Job 1

Amharic Dawro DFBE (ጌሻ ማጻፋ) No Year

Jump to: Chapter 2 →

1ኡጻ ግያ ቢታን ኢዮባ ግያ እት ብታኒ ደኤ፤ እ ቶሺ ባይናነ ሱረ አሳ፤ ጾሳዉ ያዪደ፥ ኢታባፐካ ሃኬዳ አሳ።

2አዉ ላፑን አቱማ ናናቱነ ሄዙ ማጫ ናናቱ የለቴድኖ።

3ማጹዋ ግዶፐ፥ አዉ ላፑን ሻኡ ዶርሳቱ፥ ሄዙ ሻኡ ጋሎቱ፥ እቼሹ ጼቱ ዋ ቦራቱ፥ እቼሹ ጼቱ ማጫ ሀረቱነ ሎይ ዳሮ ቆማቱ ደኢኖ። አዋይ ዶልያ ባጋና ደእያ አሳ ኡባፐ እ አዳ ዱረ አሳ።

4አ አቱማ ናናቱ ባረንቱ ሶን ባረንቱ ሶን፥ ካል ካል ግብራ ጊግሲደ፥ ባረንቱ ሄዙ ምቼቱዋ ባረንቱና ማናዉነ ኡሻናዉ ጼሲኖ።

5ግብራ ጋላሳቱ ፖለቴዳ ዎደ፥ ኢዮብ ዎንታ ጉራና ደንዲደ፥ ባረ ናናቱዋ እቱዋ እቱዋ ሱንን ጹግያ ያርሹዋ ያርሼ። እ ሄዋ ኦያዌ፥ “ታ ናናቱ ባረንቱ ዎዛናን ጾሳ ሸቂደ፥ ናጋራ ኦድኖንቶነ” ጊደ ህርጌዳ ድራሳ። እ ኡንቱንታ ጌሻናዉ ሄዋ ኡባ ገደ ኦ።

6እት ጋላስ ጾሳ ኪታንቻቱ መና ጎዳ ስንን ቤታናዉ ዬድኖ፤ ሴጻናይካ ቃይ ኡንቱንቱና ዬዳ።

7መና ጎዳይ ሴጻና፥ “ላ ኔን ሀቃፐ ያድ?” ያጌዳ። ሴጻናይ መና ጎዳዉ፥ “ታን ሳኣን ኡባን ያነ ሃነ ዩይያሳፐነ ስመረትያሳፐ ያድ” ያጊደ ዛሬዳ።

8መና ጎዳይ ሴጻና፥ “ያትና፥ ታ ቆማ ኢዮባ አኬካደ በኣድ? ሳኣ ቦላን አ ማላትያ ቶሺ ባይናነ ሱረ አሳይ ሙለካ ባዋ። እ ጾሳዉ ያይያ፥ ኢታባፐካ ሃኬዳ አሳ” ያጌዳ።

9ሴጻናይ፥ “ቱሙ ኢዮብ ነዉ ጮ ያዪ?

10አነ አ ሶ አሳነ አዉ ደእያዋ ኡባ ኔን ድራደ ናጋበይኪ? እ ኦያ ኦሱዋ ኡባ ኔን አንጄዳ ድራዉ፥ አ መህያ ዉዲ ቢታ ኡባ ቦላን ዳሬዳ።

11ሽን ኔን ነ ኩሽያ የዳደ፥ አዉ ደእያ ማጹዋ ኡባ ሾጫንቶ፥ እ ኔና ቱሙ ነ ስንን ሸቃና” ያጌዳ።

12መና ጎዳይ ሴጻና፥ “ኤኖ፥ አዉ ደእያባይ ኡባይ ነ ኩሽያና። ሽን ኔን አ ቦቾፓ” ያጌዳ። ሄዋፐ ጉይያን፥ ሴጻናይ መና ጎዳ ስንፐ ከሲደ ቤዳ።

13እት ጋላስ ኢዮባ አቱማ ናናቱነ ማጫ ናናቱ ባረንቱ ባይራ እሻ ሶን ሚደነ ዎይንያ ኤሳ ኡሺደ ደኢኖ።

14ያትሽን እት ብታኒ ኢዮባኮ ዪደ፥ “ኑን ቦራቱዋ ዋጺደ ጎሽሽን፥ ሀረቱካ ኑ ማታን ማታ ሚደ ደእሺና፥

15ሳባ ቢታ አሳቱ አኬከናን ዪደ፥ ኦላ ከሴድኖ፤ ያቲደ ኡባካ አክ ቤድኖ። ቃይ ቆማቱዋካ ቃራ ማሻን ቡሳኬድኖ። ያትና፥ ታ ጻላላይ አታደ፥ ሀ ሀኔዳዋ ነዉ ኦዳናዉ ያድ” ያጌዳ።

16እ ብሮ ሃሳይሽን፥ ሀራ ብታኒ ዪደ፥ “ጾሳ ታማይ ሳሉዋፐ ዎደ፥ ዶርሳቱዋነ ዶርሳቱዋ ሄምያዋንታ ሜዳ። ያትና፥ ታ ጻላላይ አታደ፥ ሀ ሀኔዳዋ ነዉ ኦዳናዉ ያድ” ያጌዳ።

17እ ብሮ ሃሳይሽን፥ ሀራ ብታኒ ዪደ፥ “ካላዳዌቱዋ ቢታፐ ሄዙ ጩጉዋን ሻከቴዳ ፓናቱ ዪደ፥ ኑና ኦሊደ፥ ጋሉዋ ኡባ አክ ቤድኖ፤ ቆማቱዋካ ቃራ ማሻን ቡሳኬድኖ። ያትና፥ ታ ጻላላይ አታደ፥ ሀ ሀኔዳዋ ነዉ ኦዳናዉ ያድ” ያጌዳ።

18እ ብሮ ሃሳይሽን፥ ሀራ ብታኒ ዪደ፥ “ነ አቱማ ናናቱነ ማጫ ናናቱ ባረንቱ ባይራ እሻ ሶን ሚደነ ዎይንያ ኤሳ ኡሺደ ደእሺና፥

19ዎልቃማ ጎቲ አኬከናን ባዙዋፐ ደንዲደ፥ ጎልያ ኡባና ሾጬዳ። ጎሊ ኡንቱንቱ ቦላ ኩንድና፥ ናናቱ ሀይቄድኖ። ያትና፥ ታ ጻላላይ አታደ፥ ሀ ሀኔዳዋ ነዉ ኦዳናዉ ያድ” ያጌዳ።

20ሄዋፐ ጉይያን፥ ኢዮብ ደንዲደ፥ ካዮ ባረ ማዩዋ ፔደ፤ ባረ ሁጲያካ ሜደቴዳ። ቢታን ጉፋኒደ ጾሳዉ ጎይኒደ፥

21ሀዋዳን ያጌዳ፤ “ታን ታ አት ኡሉዋፐ ካሎ የለታድ፤ ሀይቂያ ዎደካ ታን አካደ ብያባይ ባዋ። መና ጎዳይ እሜዳ፤ መና ጎዳይ ዛሪደ አኬዳ። መና ጎዳ ሱንይ ጋላተቶ” ያጌዳ።

22ሀ ኡባንካ ኢዮብ ናጋራ ኦቤና፤ ጾሳ አማሳልቤና።

Jump to: Chapter 2 →