Job 20

Amharic Dawro DFBE (ጌሻ ማጻፋ) No Year

← Chapter 19 Jump to: Chapter 21 →

1ናእማ ቢታፐ ዬዳ ጾፋር ሀዋዳን ያጊደ ዛሬዳ፤

2“ነ ሃሳያይ ታና ሀንቀዳ ድራዉ፥ ታን አይነ ጋምኤናን ነ ሃሳያዉ ዛሩዋ እማና።

3ነ ሸቃ ሃሳያ ታን ስሳድ፤ አዉ በስያ ዛሩዋ ታና እማ እማ ጌ።

4“አሳ ቢታ ቦላ ዎዳ ዎድያፐ ዶሚደ፥ በንፐካ ናጋራንቻ አሳቱዋ ጬቁ ቃን ዎድያሳ ግድያዋ ኤራሳ፤

5ጾሳ ኤረና አሳቱዋ ናሸቻይካ ልጴዳ አይፊ ጼላናሳ ግድያዋ ኔን ኤራሳ፤

6ኢታ አሳይ ሻርያ ጋካናዉ አዱቆፐካ፥ አ ሁጲካ ሻርያ ቦቾፐ፥

7እ ፓንዳዳን ፕተት ያና። አ ኤርያ ኡባይ፥ ‘እ ሀቃን ደኢ?’ ያጋና።

8አኩሙዋዳን እ ፓል ያና፤ ስሚደካ ቤተና፤ ቃማ ሳጻዳን እ ይ ባሻና።

9አ በኤዳ አይፈቱ ላኤንደ፥ አ በእክኖ፤ እ ባረ ደኢያሳፐካ ትፕ ጊደ ያና።

10ኢታ አዉ ቦንቂ አኬዳ ሚሻ አ ናናቱ ባረንቱ ኩሽያን ጉየ ዛሪደ ህዬሳቶ ጭጋና።

11ዎልቃን ኩሜዳ አ ያላጋተ ምኖታይ ጉ ዎድያፐ ጉይያን፥ ቢታ ከሳና።

12“ኢታ አሳ ዶናን ኢታተይ ቁማዳን ማልእንቶካ፥ እ ባረ እንጻርሳፐ ጋርሳ ባጋና ገንፐካ፥

13ዉረናዳን ባረ ዶናን ጮሚደ፥ ዎ ባሽንቶካ፥

14አ ኡሎ ግዶን አ ቁማይ ላመታና፤ ዎያ ሾሻ ይሻ ማላ አዉ ግዳናዋ።

15ኢታ ብታኒ ባረ ምቴዳ ዱረተ ሃ ጩቻና፤ አ ኡሉዋፐ ጾሳይ ጮሺደ ከሳና።

16ኢታ ብታኒ ምትያባይ አዉ ይሻ ግዳናዋ፤ ሾሻ ይሻ ማላ ግዲደ፥ አ ዎና።

17ኤሳይነ ማይ ሃዳን ጎግሽና፥ እ በኤናን ሀይቃና።

18ባረ ዳቡሬዳ ዳቡራ ጫዋ ሜናን፥ ሀራዉ ሼና፤ ዛልኢደ ዎሴዳ ባረ ዎያንካ ናሸተና።

19አያዉ ጎፐ፥ ህዬሳቱዋ እ ኡንኤዳ፤ ኡንቱንታ ሸነኮ ጌዳ፤ ሀራ አሳይ ኬጼዳ ጎልያካ ባረዉ አኬዳ።

20“አ ዮራዉ ዛዋይ ባዋ፤ ባረ ዶስያዋ ካላናዉ ዳንዳየና፤

21እ ሜዳዋፐ ጉይያን፥ አያይነ ደኤና። ሄዋ ድራዉ፥ አ ዱረተይ ጋምኤና።

22እ ዳሮ ማጹዋ ደምያ ዎደ፥ መቱ አ ቦላ ጋክ ዎና።

23እ ሚደ ካልያ ዎደ፥ ጾሳይ አ ሙራናዉ ባረ ሱልያ ሀንቁዋ አ ቦላ ጉሳና።

24ብራታ ማሻፐ እ ባቃታና፤ ሽን ናስያ አዳይ አ ጫዳናዋ።

25ሄ አዳይ አዉ ዞክያና ካን ከሳና፤ ሄ ጶልያ ጼራይ አ ትርያ አደ፥ ጭሽያ ጉሳና። ዳጋማን አ ዎዛናይ ሻባረታና።

26“እ ሺሼዳ አቁዋ ኡባይ ያና፤ አሳይ ኤቤና ታማይ አ ማና፤ አ ጎልያን አቴዳ አሳይ ኡባይካ ታማን ሜተታና።

27ሳሎቱ ሀ ብታንያ ናጋራ ቆንጭሳና፤ ቢታይካ አ ቦላ ማርካታና።

28ጾሳይ ሀንቀቲደ አህያ ቤታን አ ጎሊነ አዉ ደእያባይ ኡባይ ሾከቲደ ባና።

29ጾሳይ ኢታ አሳቶ ዎዳ ካጫይ፤ ጾሳፐ ግሸቴዳ ግሹ ሀዋ” ያጌዳ።

← Chapter 19 Jump to: Chapter 21 →