Exodus 24

Amharic Dawro DFBE (ጌሻ ማጻፋ) No Year

← Chapter 23 Jump to: Chapter 25 →

1ሄዋፐ ጉየ መና ጎዳይ ሙሳ፥ “ኔን፥ አሮነ፥ ናዳበ፥ አቢህነ እስራኤልያፐ ላፑን ታሙ ጭማ አሳቱ መና ጎዳኮ ደርያ ሁጲያ ፑደ ከሲደ ሃኩዋን ጎይንተ።

2ሽን ሙሴ፥ ኔን ኔረካ መና ጎዳኮ ሺቃ፤ ሀራ ጭማቱ ታ ማታ ዮፕኖ። ቃይ አሳይካ ኔናና ፑደ ከሶፖ” ያጌዳ።

3ሙሴ ዪደ፥ መና ጎዳ ቃላ ኡባነ አ ዎጋ ኡባ አሳዉ ኦድና አሳይ ኡባይ እት ቃላን፥ “መና ጎዳይ ኦዴዳዋ ኡባ ኑን ኦና” ያጌድኖ።

4ሙሴ መና ጎዳይ ኦዴዳዋ ኡባ ጻፌዳ። ዎንተ ጋላስ ዎንታ ጉራን ደንዲደ፥ ደርያ ጻጱዋን ያርሽያ ሳኣ ግምቢደ እስራኤልያ አሳ ያራ ታማነ ላኡዋ ሱንን፥ ታማነ ላኡ ሹቻ ቱሳ ኤሴዳ።

5እ እስራኤላቱዋፐ ያላጋ አቱማ አሳ ኪትና፥ ኡንቱንቱ ቢደ ጹግያ ያርሹዋ ሺሼድኖ፤ ቃይ እትፐተ ያርሾ ኮሩማቱዋ መና ጎዳዉ ያርሼድኖ።

6ሙሴ ሱፐ ባጋ አኪደ ከርያን ትጌዳ፤ አቴዳ ባካ ሱ እ ያርሽያ ሳኣን ጫጫፌዳ።

7ሄዋፐ ጉይያን ቃላ ጫቁዋ ማጻፋ አኪደ፥ አሳዉ ናባቤዳ፤ ኡንቱንቱ፥ “መና ጎዳይ ኦዴዳዋ ኡባ ኑን ኦና፤ ኑን አዛዘታና” ያጌድኖ።

8ሄዋፐ ጉይያን ሙሴ ሄ ሱ አኪደ፥ አሳ ቦላ ጫጫፊደ ኡንቱንታ፥ “በእተ፥ መና ጎዳይ ሀ ቃላ ኡባን ህንተናና ዎዳ ቃላ ጫቁዋ ሱይ ሀዋ” ያጌዳ።

9ሙሴ፥ አሮነ፥ ናዳበ፥ አቢህነ እስራኤልያ ጭማቱዋፐ ላፑን ታሙ ፑደ ከሴድኖ።

10እስራኤልያ ጾሳ በኤድኖ፤ አ ገድያፐ ጋርሳና ሳሉዋዳን ጌዬዳ ሳምፔርያ ጌተትያ ጶልያ ሹቻፐ ኦሰቴዳዋ ማላትያ ዉይግያ ማላባይ ደኤ።

11ሽን ጾሳይ እስራኤልያ አሳ ካፓቱዋ ዎቤና። ኡንቱንቱ ጾሳ በኤድኖ፤ አ ስንን ሜድኖነ ኡሼድኖ።

12መና ጎዳይ ሙሳ፥ “ኔን ደርያ ፑደ ሃ ታኮ ከሳደ፥ ሀዋን ጋምአ፤ ያቶፐ ኔን ኡንቱንታ ታማርሳና ማላ፥ ታን ዎጋነ አዛዙዋ ጻፌዳ ሹቻ ነዉ እማና” ያጌዳ።

13ሄዋፐ ጉይያን ሙሴ ባረ ቆማ ኢያሱና ባናዉ ደንዴዳ፤ ሙሴ ጾሳ ደርያ ፑደ ከሴዳ።

14እስራኤልያ አሳ ጭማቱዋ እ፥ “ኑን ህንተንቱኮ ስማናዉ ሀዋን ደእሽተ፤ አሮነነ ሁር ሀዋን ህንተናና ደኢኖ፤ የዉ ደእያ ኦንነ ኡንቱንቱኮ ቦ” ያጌዳ።

15ሙሴ ደርያ ፑደ ከሴዳ ዎደ፥ ሻሪ ደርያ ካሜዳ።

16ቃይ መና ጎዳ ቦንቹ ሲና ደርያ ቦላን ኡቴዳ፤ ሄ ሻሪ ኡሱፑን ጋላሳ ማዬዳ፤ ላፑን ጋላሳን ሄ ሻርያ ግዶፐ መና ጎዳይ ሙሳ ጼሴዳ።

17እስራኤላቶ መና ጎዳ ቦንቹ ደርያ ሁጲያን ጹግያ ታማ ማላቲደ ቤቴዳ።

18ሄዋፐ ጉይያን ሙሴ ሄ ሻርያ ግዶ ገሊደ፥ ደርያ ፑደ ከሲደ ደርያ ሁጲያን ኦይታሙ ጋላሳነ ኦይታሙ ቃማ ጋምኤዳ።

← Chapter 23 Jump to: Chapter 25 →