋከቲደ አ የሬዳ።

28ሄዋፐ ጉይያን ሙሴ መና ጎዳይ ባረ ቦላ ኪቴዳ ቃላ ኡባነ ኦና ማላ፥ ባረና አዛዜዳ ኦራ ማላታቱዋ ኡባ አሮናዉ ኦዴዳ።

29ሙሴነ አሮነ ቢደ፥ እስራኤለቱዋ ጭማቱዋ ኡባ ሺሼድኖ።

30አሮነ መና ጎዳይ ሙሴዉ ኦዴዳ ቃላ ኡባ ኡንቱንቶ ኦዴዳ። ማላታቱዋካ ሄ አሳ ስንን ኦዳ።

31ኡንቱንቱካ አማኔድኖ። መና ጎዳይ ኡንቱንቶ ቆፔዳዋነ ኡንቱንቱ ቱጋ በኤዳዋ ስሴዳ ዎደ፥ ኡንቱንቱ ጉፋኒደ ጎይኔድኖ።

← Chapter 3 Jump to: Chapter 5 →