Job 19

Amharic Dawro DFBE (ጌሻ ማጻፋ) No Year

← Chapter 18 Jump to: Chapter 20 →

1ሄዋፐ ጉይያን፥ ኢዮብ ዛሪደ፥ ሀዋዳን ያጌዳ፤

2“ህንተ ታና አዉደ ጋካናዉ ኡንኤቴ? አዉደ ጋካናዉ ህንተ ቃላን ታና ጋጪቴ?

3ህንተ ታና ታሙ ገደ ቦሬድታ፤ ታና ካዉሺድካ ዬላትክታ።

4ታን ቱሙ ባሌዳዋ ግድንቶካ፥ ታ ባላይ ታና ኦቻና።

5ህንተ ታፐ ኬክያዋ ህንተዉ ማላትና፥ ‘ሀዌ መቱ ኡባይ አ ጋኬዳዌ፥ እ ባይዜዳ ድራሳ’ ያጊደ፥ ታ ቦላ ፕርዲታ።

6ሽን ሀ መቱዋ ኡባ ታ ቦላ ጋዳዌነ ግትያን ታና ገልሴዳዌ ጾሳ ግድያዋ ኤርተ።

7“ታን፥ ‘ናቀታድ’ ያጋደ ዋስና፥ ታዉ አልያዌ ባዋ፤ ቃላ ቁ ኦደ፥ ሱረ ፕርዳዉ ዋስናካ፥ ስስያዌ ባዋ።

8ታን አናዳን ጾሳይ ታ ኦግያ ድሬዳ፤ ታ ሀመትያሳካ ማን ጎዜዳ።

9ታ ዱረተ ታፐ ቃሬዳ፤ ታ ቦንቹዋካ ታፐ ድጌዳ።

10እ ታና ኡባ ባጋና መንሬ የጌዳ፤ ታ ህዶታካ ጻጱዋና ቆለቴዳ ም ማላ ኦዳ።

11አ ሀንቁ ታ ቦላ ኤጽ ከሴዳ፤ እ ታና ባረ ሞርክያዳን ፓይዴ።

12ታ ቦላ ዶዳናዉ እ ባረ ኦላንቻቱዋ ኪቴ፤ ኡንቱንቱ ታና ኦላናዉ ኦግያ ጊግሲኖ፤ ታ ዱንካንያ ዩሹዋካ ዶዲኖ።

13“ጾሳይ ታ እሻቱዋ ታፐ ሃሴዳ፤ ታና ኤርያዋንቱ ኡባና ታዉ አላጋ ግዴድኖ።

14ታ ዳቦቱ ታፐ ሻከቴድኖ፤ ታ ላገቱካ ታና ዶጌድኖ።

15ታ ሶን እማተን ሞኮዋንቱ ታና ዶጌድኖ፤ ታ ማጫ ቆማቱካ ታና እማዳንነ በትያዳን ጼሊኖ።

16ታን ታ ቆማ ጼግና፥ ታዉ ኮየና፤ ታን ዎስናካ፥ ታዉ ኤኖ ጌና።

17ታ ማቻታ ታ ዶና ፔኑዋ እጻዱ፤ ታ እሻቱካ ታና ሸነቲኖ።

18ሀራይ አትና፥ ጉ ናናቱካ ታና ካኖ፤ ታና ጼልያ ዎደ፥ ታ ቦላ ቅሊጪኖ።

19ታ ማታ ላገቱ ኡባይ ታና ሸነቲኖ፤ ታን ሲቅያዋንቱካ ታዉ ዞክያ ዛሬድኖ።

20ታ መቀይ ታ ጋልባና ኦይቀቴዳ፤ ሀይቁዋፐ ላፋሳን ታን አታድ።

21“ህንተኖ ታ ላገቶ፥ ጾሳ ኩሺ ታና ደቼዳ ድራዉ፥ ታዉ ቃረትተ።

22ጾሳይ ታና የደርስያዋዳን፥ ህንተ ታና አያዉ የደርሲተ? ሀኖ ጋካናዉ ህንተ ታና ቱጋዬዳዌ ግደኔ?

23“ሀኖ ጋካናዉ ታን ሃሳዬዳ ቃላይ፥ ዎይ ሀሳየቴዳ ግዴረኔሻ! ማጻፋንካ ዎይ ጻፈቴዳ ግዴረኔሻ!

24ዳሮ ጋምአና ማላ፥ ብራታ ማርሳን ዛላ ቦላን ዎጨቲደ ጻፈቴረኔሻ!

25“ታና ዎዜዳዌ ፓጻ ደእያዋነ ዉርሰን ቢታ ቦላን እ ኤቃናዋ ታን ኤራይ።

26ታ ጋልባይ ሜተት ዉሮፐነ፥ ታን ታ አሹዋፐ ሻከታደ፥ ጾሳ በአናዋ ኤራይ።

27ሀራ ኡራ ግደናን፥ ታን ታ ሁጲያን፥ ታ አይፍያን አ በአና። ሄዋ ድራዉ፥ ታ ዎዛናይ አያ ላሞቲ!

28“ህንተ፥ ‘መቶ ኡንኩ አ ግዴዳ ድራዉ፥ አነ ሃይተ! አ የደርሴቶ!’ ጎፐ፥

29ማሻዉ ያይተ! ጾሳ ሀንቁ ማሻና ያና፤ ፕርዳይ ደእያዋካ ኤርተ” ያጌዳ።

← Chapter 18 Jump to: Chapter 20 →